Maan‑kʋʋre 2 - SEBR SÕNGO

-2- Kũun sẽn ka rũng kũuni

¹ Ned sã n dat n kõ Soaala-Wẽnd kũuni, kũun sẽn ka rũnga, wala zom, zoma na n kalma ne kaam la tɩdare.

² B talld-a lame n kẽng maan-kʋʋdba, a Aarõ kamba, taoore. Yõngda zoma nug koore, n paas kaama la tɩdara zãnga. Maan-kʋʋda ningda rẽ fãa bugmẽ, maan-kugra zug, wala Soaala-Wẽnd pʋ-tẽer nekr bũmbu, la bugma rɩt-a lame t'a yũuga noog Soaala-Wẽnd sũuri.

³ Sẽn kellã, yaa a Aarõ ne a kamba soolem. Yaa pʋɩɩr sẽn ya sõng wʋsg la b reegda t'a yãka Soaala-Wẽnd meng rẽnnẽ.

⁴ Kũuna sã n yaa bũmb sẽn ningd wʋngẽ, a tog n yɩɩ zom sẽn nag ne kaam n yaool n ka ning bɩlle, n dõos wala miis-zũuri bɩ miis-paklga sẽn sõ kaam n lebg bugmẽ, n ka ning bɩll ye.

⁵ Sã n ya bõn-kɩʋʋngo la f kõt Soaala-Wẽnde, dẽ me yɩta zom sẽn nag ne kaam, n ka ning bɩlle.

⁶ Kũuna wesdame n dɩk kaam n pʋdg-a. Yaa kũuni sẽn ka rũnga la f kõ Soaala-Wẽnde.

⁷ Sã n ya bũmb sẽn dõosd laag pʋga, zoma naagda ne kaam.

⁸ F sẽn segl bũmb ning Soaala-Wẽnd yĩngã, f talld-a lame n wa kɩs maan-kʋʋdã t'a reeg-a n kolg maan-kugrã.

⁹ Maan-kʋʋda na n yãka pʋ-tẽer nekr pʋɩɩrã n yõog-a maan-kugra zugu t'a yɩ yũ-noog n noog Soaala-Wẽnd sũuri.

¹⁰ Sẽn kellã, yaa Aarõ ne a kamba soolem: yaa pʋɩɩr sẽn ya sõmb wʋsgo t'a yãka Soaala-Wẽnd meng rẽnnẽ.

¹¹ Zom sẽn tũnug kũun ning fãa tɩ y rat n dɩk-a n kõ Soaala-Wẽnde, bɩ b ra saag n lob-a bɩll ye. Y kõn saag bada n yõog bugmẽ, Soaala-Wẽnd yĩnga, rɩɩb sẽn ning bɩll bɩ sɩɩd ye.

¹² Y tõe n dɩk-a lame n kõ Soaala-Wẽnd wala kood dẽeng kũuni la ka tõe n yõog bugum, maan-kugr zugu, b yũ-noog yĩng ye.

¹³ F sã n tall bõn-koodr kũun n wa, tẽeg n wa ne yamsem; da yĩm n ning Soaala-Wẽnd kũuna yamsem ye, t'a yaa zood bũmbu. Yaa rẽ yĩnga la bõn-koodr kũun fãa naagda ne yamsem.

¹⁴ Sã n ya kood dẽeng la f wat n na n kõ Soaala-Wẽnde, kũuna na n yɩɩ ka-zut sẽn sẽ bugmẽ, bɩ kood paal zom pãrga.

¹⁵ Paas kaam la tɩdare, tɩ yaa kũuni.

¹⁶ La maan-kʋʋda na n yãka pʋ-tẽer nekr pʋɩɩre, zoma bilfu, kaama bilfu, tɩdara zãnga, n yõog bugum Soaala-Wẽnd yĩnga.