Maan‑kʋʋre 1 - SEBR SÕNGO

-1- Yũ-noog maando

¹ Wẽnnaam zĩnda sɛka roogẽ n bool a Moyiiz n yeel-a

² t'a wilg Israyɛl kamba woto: Yãmb nin-yend sã n wat ne bũmb n na kõ Soaala-Wẽnde, a tõe n waa ne rũm-bil bɩ rũm-bedre.

³ Sã yaa yũ-noog maoong la yãmb nin-yend dat n kʋ ne rũng sẽn ya kãsenga, bɩ rũnga yɩ raoogo la a bũmb ba a ye da kedb ye. B talld-a lame n wa sɛka roog noor n kõ Soaala-Wẽnde.

⁴ Kõata tikda a nug rũnga zug la Soaala-Wẽnd deegd-a lame wala kũun a sẽn kɩs n na n paam a yel-wẽna sugri.

⁵ B yaond n kʋʋ rũngã Soaala-Wẽnd taoore la maan-kʋʋdba, a Aarõ kamba, kõta Soaala-Wẽnd zɩɩma. B mesda zɩɩma n gilg maan-kugrã sẽn be sɛka rooga noore.

⁶ B sɩɩgda rũngã n bees-a.

⁷ Tɩ maan-kʋʋdba, a Aarõ kamba, tugl bugum maan-kugra zugu n ning raado.

⁸ La maan-kʋʋdba, a Aarõ kamba, rɩkda nemdã, zugã la kaama n dogl daada sẽn dɩt bugma, maan-kugra zugu.

⁹ B pekda yãada la karsã ne koom, tɩ maan-kʋʋdba reeg n los bugmẽ. Bugum n na n dɩ maoong kãnga zãnga, t'a ruk yũ-noogo sẽn tat Soaala yam.

¹⁰ Sã n yaa yũ-noog maoongo, la yaa rũm-bil la b rat n kʋ, pe-bila, bulla, rũnga na n yɩɩ raoogo, n ka tar bãnd ye.

¹¹ B kʋʋd-a-la maan-kugra goabga, Soaala-Wẽnd taoore, la maan-kʋʋdba, a Aarõ kamba, mesda zɩɩma n gilg maan-kugrã.

¹² B sɩɩgda rũngã n bees-a la maan-kʋʋdba dɩkda nemdã n paas zugã ne kaama n dogl bugma sẽn be maan-kugra zugu.

¹³ B pekda yãada la karsã ne koom, tɩ maan-kʋʋda yõog-b maan-kugra zugu. Bugum n na n dɩ maoong kãnga zãnga t'a yũuga noog Soaala-Wẽnd sũuri.

¹⁴ Sã n ya yũ-noog maoong la yaa bõn-yɩgdr buudu, la b rat n kõ Soaala-Wẽnde, wall bɩ malwall, la b na n kʋ.

¹⁵ Maan-kʋʋda rɩkd-a lame n kõ Soaala-Wẽnde, maan-kugra zugu la a tõsgda a zugã, n dɩk-a n los bugmẽ t'a rɩ; la a basdame tɩ zɩɩma sĩin maan-kugrã.

¹⁶ Dẽ poore a yãkda yoosengã ne bũmb ninga sẽn be a pʋgẽ n lob maan-kugra sɛɛga, zĩig ning tompɛglma sẽn dʋʋgdã, yaang sẽnẽ.

¹⁷ B na n wesg-a lame n dɩk-a zãnga n los bugmẽ, t'a yũuga noog Soaala-Wẽnd sũuri.