Maan‑kʋʋre 14 - SEBR SÕNGO

Yĩng soab pekre

¹ Soaala-Wẽnd yeela a Moyiiz:

² «Ad noor ning yĩng soab sẽn tog n tũ a pekr daare. B talld-a lame n kẽng maan-kʋʋd nengẽ.

³ Maan-kʋʋda na n seg-a lame t'a nan ket we-kɛɛnga. A sã n ges n mik tɩ bãaga sãoogame,

⁴ a kɩtdame tɩ b bao, a yĩnga, luiili a yiibu sẽn ket n vɩ la sɩɩsg sẽn pa kisi. B na n paasa kʋk raoogo, monem, la tɩɩg a ye sẽn tar yũ-noog vão-killi.

⁵ A kɩtdame tɩ b kʋ luiil a ye tãnd rʋkẽ, rʋk sẽn pid ne koom sẽn yõng kʋɩlgẽ.

⁶ A na n yaool n dɩka luiil a to wã ne kʋka raoogo, la monema, la vão-killã, n los b sẽn kodg luiil ninga zɩɩmẽ.

⁷ A mesda bãada naoor a yopoe n yaool n wilg-a t'a pekame la a basda luiila t'a yɩk n looge.

⁸ Sẽn yɩlgd a meng ne a bãaga, pekda a futa fãa, n bao barg n põng a meng zãnga, n bao koom n so n lebg sõmbo. Dẽ poor marsã a kẽeda tẽnga pʋga la a pa tõe n yãg n kẽ a meng zakẽ ye, rẽnd dasem maan a yopoe.

⁹ A yopoe daarã, a kõogda a zoobdo, a toɛɛnga, a nin-kʋɩgdga, a tog n põnga a kõbd fãa. A sã n pek a futã la a pek a menga, a lebga yɩlemde.

¹⁰ A nii daare, a wata ne pe-bi raad a yiibu sẽn ka tar bãnde, n paas yʋʋmd yɛng pe-sɛdg sẽn ka tar bãnde, la zom wamde sẽn nag ne kaam n paas kaam lengre.

¹¹ Maan-kʋʋd ning sẽn na n pek bãada kɩtdame t'a yals sɛka roog noore, Soaala-Wẽnd taoore, yẽ ne a kũuna.

¹² A yãkda pe-bil a ye n kʋ yell manegr maoongo la a paasda kaama ne lengrã. A rɩkd-b lame n tees Soaala-Wẽnde.

¹³ A kʋʋda pesgã zĩ-sõng ning b sẽn kʋʋd rũmsã, yel-wẽnd sugr kosg yĩngã, la yũ-noog maoongo. La yell manegr ne sugr kosg maoong sẽn wẽnd taabã, ad-y rũnga sẽn kʋ yell manegr yĩngã na n yɩɩ maan-kʋʋda soolem. Yaa bũmb sẽn ya sõng wʋsgo.

¹⁴ Maan-kʋʋda tẽkda maoonga zɩɩm n taag bãada rɩtg tʋbre, a rɩtg nug-raoogo, a rɩtg nao-raoogo;

¹⁵ maan-kʋʋda reegda kaama lengre n pʋdg a goabg nugu.

¹⁶ Maan-kʋʋda tẽkda a rɩtg nug-bila kaama sẽn be a goabg nugã. A tẽkda kaama ne a rɩtg nug-bila n mes yĩnga soab naoor a yopoe Soaala-Wẽnd taoore.

¹⁷ A yãkda kaama sẽn ket a nugẽ n taag bãada rɩtg tʋbre, a rɩtg nug-raoogo, a rɩtg nao-raoogo, zɩɩma taagr poore.

¹⁸ Kaama sẽn ket a nugẽ wã, a rɩkd-a lame n tẽg bãada zugu. La Soaala-Wẽnd taoore a le maanda sugr kosga sẽn dat bũmb ninga fãa.

¹⁹ Dẽ poore maan-kʋʋda maanda yel-wẽnd sugr kosg maoongo bãada yĩnga t'a paam n peke. A baasda ne yũ-noog maoongo.

²⁰ Maan-kugra zugu, a rʋʋsda yũ-noog maoongã la kũuna, n maan sugr kosgo. Rẽ fãa sã n sɛ, bãada me peka zãnga.

²¹ Bãada sã n ya naong soaba n ka tar ligd tɩ seke, a wata ne pe-bil a ye bala, yell manegr pesgo. B rɩkd-a lame n tees Soaala-Wẽnde tɩ b maan sugr kosg sẽn dat tɩ b maana. A wata ne zom sẽn nag ne kaam n paas kaam lengre.

²² A le paasda wal a yiibu bɩ malwal a yiibu, a sẽn tõe n paam. Wall a ye bɩ malwall a ye yɩta yel-wẽnd sugr kosg yĩnga, a to wã yũ-noog maoong yĩnga.

²³ Yaa a nii daarã, a pekra raare, la a wat ne rẽ fãa, Soaala-Wẽnd taoore, sɛka roog noore.

²⁴ Maan-kʋʋda reegda pesgã sẽn na n kʋ yell manegr yĩngã, n paas kaama, a rɩkd-b lame n tees Soaala-Wẽnde.

²⁵ La a kʋʋda pesgã, a yãkda pe-bila sẽn kʋ yell manegr yĩnga zɩɩma n taag bãada rɩtg tʋbre, a rɩtg nug-raoogo, a rɩtg nao-raoogo.

²⁶ A pʋdgda kaama a nug goabga,

²⁷ la ne ka-kãnga a mesda ne a rɩtg nug-bila naoor a yopoe, Soaala-Wẽnd taoore.

²⁸ A tẽkda kaama n taag bãada rɩtg tʋbre, a rɩtg nug-raoogo la a rɩtg nao-raoogo, a sẽn zoe n taag zɩɩma zĩig ninga.

²⁹ A rɩkda kaama sẽn ket a nugẽ wã n bil bãada zugu la a kota Soaala-Wẽnd sugr a yĩnga.

³⁰ A na n yãka wall a ye bɩ malwall a ye, dẽ tũuda ne bãada sẽn tõog n wa ne a soaba,

³¹ n maan maoong yel-wẽnd dolb yĩnga, n dɩk a ye wã n maan yũ-noog maoongo, n naag ne kũun ning a sẽn tog n wa ne. Maan-kʋʋda kota sugr a yĩnga, Soaala-Wẽnd taoore.»

³² Woto la ned ning sẽn bẽed yĩng bãag tog n maane, a sã n ka tar fɩ n na n kɩse n paam pekre.

Rot yĩidu

³³ Soaala-Wẽnd goma ne a Moyiiz la Aarõ:

³⁴ «Y sã n wa ta Kanaã, tẽng ning m sẽn na n kõ-y tɩ y soogã, y sã n yãe beelẽ tɩ roog a ye lebga yĩid-yĩidu,

³⁵ bɩ rooga soab wa wilg maan-kʋʋda la a yeele: M yãeeme tɩ yaa wa m dooga tara bãaga.

³⁶ Maan-kʋʋda kɩtdame tɩ b yiis rooga teed fãa t'a yaool n wa sɩng rooga gesgo. Woto a kõn tõog n yeele tɩ sẽn ket a pʋgẽ wã yaa rẽgd ye. Dẽ poor marsã la maan-kʋʋda kẽed n gese.

³⁷ A rengd n gesa rooga sẽn tu bogdã, la a bãng b sã n yaa kẽeg-kẽega bɩ miuug-miuugu, n bãng b sã n tu n zulgame.

³⁸ Maan-kʋʋda lɛɛgd n yiime la kʋɩlenga noore, a wilgdame tɩ b ra le kẽ rooga pʋg ye.

³⁹ A lɛɛgd n waa a yopoe daarã n le gese la a sã n mik tɩ yaa wa lalsa wẽnema paasame,

⁴⁰ a kɩtdame tɩ b yãgs kug niyns piisma sẽn yĩ wã n tɩ lob we-kɛɛnga, rẽgda sẽn lobd zĩig ningã.

⁴¹ A kɩtdame tɩ b kõrs rooga pʋg lalsã n wʋk toma n tɩ lob tãmpʋʋrẽ we-kɛɛnga.

⁴² B baooda kug paala n lebs kʋda zĩigẽ la b maneg roogã n bolg zãnga.

⁴³ B sã n ning kug paalã n lebs n bolge, tɩ yaa wa bãaga ket n dabda taoore,

⁴⁴ maan-kʋʋda lebd n wa gesame la a sã n mik tɩ wẽnema sɩd paasame, a wilgdame tɩ yaa yĩid sẽn tõe n longe, la rooga lebga rẽgdo.

⁴⁵ Sẽn kete, ya b lub roogã, n wʋk a kugã, a toma, a raadã n tɩ lob tãmpʋʋrẽ, we-kɛɛnga.

⁴⁶ Rooga pʋgẽ kõoma sẽn waa n kisã, ned ninga fãa sẽn saag n kẽ, rẽgma a menga n ta zaabre.

⁴⁷ Sẽn kẽ-a be n gãande, tog n peka a futu. Sẽn kẽ-a be n dɩ, yẽ me tog n peka a futu.

⁴⁸ Rooga bolgr poore, maan-kʋʋda sã n lɛɛg n wa la a yãeeme tɩ bũmb ka paase, a wilgdame tɩ rooga ka le ya rẽgd ye t'a yĩida sɛɛme.

⁴⁹ Rooga pekr yĩnga, maan-kʋʋda na bao luiili a yi, kʋk raoogo, monem, tɩɩg a ye sẽn tar yũ-noog vão-killi.

⁵⁰ A kodgda luiil a ye tãnd laagẽ, sẽn pid ne kʋɩlg koom.

⁵¹ A rɩkda kʋka raoogo, tɩɩg a ye vão-killi, monema la luiil ning sẽn keta wã, n los pipi luiila zɩɩmẽ la koomẽ. A Mesda rooga naoor a yopoe.

⁵² Yaa woto la rooga na n yɩlg ne a yĩidu; yɩlgd-a-la ne luiila zɩɩm, ne kooma, ne luin-vɩɩgã, ne kʋka raoogo, ne tɩɩg a ye vão-killã, ne monema.

⁵³ Dẽ poore a basda luin-vɩɩga t'a yɩk n leb weoogẽ. A maanda sugr kosgo. La rẽ sẽn maan n sɛ, rooga ka le ya rẽgd ye.»

⁵⁴ Soaala-Wẽnd noora la woto, yĩng bãag poorẽ, rasempʋɩɩg poorẽ,

⁵⁵ fut bugd poorẽ la rot yĩid poorẽ,

⁵⁶ yũya, noada la yĩn-firseng poorẽ.

⁵⁷ Yaa noy-bãmba n wilgd sẽn tog n maan n pa yɩlemde, n ka rẽgem ye. Woto la noya sẽn get yĩng bãaga la a pekre.