Maan‑kʋʋre 26 - SEBR SÕNGO

¹ Da naan-y wẽn-faad n kõ y meng ye, da pees-y nin-naande, daoog bɩ kugri n waoog-a wa y wẽnd ye, da lugl-y kuga n yĩgimd b taoor ye tɩ maam bal la yãmb Wẽnnaam rũnna la beoogo.

² Deeg-y vʋʋsga noya la y waoog Soaala-Wẽnd waoogra do-sõngẽ: maam la Naaba-Wẽnde.

Pʋlem-noodo

³ Y sa n vɩ wala m sẽn wilg yã, n deeg m noya y pʋ-tẽerẽ la y manesem pʋgẽ,

⁴ m na kɩt tɩ saaga sek yã, tẽnga na wom a biisi, tɩɩsa na ning biisi,

⁵ al tɩ kooda pãbe n tãag tɩɩsa wobre, tɩ tɩɩsa me wob n tãag bʋdbo. Y na rɩ n tɩge la tẽnga me na zĩnd ne laafi.

⁶ M na n gãnega tẽnga laafi, bũmb kõn yɛɛs-y y gãagẽ ye. M na n zãaga y tẽnga ne bõn-nindi wã fãa; sʋʋg kõn leb n pɩʋʋg y tẽng ye.

⁷ Y na n diga y bɛɛbã la y sʋʋsa na gãneg-b zãnga.

⁸ Neb a nu digda bɛɛb koabga, tɩ koabg rigd tus piiga. Y sʋʋs n na n dɩ-b zãnga.

⁹ M na n gesa yãmb yelle, y na n wekame n lebg zembala la m zooda na n paa ne yãmba.

¹⁰ Dɩẽ kooda na n vaagame n yiisi n paam n bĩng rõanda rẽnna.

¹¹ M na n tila m zak yãmb sʋka la m kõn bas-y abada.

¹² M na n vɩɩnda ne yãmba, n ya yãmb Wẽnnaam tɩ yãmb ya m neba.

¹³ Yaa maam la yãmb Wẽnnaam; maam n yiis yãmb Ezipt tẽnga tɩ y ra yɩ be yem-daad ye. M kɩtame tɩ y lub y zɩɩbã n kẽnd marsã ne yẽesem.

Kãab beedo

¹⁴ Yãmb sã n ka kelg maam la y sã n ka reeg m noya,

¹⁵ yãmb sã n tusd m noya la m dog-n-mikã n lebsd kɛɛnga, yãmb sã n ka tũud m sẽn wilgi, n sãam zoodã,

¹⁶ ma me na n tusa yãmb n lebs kɛɛnga. M na zĩndig-y rabeem la yɩɩr pʋgẽ, y na bẽ bãase, tɩ y nin lebg kõaada, tɩ y vʋʋsg lebg toogo. Y na n namsa y mens n bʋd y pʋt la na n yɩɩ bɛɛb rɩɩbo.

¹⁷ M na n bas-y lame la y bɛɛba na n tõog-y lame; yãmb na n kʋɩɩ tĩig tɩ ned yaool n pa rigd-y ye.

¹⁸ La y sã n baas n ka kelgdẽ, m na sɩbg y beegrã naoor a yopoe.

¹⁹ M na n sika y wilg-m-menga n kɩt tɩ y saag lebg kutu, n kɩt tɩ y tẽnga lebg zũudu.

²⁰ Y na n sɛ-la y pãng zaalem, tɩɩsa wala pʋtã kõn le wom biig ye.

²¹ Y sã n zẽk y zug ne maam n ka kelg-ma, m na sik yel-beed y zugu tɩ y beegrã paam sɩbgr naoor a yopoe.

²² Yaa we-rũms la m na n bas tɩ b kẽ tẽngã n yõg y kamba fãa, n sɛ y rũmsã, n yãgs-y wa b sẽn yãgsd daaga, tɩ y soy lebg so-vɩɩdo.

²³ La rẽ sã n ka wilg y yam, tɩ y ket n zẽkd y zug ne maam,

²⁴ mam me na yik ne yãmba n sɩbg y beegra naoor a yopoe.

²⁵ Y sã n sãam zoodã, m na yiis m sʋʋg n dok m sũuri. Y na n tɩ sũu taab y tẽn-bɛda pʋga la m na n kɩtame tɩ tẽn-kũum babs-y be, m na n kẽesa y bɛɛba be tɩ b yõg yãmba.

²⁶ Koma sã n wa lʋɩ y tẽngẽ, pagb piig na tõog n wʋm zak piig bur, wʋng a ye pʋgẽ. Y na rɩ la kõn ta ni, tɩ moenda na n yɩɩ bilfu.

²⁷ La rẽ sã n ka wilg y yam tɩ y ket n zẽkd y zug ne maam,

²⁸ mam me na yik ne yãmba, m sũur na n puugame, tɩ m sɩbg y beegrã naoor a yopoe.

²⁹ Y na n wãba y kom-dibli nemdo, n wãb y kom-pugli nemdo.

³⁰ M na n menesa y pʋʋsga zĩiga, m na n wã-la y tɩdara maan-kugr. Y wẽn-faada sẽn wã n dɩga zutu la m na n sam y ned woo ned woo sẽn ki. M yam na n laka ne yãmba.

³¹ M na n kɩtame tɩ y tẽnsa lebg raboodo, m na n zũndga y wẽnd dotã, m kõn le kok y maanda yũug ye.

³² M na n pidsa tẽnga ne sũ-sãanga al tɩ y bɛɛba sẽn na n wa reeg yãmb zĩiga na n yɛɛse.

³³ M na n sẽeg-y-la nin-zẽmba sʋka, m na n tʋma bɛɛba tɩ b wa tak zabr ne-yã. Y tẽnga na n lebga zĩ-peen-daaga tɩ y rot lebg raboodo.

³⁴ Y sẽn wat n be y bɛɛba sʋka n ka mi y sẽn lebdẽ wã, wakat kãng la tẽnga na n sɩng vʋʋsgo. A ka na n le paam koob ye.

³⁵ Yãmb nimbãanega wakat la a na n vʋʋse tɩ yãmb sẽn waa n be a pʋgẽ wã, a ka paam vɩʋʋg n vʋʋs ye.

³⁶ Sẽn na n kell n pa-b tẽngẽ wã, m na n kɩt tɩ b vɩɩnd ne yɩɩre, y bɛɛba sʋka. Tɩɩg wã koɛɛng meng sẽn lʋɩt bʋʋre na n yɛɛs-b lame tɩ b kʋɩ tĩig wala b zoet n na n põsa sʋʋga, mik ned ba a ye ka pʋgd-b ye.

³⁷ B na n lagsame n lʋɩ n bʋʋg taaba wala sʋʋg n pʋgd ba, mik ned ka pʋgd-b ye. B ka na n tõog b bɛ ba a ye.

³⁸ Y bɛɛba tẽngẽ la y na n pa gilli; bɛɛba tẽng n na n dɩ-y zãnga.

³⁹ Sẽn põs-b bɛɛba, b yel-wẽna wẽnem n na n lɛɛg n kʋ-ba. La ka na n yɩ bãmb mens yel-wẽna yĩng bal ye, na n naaga ne b ba-rãmb yel-wẽna.

Baas neere

⁴⁰ Daare b na n waa n baas n deeg b kongre la b ba-rãmb kongre, b na n wa n deeg tɩ b paooga maam, tɩ b zẽka b zug ne maam,

⁴¹ la rẽ la mam me yik zabre ne ba n tall ba n kẽes b bɛɛba tẽngẽ. Daar bɩ b wa yik n boog b zẽk-m-menga la b reeg b yel-wẽna sɩbgre.

⁴² M na yaool marsã n tẽeg zood ning m sẽn yõg ne a Zakoob, ne a Izaak, ne a Abraam. M kõn yĩm m tẽnga yell ye.

⁴³ Rũnda wã m nongame tɩ b yi n bas tẽnga t'a vʋʋse, m nongame tɩ b nams n yao b beegre. Sɩda bãmb n zãgs tɩ b kõn tũ m dog-n-miki, bãmb n yeel tɩ m noya yaanda b sũuri.

⁴⁴ La ba b sã n wa be b bɛɛba tẽngẽ, m ka na n yi b poorẽ ye, m kõn yeel tɩ m sũur yaanda ne ba n kʋ-b zãng ye; m kõn sãam m zooda ne b ye, tɩ maam la b Wẽnnaam.

⁴⁵ M na n tẽegame tɩ Ezipt yiib wakato m yõga zood ne-ba tɩ b bɛɛba getẽ la b kũmd sũuri. M maana woto tɩ b bãng tɩ maam la bãmb Wẽnde, rũnda la beoogo.»

⁴⁶ Woto la Naaba-Wẽnd gom ne a Moyiiz noore, Sinayi tãnga zugu, n wilg b sẽn yals bãmb ne Israyɛl kamba sʋka, n wilg b sẽn tog n dɩk sor ninga, n wilg b noya la b rog-n-miki.