Maan‑kʋʋre 24 - SEBR SÕNGO

Noya a taaba

¹ Soaala-Wẽnd yeela a Moyiiz

² t'a wilg Israyɛl kamba tɩ b wa ne oliviye kaam sẽn ya yɩlemd menga. Yẽ la b na n tall n yõgend zaabr fãa sãnem fitila Soaala-Wẽnd doogẽ.

³ A Aarõ na n ninga sãnem fitil kãsenga sɛka roogẽ, peenda sẽn lill kuga walsa koglga taoore. Fitila na n wida m taoor zaabr n ta yibeoogo. La rẽ yaa noor sẽn kõn teem abada f yagensa yĩnga.

⁴ A Aarõ na n yõgna sãnem fitila t'a wit yʋng fãa Soaala-Wẽnd taoore.

Bur sõma

⁵ Dɩk alkam zom n wẽ bur gils piig la a yiibu. Bur fãa yaa zom wamde.

⁶ Fo na dogl-b-la a yoob-yoobe, zĩis a yiibu, sãnem roagendga zugu, Soaala-Wẽnd taoore.

⁷ Rɩgl tɩdare meng menga bura zugu n paase. Tɩdar kãng la b na n wa yõog m yĩnga, bura zĩigẽ wala tẽegr bũmbu.

⁸ Yaa vʋʋsga raar fãa la bur kãens na n wa rɩgl m taoore. Israyɛl kamba na n waa ne ba wala zood sẽn kõn sãam kaseto.

⁹ B na n yɩ-la Aarõ ne a kamba soolem la yaa zĩ-sõngẽ la b na n dɩ-ba, wala kũun sõngo b sẽn paam Soaala-Wẽnd pʋɩɩrẽ. Yaa noor sẽn kõn teem abada.

Wẽn-tʋʋs sɩbgre

¹⁰ Daar a ye zabr n zĩnd sika pʋga. Yaa Israyɛl biig menga n zab ne Ezipt tẽng rao biiga. Ezipt tẽng neda rog-a-la ne Israyɛl bi-pugla sẽn boond tɩ Selomit. A Selomit ba la a Dibri, Dã sakẽ neda.

¹¹ A Selomit biiga waa n wẽename n pʋd Soaala yʋʋr ne paoogre. B tall-a lame n wa a Moyiiz taoore.

¹² B bao zĩig n paalg-a n gũud Soaala-Wẽnd koɛɛga.

¹³ Dẽ la Soaala-Wẽnd yeel a Moyiiz:

¹⁴ «Kɩt tɩ b yiis sẽn sãama Soaala-Wẽnd yʋʋrã we-kɛɛnga. Yeel neb niyns fãa sẽn wʋm a gomdã tɩ b rɩk b nus n tik a zugu la rẽ poor bɩ Israyɛl kamba fãa laba ne kuga.

¹⁵ La gom ne Israyɛl kamba n kõ-b noor kãnga: Ned ninga fãa sẽn tʋʋsa Soaala-Wẽnde, a tʋka yell a zugu.

¹⁶ Ned ninga sẽn sãama Wẽnnaam yʋʋre, toga ne kũum la yaa Israyɛl zãma wã n na n laba ne kuga. Sẽn tʋʋs-a Soaala-Wẽnde, a yaa tẽnga biig bɩ sãana, b kʋʋd-a lame.

Nif n dond nifu, tɩ yẽnd dond yẽnde

¹⁷ Ned sã n kʋ a to, sẽn ya ned ninga fãa la a kʋ yã, yẽ me tog n kiime.

¹⁸ Ned sã n wẽ rũng n kʋ, a tog n yaoo rũng sẽn vɩ. Yaooda sẽn ki wã ne rũng sẽn vɩ.

¹⁹ Ned sã n pogl a saam-biiga, bɩ b pogl-a n lebse.

²⁰ Kaoogdame n dol sẽn kaooge. Nif ronda nifu tɩ yẽnd dond yẽnde. Wẽng ninga fo sẽn maan f to wã, wẽng kãng me la b lebsd foo.

²¹ Ned sã n wẽ rũng n kʋ, a yaoodame n dole; sã n ya ninsaal la a kʋ yã, b tog n kʋʋ yẽ me.

²² Yaa sãana, yaa tẽngen-neda, yõor zema yõore la maam la yãmb Wẽnnaam, rũnda la beoogo.»

²³ A Moyiiz deng n wilga Israyɛl kamba woto, dẽ poore, b yiisa we-kɛɛnga sẽn da sãama Soaala-Wẽnd yʋʋrã n lab-a ne kuga. La woto b maana wala Soaala-Wẽnd sẽn da wilg a Moyiiz.