Maan‑kʋʋre 12 - SEBR SÕNGO

Rogem poore

¹ Wẽnnaam yeela a Moyiiz

² t'a wilg Israyɛl kamba woto: Pag sã n dɩk pʋg n dog bi-ribla, a ges a meng wa rẽgdo dasem a yopoe pʋgẽ, wala a kiuug yãeeb wakato.

³ Dasem a nii daare, b kẽesda bi-pɛɛlga bãongo.

⁴ La paga na n gũu dasem pis-tã la a tã n paam n peke. A ra sɩɩs bũmb sẽn ya sõng ye, a ra kẽ Soaala-Wẽnd waoogra ro-sõngẽ, n taa a pekra daare.

⁵ A sã n dog bi-pugla, a yaa rẽgd wala a kiuug yãeebo la rasma na n tonga piig la a naase; paga na n gũu dasem pisoob la a yoobe n paam n peke.

⁶ A pekra raar sã n pidi, a biiga yaa rao bɩ paga, a talld-a lame n wa maan-kʋʋd taoore, sɛka roog noore, ne yʋʋm yɛng pesgo, yũ-noog maoong yĩnga, la malwall a ye bɩ wall a ye, yel-wẽnd sugr kosg maoong yĩnga.

⁷ Maan-kʋʋda deegda kũuna n kõ Soaala-Wẽnde la a kos sugri t'a tɩlg ne a rẽgdo. Woto yaa noore, pag sẽn tog n deeg, a biig rogem poore, a biiga ya bi-ribl bɩ bi-pugla.

⁸ A sã n ka tõe n paam ligd n da pesgo, bɩ a wa ne wal a yiibu bɩ malwal a yiibu tɩ b kʋ a ye, yũ-noog maoongo, n kʋ a to wã yel-wẽnd sugr kosg maoongo. Maan-kʋʋda na n kosa sugri t'a tɩlg ne a rẽgdo.