Maan‑kʋʋre 10 - SEBR SÕNGO

Noya a taaba

¹ A Aarõ kamba, a Nadab la a Abiyu, rɩka b tɩdar laase. Bugum la tɩdar zom la b ning b pʋsẽ. B taa Soaala-Wẽnd taoore n na n n wis-ba, la Soaala-Wẽnd yaool n da ka kos b rẽ ye.

² Dẽ la bugum me yi Naaba-Wẽnd taoore n zomb-ba la b kiime.

³ A Moyiiz yeela a Aarõ: «Soaala-Wẽnd da ka pĩnd n yeele: M datame tɩ sẽn kolgd-b maama bãng m waoogre, m datame tɩ m yʋʋra paam pẽgre buuda fãa taoore.» A Aarõ pa tõog n leok tɩ bũmb ye.

⁴ A Moyiiz boola a Mikayɛl ne a Elisafã, a Uziyɛl kamba, a Aarõ ba bil kamba, la a yeel-b lame: «Wa-y n dɩk-y y saam-biisã n zãag ne Soaala-Wẽnd waoogr do-sõngã, tall-y-ba n dig we-kɛɛnga.»

⁵ B kolgame n pil-b futu n tall-b n yi we-kɛɛnga, wala a Moyiiz sẽn da yeele.

⁶ A Moyiiz yeela a Aarõ ne a kambã, a Elazar la Itamar: «Da yidg-y y zoobdo la ra kẽes-y y fut n wilg tɩ y rɩta kʋʋr ye tɩ pa rẽ y na ki la y na tak Soaala-Wẽnd sũ-puur zãma wã zugu. Ad-y Soaala-Wẽnd bugma sẽn dɩ b rãmba kʋʋre, yaa neba taabã n na n kelem-a, ka yãmb ye.

⁷ Da zãag-y ne sɛka roog ye, ka rẽ y na ki, b zɛ yãmb ne naam kaam, ne Soaala-Wẽnd kaam.» La b maana wala a Moyiiz sẽn yeelã.

⁸ Soaala-Wẽnd yeela a Aarõ:

⁹ «Yãmb sã n wat sɛka roogẽ, foom ne f kambã, da yũ-y rãam buud ye tɩ woto y kõn ki ye. Yaa noor f kambã sẽn na n deeg wakat buud fãa.

¹⁰ Da yũ-y rãam y sã n tog n wilg sẽn ya sõmbo n bak ne sẽn ka sõmbo, n wilg n bak Wẽnd bũmbu la bõn-zaalle, n wilg bũmb sẽn dẽgemd ninsaala la sẽn ka rẽgemd-a.

¹¹ Da yũ-y rãam y sã n tog n zãms Israyɛl kamba m sẽn taas-y noy niynsã ne a Moyiiz noor ye.»

Maan-kʋʋdba pʋɩɩre

¹² A Moyiiz yeela a Aarõ ne a kamba sẽn keesã, a Elazar la a Itamar: «Rɩk-y zoma b sẽn tall n wa kõ Soaala-Wẽnde n keesã n maan bur sẽn ka ning bɩll ye la y rɩ-ba, maan-kugra sɛɛga tɩ yaa rɩɩb sẽn ya sõmbo,

¹³ la rɩɩba zĩig ka tog n yɩ yaar ye, ya zĩ sõngẽ bala, tɩ yaa Soaala-Wẽnd n yãk b meng pʋɩɩrẽ n kõt foo ne f kamba la rẽ yaa bãmb meng noore b sẽn kõ maam.

¹⁴ Rũng fãa a Israyɛl kamba sẽn kõ laafi kosg yĩnga tɩ b reeg a yãoogã la a ger n tees Soaala-Wẽnde, bãng-y tɩ y tõe n wãba nemd kãnga. Bao-y zĩig sẽn ya sõngo n wãb-a, foo ne f kom-dibli la f kom-pugli. Yaa pʋɩɩr sẽn yãk Soaala-Wẽnd dẽnnẽ yãmb yĩnga.

¹⁵ Gera b sẽn yãkã la yãoogã b sẽn naag ne kaama n tees Soaala-Wẽndã, bãmb me yaa foo ne f kamba soolem, b sã n dɩk ba n kõ Soaala-Wẽnd n sɛ. La rẽ yaa noor sẽn ka tõe n viigi, m sẽn paam Soaala-Wẽnd nengẽ.»

Noya a taaba

¹⁶ A Moyiiz waa n sokame n na n bãng b sẽn maan bũmb ning ne boɛɛgã b sẽn kʋ zãma wã yel-wẽnd sugr kosg yĩngã. A waa n bãngame tɩ b yõog-a-la bugum. Woto a sũur puuga ne a Elazar la a Itamar, a Aarõ kamba sẽn kellã.

¹⁷ A sok-b lame tɩ yaa bõe yĩng la b pa rɩ-a Soaala-Wẽnd waoogra zĩ-sõngẽ? Yaa bõn-sõng la b kõ yãmb n na n pek zãma wã rẽgdo, la b kos Soaala-Wẽnd sugri zãma wã yĩnga.

¹⁸ Bʋ-kãnga zɩɩma sẽn pa tall n kẽ rooga pʋga, yãmb da tog n dɩ-a-la Soaala-Wẽnd waoogra ro-sõngẽ, wala m sẽn da yeelã.

¹⁹ Ad-a Aarõ sẽn leoke: «Yaa yũ-noog la sugr kosg maoong la tõnd kõ Soaala-Wẽnd dũnna, la fo nee yell ning sẽn baas n pak-ma. M sũ-sãanga pʋgẽ, m na le tõog n noog m sũur Soaala-Wẽnd taoor ne maanda dɩɩb sɩda?»

²⁰ A Moyiiz wʋmame la a gesame tɩ leokra wẽnda sõmbo, la a reegame.