Maan‑kʋʋre 20 - SEBR SÕNGO

Waoogra toga ne Naaba-Wẽnd bala

¹ Wẽnnaam yeela a Moyiiz

² t'a wilg Israyɛl kamba woto: «B na n kʋʋ Israyɛl biiga bɩ Israyɛl noak fãa sẽn na n dɩk a biig n kõ a Molɛk. Tẽnga rãmb na n lab-a-la ne kuga.

³ Mam meng na n yika ne yẽ soaba la m na n yiis-a-la Israyɛl buudẽ, t'a rɩka a biig n kõ a Molɛk, n yaool n na n lɛɛg n wa m waoogr do-sõnga pʋg ne rẽgdo n paoog a Soaala yʋʋre.

⁴ Tẽnga rãmb sã n ka rat kʋ ned ninga sẽn dɩk a biig n kõ a Molɛk n maand wa b ka yãend bũmbu,

⁵ yaa maam n na n yik ne nin kãnga, ne a zak rãmba, n yiis-a Israyɛl buudẽ, yẽ la neb nins fãa sẽn naag-a n waoogd wẽn-naand a Molɛk.

⁶ Ned ninga sẽn na n pʋg kɩɩmse, la yam dãmba n bas maam, m na yik zabr ne yẽ soaba n yiis-a m buudẽ.

⁷ Dɩk-y sõmblem sore n yɩlg zãnga tɩ y rũnda la y beoog Wẽnda la maam bala.

⁸ Reeg-y m noya, vɩɩnd-y wala m sẽn wilg-y tɩ y sõmblema yita maam y Wẽnda nengẽ.

⁹ Dɩlla ned ning fãa sẽn na n kãab a ba bɩ a ma beedo, tog n kiime. A sẽn kãab a ba bɩ a ma wã, yaa a meng n bao a kũum.

¹⁰ Rao ninga sẽn maana yoob ne tẽngen-pag sẽn tar sɩda, bãmb b yiiba fãa tog n kiime.

¹¹ Rao fãa sẽn maana yoob ne a ba paga, ninga a ba yãnde. B yiiba fãa, raoa ne paga, tog n kiime; bãmb n bao b zɩɩm daagre.

¹² Ned sã n yo ne a bi-paga, yaa bãmb b yiiba fãa la b tog n kʋ. B maana wɩɩbdo n bao b kʋʋbo.

¹³ Rap a yiib sã n maan wɩɩbd ne taaba b yiiba fãa tog n kiime, b wɩɩbda yĩnga, la yaa bãmb n bao b zɩɩm daagre.

¹⁴ Ned sã n kẽes pag ne a ma, a maana yel-beedo. Yẽ ne pagb a yiiba fãa yõogda bugum la woto, ned sẽn sãamd y tẽnga yʋʋr kõn vɩɩnd yãmb sʋk ye.

¹⁵ Ned sã n wɩɩb ne rũnga, b kʋʋda bãmb b yiib fãa.

¹⁶ Pag me sã n wɩɩb ne rũnga, b kʋʋda bãmb b yiiba me, la bãmb n bao b kũum.

¹⁷ Ned sã n dɩk a tão n maan a paga, la b yaa ba a ye bɩ ma a ye, b maana wɩɩbdo la neb a yiiba fãa tog n yiisa buudẽ, buuda fãa taoore, tɩ b sẽn maan woto wã b tʋka yell b zugu.

¹⁸ Rao sã n kẽ pag roogẽ a kiuug wakato, la b yiiba fãa tara kiuuga pukr kaseto, b tog n yiisa b fãa buudẽ.

¹⁹ Sẽn kẽe-a ne a ma-bila bɩ ne a ma-kãsenga, sẽn kẽe-a ne a pʋgdba, yaa neb a yiibã n tʋk yell b zugu, b sẽn ya buud a ye wã yĩnga.

²⁰ Rao ning sẽn kẽeda ne paga, a ba kẽem bɩ a ba yao paga, luka a ba bãongo, a tʋka yell a zugu la b yiiba na ki n ka rog biig ye.

²¹ Ned ninga sẽn dɩka a kẽem paga bɩ a yao paga, maana sẽn kisi, a luka a kẽem bɩ a yao bãongo la b na n kiime n ka rog biig ye.

²² Reeg-y m noya, m dog-n-mikã, tũ-y-ba. Woto tẽng ning m sẽn na n kõ yãmba kõn maan waa a ka mi yãmba, n wʋk-y n lob ye.

²³ Da tũ-y neb niyns m sẽn digd yãmb taoora dog-n-mik ye. Yaa b sẽn maan wɩɩbd ka tɛka la m sũura sẽn yaal ne-bã.

²⁴ Yaa rẽ la m sẽn kãabe tɩ yãmb n na n soog b tẽnga; mam meng m toor n na n kẽes yãmb bĩisim la sɩɩd sẽn zoet zĩig ninga. Yaa maam, n welg yãmb toore la maam la y rũnda la y beoog Wẽnde.

²⁵ Bãng-y n welg rũms niyns bɩ luiili niyns maoong sẽn tat m yam, n welg-b ne rũms niyns bɩ luiili niyns maoong sẽn pa tat m yam. Woto mam me yam kõn lak ne yãmb wala a sẽn lak ne rũms kãensa ye.

²⁶ Bas-y tɩ m soog y zãnga la yɩ-y sõma wala mam sẽn ya sõngã tɩ maam la y rũnda la y beoog Soaala la m welg-y-la toore tɩ y yɩ m neba.

²⁷ Rao bɩ pag sã n be yãmb sʋka n sõsd ne kɩɩmse la zĩn dãmba, bɩ b kʋ-a. B lob-b ne kuga, bãmb n bao b zɩɩm daagre.»