Kʋʋr yɩɩla 5 - SEBR SÕNGO

D le wa kẽ Soaala

¹ Tẽeg-y yɛl niyns sẽn paam tõndã, Soaala, tags-y la y ges paoogr ning b sẽn paoog tõndã.

² Tõnd buud pʋɩɩr lebga sãamb soolem, d dota lebga sãamb soolem.

³ Tõnd lebga kɩɩb-bi n ka tar ba ye. Tõnd ma rãmb lebga pʋg-kõapa.

⁴ D bulsa koom meng raada ne ligdi, raad lebga f sõd ligd n kɩse.

⁵ Zɩɩb la d bɛɛba palg d poore. D yɛɛ zãnga, la vʋʋsg kõn paam ye.

⁶ D tuta d nus Ezipt la Asiri n bõsd sẽn na n pids d pʋga.

⁷ Tõnd ba rãmba tʋma b tʋʋm kɛga n bas n looge, la tõnd n tʋk b wẽnema zɩɩbo.

⁸ Yemse n lebg tõnd soaalba la ned ka n fãagd tõnd b nusẽ ye.

⁹ Tõnd sã n baood dɩɩbo tõe n tũu ne d yõore, dẽnd d da zoe we-raooga sʋʋs ye.

¹⁰ Yaa waa b los-d-la wʋng pʋga, tɩ bugma fʋkd d yĩnga gãongo, yaa woto la koma zab ne tõndo.

¹¹ B maanda pagb pãng Siõ, n yõgd kom-pugli Zɩɩda tẽnsẽ.

¹² B luula kug-zĩidba, nin-kẽems pa yãend waoogr ye.

¹³ Ad-b sẽn dɩk neguus n tʋk kom-bɩɩba, tɩ kom-dibli tʋk raad n yõrdẽ.

¹⁴ Zĩig ning b sẽn da sõsd n manegd tẽnga yelle, nin-kẽemsa ka le tigimd taab be ye. Kom-bɩɩba yĩma b kʋnd zĩiga.

¹⁵ Sũ-noog sɛɛ zãng d sũurẽ. Kʋʋr yɩɩla n deeg d saooga zĩiga.

¹⁶ Tõnd naama pugl fõkame n lʋɩ tẽnga, tõnd zãmba d Soaala tɩ pak-do.

¹⁷ D sã n zi ne sũ-toogo, la d nina sã n moog ne yãbre,

¹⁸ yaa Siõ tãnga sẽn lebg vɩʋʋgo, n lebg we-baas gõob zĩiga.

¹⁹ Sã n ya ne yãmba, Soaala, y naama goeel vigla yʋʋm sẽn ka sɛɛb yĩnga.

²⁰ Boe tɩ y na n yĩm d yell zãnga? Y na n bas-d-la zãng bɩ?

²¹ Wẽnemd-y tõnd sũurã n tees yãmba, Soaala, tɩ d sɩd lɛɛg n wa kẽ yãmba. Wa-y n kõo tõnd pĩnd zamaan noogã!

²² Y na n sɩd bas-d-la zãng bɩ? Y sũura na n sɩd puuga ne tõnd woto fãa bɩ?