Maan‑kʋʋre 25 - SEBR SÕNGO

Tẽnga vʋʋsg yʋʋmde

¹ Soaala-Wẽnd yeela a Moyiiz Sinayi tãnga zugu

² t'a wilg Israyɛl kamba woto: «Y sã n wa kẽ tẽng ning m sẽn kõt yãmbã, tẽnga na n vʋʋsa wakat kẽere, m waoogr yĩnga.

³ Yʋʋm a yoob pʋgẽ, bʋd f pʋʋgo, yolem f bugsuntundu, tigs b sẽn kõt-fo.

⁴ Yʋʋmd a yopoe soaba, tẽnga na n vʋʋsame, a na n vʋʋsa Soaala-Wẽnd yĩnga. Da bʋd f pʋʋgo, da yolem f bugsuntund ye.

⁵ Tigsg kibs ka na n zĩndi tɩ alkama ka na bʋde la bugsuntunda me wil ka na n yolem ye. Yaa tẽnga vʋʋsg yʋʋmde.

⁶ Yaa tẽnga sẽn na n wom a toore, a vʋʋsga yʋʋmde la fo na n dɩ, foo ne f rakõore, f roog-biiga, f tʋʋmd-tʋmda, sãan sẽn nok foo, neb niyns fãa sẽn be-b ne foo.

⁷ Sã n ya rũmsã, yir la weoog rũmsi, b rɩ b sẽn paam fãa.

Pis-nu yʋʋmde

⁸ Sõd yʋʋm a yopoe naoor a yopoe, dat n yeelame tɩ yʋʋm pis-naas la a wɛ.

⁹ Kiuug a yopoe soaba, daar piig soaba, bɩ y kɩt tɩ b peeb baorgo, tɩ y tigim n kils Soaala-Wẽnde. Na n yɩɩ sugra kosg da-kãsenga daare la baorga na n peeb tẽnga fãa pʋgẽ.

¹⁰ Y na n mooname tɩ pis-nu yʋʋmda yaa yʋʋm-sõngo la yaa tẽnga kamba fãa fãagr yʋʋmde. Na n yɩɩ tigri yãmb yĩnga. Ned kam fãa lebd n deega a ba vẽenem, ned kam fãa lebda a buuda sakẽ.

¹¹ Pis-nu yʋʋmda na n yɩɩ sũ-noog yʋʋmde; rẽ yĩnga y kõn bʋde, y kõn tigsi, la y sẽn ka yolem y bugsuntundã, y kõn fãs b biis ye.

¹² Pis-nu yʋʋmdã na n yɩɩ yʋʋmd sõngo la ka y tʋʋmna n na n dɩlg-y ye, yaa pʋtã sẽn wom b toorã, yaa pʋta sẽn wom yaarã n na n dɩlg yã.

¹³ Yʋʋmd kãng pʋgẽ ned kam fãa reegda a sẽn da so.

¹⁴ F sã n koosd bũmbu, bɩ f sã n daad bũmbu, wẽdg ka tog n zĩnd ye, yʋʋmd sõnga yaa bũmb sẽn tog n naag n geelge.

¹⁵ F sã n dat n da pʋʋg f to nengẽ, sõd n bãng yaa yʋʋm a wãn la pis-nu yʋʋmda loog yã. Sẽn koosda wã sõtame n bãng yaa yʋʋm a wãn la a na n kell n soog pʋʋgã tɩ yʋʋmd sõnga yaool n ta.

¹⁶ Yʋʋmd sõnga sã n ket n zãra, pʋʋga ligda me paasdame; yʋʋmd sõnga sã n pẽ, pʋʋga ligd woogdame. Geenda f sẽn na n tigs bũmb ning pʋʋgẽ wã n yaool n saag a ligdi.

¹⁷ Ned ba a ye da wẽd a to ye, la y fãa zoe Soaala-Wẽnd nifu, tɩ yaa maam la yãmb Wẽnnaam, rũnda la beoogo.

¹⁸ Deeg-y m noya, tũ-y m dog-n-mikã tɩ woto y na zĩnd tẽnga pʋgẽ ne laafi.

¹⁹ Tẽnga na n woma a biisi tɩ y rɩ n tɩge, tɩ y vɩɩnd ne bãane.

Wẽnd pʋlemde

²⁰ Y na n wa yeelame: ‹Yaa bõe la d na n dɩ yʋʋmd a yopoe soaba, bʋdb sẽn ka na n bʋde tɩ tigsg ka na n tigsi?›

²¹ M pʋlemd-y lame tɩ yʋʋmd a yoob soab na yɩ bark yʋʋmde, la yʋʋmd kãnga y na tigs sẽn sek yʋʋm a tãab dɩɩbo.

²² Yʋʋmd a nii soaba y na n bʋdame la yaa kood kʋdga la y na dɩ la y na n le rɩ kood kʋdg yʋʋmd a wɛ soaba, n tãag tigsgu.

Pʋʋg lebda a soaba

²³ Ned ka koosd a pʋʋgo, y tẽngẽ wã, t'a yi a soolmẽ zãng ye, tɩ tẽnga yaa mam tẽnga la yãmb yaa mam sãamba la m noakense.

²⁴ Sẽn koos-a a pʋʋg tõe n le wa raa-a lame.

²⁵ F saam-biig a ye n dɩ ned samde, la samda yaoob yĩnga a kong n koosa a pʋʋg n na n paam ligdã, ad-y yaa sẽn pẽ-a yẽnda ne rogem n yɩɩdã, n wat n da pʋʋga sẽn koosã, t'a leb buuda soolmẽ.

²⁶ Fo yaa naong soaba n koos f pʋʋg la f ka tar ned sẽn pẽ foo ne rogem sẽn tõe n wa ra pʋʋga t'a kell n pa buuda soolmẽ ye, ad yaa fo meng n na n maane f sẽn tõe n le soog pʋʋgã.

²⁷ F na n sõda yʋʋma sẽn loog pʋʋga koosg tɛka n yao yʋʋm kãens ligdi la f soog f pʋʋgo.

²⁸ Fo sã n ka tar sẽn na n yao n deeg pʋʋgã, sẽn daa pʋʋgã n na n kell n soog-a n tãag yʋʋmd sõngã. Yaa yʋʋm sõnga pʋgẽ la pʋʋga lebd a pipi soaala nugẽ.

²⁹ Ned sã n koos roogo sẽn be tẽng lal-gũbri pʋgẽ, yaa a koosga yʋʋmd pʋgẽ la a tõe n yao n le reeg-a. Yaa yʋʋmda pʋgẽ bal la roogo tõe n leb a soaba.

³⁰ Dɩlla sã n maan yʋʋmde t'a pa le wa, rooga lebgda sẽn da-a wã ne a kamb soolem. Ba yʋʋmd sõnga sã n ta, yẽ n ket n so-a.

³¹ Sã n yaa roog sẽn ka be tẽnga lal-gũbr pʋgẽ, roog sẽn be tẽn-bõonesẽ, b tõe n le ra-a lame, la sã n ta yʋʋm sõngã, a lebda b pipi soaala.

³² Sã n ya tẽns niyns a Levi kamba sẽn kẽedã, yaa wakat buud fãa la b tõe n yao n le reeg b roogo.

³³ Sã n yaa a Levi biiga n da yirã n kẽ, yʋʋm sõnga sã n ta, yẽ me lebs yirã a soaba la a leb a zakẽ, a leb a tẽngẽ, a me soolmẽ. A Levi kamba tẽnse yaa a Levi kamba soolem, ba b sã n tɩ naag ne Israyɛl kamb a taaba.

³⁴ Pʋta sẽn pẽ ne a Levi kamba tẽns ka tõe n koos ye tɩ bãmb n so-b wakat buud fãa.

Naong rãmb pengre

³⁵ F saam-biig n be ne foo la naong waa n kẽ-a lame t'a lebg f sam-dɩta, da bas-a ye. Ba a yaa sãana, ba a noka tẽng a to, kell n sõng-a.

³⁶ Da bao n dɩ a yõod ye. Zoe Wẽnnaam nif n bas-a t'a vɩɩnd ne foo.

³⁷ Da peng-a ligdi, n dat t'a wa yao ne roagl ye; da kõ-a rɩɩb n yet t'a wa lebs tɩ yɩɩg a sẽn deeg ye.

³⁸ Yaa maam la yãmb Wẽnnaam. Maam n yiis yãmb Ezipt tẽnga n na n kẽes y Kanaã tẽnga, n na n lebg yãmb Wẽnnaam rũnna la beoogo.

³⁹ F saam-biig sã n be ne foom n wa lʋɩ nimbãaneg pʋgẽ, t'a yet t'a na n koosa a meng ne foo n lebg f rakõore, da zã-a wa a lebga f yamb ye.

⁴⁰ A na n yɩɩ wala f tʋʋm-tʋmd bala, ned sẽn tʋmd n deegd yaood bala, bɩ f noaka la a na n tʋma ne foo n tãag yʋʋmd sõngã.

⁴¹ Rẽ marsã la f na n bas-a t'a loog ne a kamba. A leb a buudẽ n tɩ soog a ba rãmb sẽn bas ne-a pʋɩɩr ninga.

⁴² Mam sẽn yiis b rãmb Ezipt tẽnga, lebga mam tʋʋm-tʋmdba, b pa tog n koos-b wala yem-daad ye.

⁴³ Da zã-y bãmb toog ye, zã-y-ba la y zoe maam y Wẽnda nifu.

⁴⁴ F rakõapa, f zak kom-pugli na n yɩɩ tẽn-zẽng rãmba sẽn gũbg yãmba kamba. Yaa bu-zẽng ned bala n tõe n yɩ yãmb sõgne.

⁴⁵ Sẽn tõe n yɩ-b yãmb sõgen-kamba, yaa sãamba sẽn be-b ne yãmb kamba, bɩ bãmb sẽn so b rãmba kamba, sẽn dog la b vɩ yãmb sʋka, bãmb n tõe yɩ yãmb soolem.

⁴⁶ Yãmb loogr poore, yãmb kamb n na n soog-ba, daar fãa. Nin-bãmb buud n tõe n yɩ yãmb yem-daado. Sã n ya ne Israyɛl kamba, ka boto ye, ned kõn wẽoog a saam-biig ye.

⁴⁷ Sãan bɩ noak nug sã n tarẽ tɩ fo saam-biig sẽn be ne yẽnda yaool n tar a samde n kong n dɩk a meng n koos ne yẽnda, bɩ ne sãamb buudu,

⁴⁸ fo tõe n yaoome n deeg tẽnga biigã. A saam-biig fãa tõe n yaoome n deeg-a.

⁴⁹ Sẽn tõe n yao-b n deeg-a, yaa a ba kẽema bɩ a ba yao, a ba kẽem biiga bɩ a ba yao biiga, a buuda neda, bɩ a menga, a sã n tõe.

⁵⁰ A na n yẽsa ne sẽn daa yẽ wã, n ges yaa yʋʋm a wãna n be, a raaba tẽka n tãag yʋʋmd sõngã; ligda geels na n tũu yʋʋma sõore; b na geela wala a sã n da rɩkdẽ la yaood beoog sẽn vẽege.

⁵¹ Sã n ket wʋsg tɩ yʋʋmd sõnga yaool n ta, a yao n fãag a menga me na n tũu yʋʋm kãens sõore.

⁵² Sã n ka le ket wʋsg tɩ yʋʋmd sõnga ta, a geta sẽn keta sõore, n yao n fãag a menga.

⁵³ Na n geelame wala a sã n da tʋmd n deegda ligd beoog sẽn vẽeg fãa. B ra zã-a a yaar ye, b ra namsd-a tɩ fo sĩnd n getẽ ye.

⁵⁴ Yãmb saam-biiga sã n ka paam tɩ b yao n deeg-a, a gũ yʋʋmd sõngã n paam a menga, yẽ ne a kamba.

⁵⁵ Israyɛl kamb sẽn tõe n yɩ ned ninga sõgne, yaa maam bala. Yaa maam n yiis-b Ezipt tẽnga. Yaa maam bal la bãmb Wẽnnaam.