Maan‑kʋʋre 16 - SEBR SÕNGO

Sugr kosg ra-kãsenga

¹ Ad Soaala-Wẽnnaam sẽn yeel a Moyiiz, wakat ning a Aarõ kamb a yiiba sẽn beeg Wẽnd n yõog b yamleoog wisdu, bãmb taoorã, tɩ b kʋ-bã:

² «Yeel f kẽem a Aarõ t'a ra saag n kẽ sɛka roogẽ a sẽn dat wakat ning ye. A ra lɩk peen lilla poore, a ra kẽ Sõmblem pid sõmblema roogẽ, kuga walsa koglga ne a linga sẽn dɩg zĩig ninga ye. A sã n kẽed yaare, a tõe n wa kiime, m sã n tũ sawadgã n wa lik m meng ne m ziir, koglga linga zugu.

³ Ad-a Aarõ sẽn na n kẽ sɛka roog to-to: a wata ne loalga, yel-wẽnd sugr kosg maoong yĩnga la pe-raoogo, yũ-noog maoong yĩnga.

⁴ A yeelgda a Maan-kʋʋr fu-pɛɛlga, n ning kur-pɛɛlga, n sẽbg a sɛɛga, n bao peen-pɛɛlga n vil a zugu. Yaa bũmb sẽn ya sõng zãnga. A sooda koom n yaool n yeelg fu-bãmba.

⁵ A na n deega a Israyɛl kamba nengẽ boees a yiibu, yel-wẽnd dolb yĩnga, la pe-raoog a ye yũ-noog maoong yĩnga.

⁶ Maan-kʋʋd a Aarõ kɩta loalgã a meng yel-wẽna yĩnga, a zak yel-wẽnd dolb yĩnga, n yõk Wẽnd sɛɛga.

⁷ A Aarõ yalsda boees a yiibã Soaala-Wẽnd taoore, sɛka roog noore.

⁸ A na n bʋgame n bãng boees a yiiba sʋka boɛɛg ning sẽn na n yɩ Wẽnd dẽnna la a Azazɛl dẽnna.

⁹ A Aarõ kʋʋda boɛɛg ning sẽn ya-a Wẽnd dẽnna yel-wẽna dolb yĩnga.

¹⁰ Boɛɛg ning sẽn ya-a a Azazɛl dẽnna, b wata ne a vɩɩga, Soaala-Wẽnd taoore, la b dogenda yel-wẽna fãa a zugu n yaool n diga n kẽes weoogo.

¹¹ A Aarõ kʋʋda naafã, a meng yel-wẽna dolb yĩnga n kos sugri, a meng ne a zak yĩnga.

¹² A rɩkda laag n pids ne bug-saala sẽn yãk maan-kugra zugu, Soaala-Wẽnd taoore, a yãkda tɩdar zom, nug koor a yi, n tall rẽ fãa n kẽ peen lilla poore.

¹³ A na n ninga tɩdarã bugmẽ wã, Soaala-Wẽnd taoore, tɩ bug-zõosa lud kuga walsa koglga linga. Woto a kõn ki ye.

¹⁴ A na n yaool n yãka naafa zɩɩm ne a nug-bila m mes koglga lingã. A na n mes-a-la naoor a yopoe.

¹⁵ Dẽ poore a kʋʋda boɛɛga zãma wã yel-wẽn dolb yĩnga la a tallda zɩɩma n leb peen lilla poore n maan ne boɛɛga zɩɩm wala a sẽn maan ne loalga rẽnna, n yi n yaas, n mes zɩɩma koglga lingã, la koglga taoore.

¹⁶ A maanda woto n yõk Wẽnd sɛɛga Israyɛl tõdgre la a yel-wẽna zãng fãa yĩnga. A na maan woto me ne sɛka roogo tɩ Wẽnd paalga b meng yel-wẽn-maandb sʋka.

¹⁷ Dɩlla maan-kʋʋda sã n wa kẽed sẽka roogẽ n na n kos sugrã ned ba a ye da zĩnd be n tãag a yiib ye. A na n kosa a meng yel-wẽna sugri, n kos a zaka rãmb yel-wẽn sugri, n kos a Israyɛl kamba fãa yel-wẽna sugri.

¹⁸ A yitame n kolg maan-kugrã sẽn be Soaala-Wẽnd taoorã n kos a yɩlgre. A rɩkda loalga la boɛɛga zɩɩm n taag maan-kugra yɩdbã.

¹⁹ A tẽkda a nug-bil zɩɩmẽ n mes maan-kugrã naoor a yopoe, n pek-a ne Israyɛl kamba rẽgdo, t'a yɩlge, n lebg sõngo.

²⁰ Maan-kʋʋda sã n sɛ ne ro-sõngã, ne sɛka roogo, ne maan-kugrã, a kɩtdame tɩ b kolg ne boɛɛga a to wã.

²¹ A Aarõ dɩkda a nus a yiibã n tik a zugu n togs Israyɛl kamba fãa yel-wẽna, b tõdgra fãa, b beegra fãa. A sã n zɩlg boɛɛga ne neba yel-wẽna n sɛ, a baooda ned t'a pʋgd n digd-a n tees we-raoogo.

²² Yaa we-raoogẽ wã la boɛɛga na n tɩ menem ne a zɩɩbã. Boɛɛga sã n dɩg we-raoogẽ wã n sɛ,

²³ a Aarõ lɛɛgd n kẽe sɛka roogẽ, n yees futã a sẽn da yer sɛka roogẽ wã la a rɩgend-b-la be.

²⁴ Yaa ro-sõng pʋg la a na n so koom. Dẽ poore a lebd n yeelga a futã la a yitame n kʋ maoongo, yũ-noog maoong a meng yĩnga la neba yĩnga. A kota sugr a meng la buuda yĩnga.

²⁵ Maan-kugra zugu, a yõogda yel-wẽnd sugr kosga maoonga kaam.

²⁶ Sẽn dig a Azazɛl boɛɛg n kẽes weoogã sã n lɛɛg n wa, a rengd n peka a futu la a so koom n yaool n paam n kẽ a zakẽ.

²⁷ B sẽn kʋ boɛɛga la naafã yel-wẽn sugr kosg yĩnga n tall b zɩɩma n kẽ n mes ro-sõngẽ wã, b tald-b lame n yi we-kɛɛnga la b naagda b gãongã, b nemdã la b bĩndã n yõog bugum.

²⁸ Sẽn yõoga rũnga soab tog n peka a futu la a so koom n yaool n tõog n kẽ a zakẽ.

²⁹ Woto yaa noor sẽn ka tõe n teeme, yãmb yĩnga. Kiuug a yopoe soaba, raar piig soaba, y na n loe noore la y ka na n tʋm tʋʋmd ye, tẽnga biig wala sãana.

³⁰ Yaa baraar la b na n kos sugri tɩ y paam n yɩlge; Soaala-Wẽnd taoore, y ka le tar yel-wẽnd ba a ye.

³¹ Badaar na n yɩɩ vʋʋsg daare la no-loeere. Yaa noor sẽn kõn teem abada.

³² Maan-kʋʋd ning b sẽn taag a soab kaam la b kõ-a maan-kʋʋr naama t'a na n wa reeg a ba zĩiga, yaa yẽ n maand sugr kosg maoongã. A na n yeelga fu-peelse, fu-sõma.

³³ A na n yɩlga Soaala-Wẽnd waoogra ro-sõngã, sɛka roogo la maan-kugrã. Dẽ poore a yɩlgda maan-kʋʋdba la zãma wã.»

³⁴ Dẽ me yaa noor sẽn kõn teem abada. Yʋʋmd pʋgẽ, b yãkda daar a ye tɩ yaa a Israyɛl kamba fãa yel-wẽna sugr kosg daare. La a Aarõ maana wala Soaala-Wẽnd sẽn togs a Moyiiz.