Kʋʋr yɩɩla 4 - SEBR SÕNGO

Zerizalɛɛm wãabo

¹ Bõe tɩ sãnema sẽn yɩlg menga ka le yãgd wa pĩnda? Bõe tɩ b yiis kug neeba n lob soya zutu?

² Maana a wãna tɩ Siõ kamba sẽn da zem sãnem menga, maana a wãn tɩ b get-b wa tãnd laase?

³ We-yũusa meng nonga b kamba n kõt-b bĩisim tɩ b yẽsemdẽ. Mam bi-pugla bala n lebg pʋ-to-neda wala zĩ-pɛɛlẽ na-neoongo.

⁴ Ko-yũud kɩtame tɩ bi-pɛɛlg zelemd tabend a ragsendaka. Kom-bɩɩba kota buri la b ka kõt-b ba sẽn paood ye.

⁵ Sẽn da rɩt-b rɩ-nood pãsd n lʋɩta sor zugu. Sẽn da wub-b nanams zakẽ vɛɛsda tãmpʋʋr n baood rɩɩbo

⁶ Mam buuda bi-pugl beegr yɩɩ wẽnga n yɩɩd Sodom dẽnna. Tẽng kãng wãa nif kamsg pʋgẽ, ka tũ ne naong ye.

⁷ Pĩnda na-komsa da yaa yɩlma, laong peelem ka ta b rẽnd ye, b yĩn-gãonga ra peela wa bĩisim, b yĩnga ra moosa wa rulg-lɛlma, b zɩ-wĩisa ra rʋra yɩng, kẽeg-kẽega.

⁸ La ad-b sẽn sob marsã wa bug-vũundu; ned seg-b sor zug marsã a kõn le bãng-b ye. B yĩnga gãong tabla b kõaba; b kʋɩɩ n weglma wa ra-peoko.

⁹ Sẽn ki-b kũ-miuuga são sẽn ki-b koma! B são sẽn ki-b rɩɩb kaalem yĩnga!

¹⁰ Ma rãmba ne b nonglma baas n dʋgda b kamb b toore. B kamb n lebg b rɩɩbo, m buuda bi-pugl namsga wakato.

¹¹ Soaala basa b sũur t'a fudgi, b bas-a lame t'a fudg n daag zãnga. B ninga Siõ bugum la a ka na n dɩ n kees bũmb ye.

¹² Dũni wã dĩm dãmb da pa tẽeda, talg ba a ye me ra pa tẽeda tɩ bɛ bɩ zab-zabd na tõog n tũ Zerizalɛɛm kʋɩlensã n kẽ a pʋgẽ ye.

¹³ La rẽ fãa yaa bãngdba yɛl kɛga yĩnga, yaa maan-kʋʋdba tʋʋm beeda yĩnga, tɩ tẽnga pʋgẽ b raaga pʋ-peelem dãmb zɩɩm.

¹⁴ B ra kẽnda tẽnga pʋgẽ wa zoeense, n kõd ne zɩɩm, tɩ b fut ra ka le tõe n sɩɩs ye.

¹⁵ Woto b sã n kolgdẽ, b ra tãsd-b lame: «Loog-y n bao zĩiga, bõn-dẽgdã, loog-y la y ra sɩɩs-d ye!» B zoetame n ka mi b sẽn na n kẽẽ ye la bu-zẽmba sã n yãend-ba, b yetame: «B ra saag n kaoos tõnd sʋk ye!»

¹⁶ Yaa Soaala meng n sẽeg-ba n ka rat tɩ b nin le yãend-b ye, la yaa neba sẽn pa le sake tɩ bãngd bɩ maan-kʋʋd le paam waoogrã.

¹⁷ Tõnd yiiga d nin n da gũud sõngre, la kato! Sõngr ka wa ye. Tõnd da gũuda tẽng sẽn na n wa sõng-do, la tẽn-kãng rãmb ka wa ye.

¹⁸ Tõnd bɛɛba ra gũusda d yiibu, n gɩt d soy la d tigsg zĩisi. Tõnd zamaana loogame, d meneng wakat taame.

¹⁹ Sẽn digd-b tõnda tʋʋla, b tʋʋla wa yĩngr sɩlga. B riga tõnd tãms zutu, n gãneg b bẽdgo zĩ-pɛɛlẽ.

²⁰ Soaala-Wẽnd sẽn kõ a soab naam t'a lebg tõnd yõora gʋʋnda, tõnd sẽn da gomd a soab yell woto: «Yẽ maasem yĩnga d me yʋʋr na yi moogo, yẽ ne tõnd naaga taaba n kẽes bog-yɛng pʋga.»

²¹ Noog f sũuri Edom tẽnga, noog f sũuri Us bi-pugla! La bãng tɩ wamda me na n ta-y lame, y me na n yũ n gãeemame n kẽn y zaala.

²² Siõ bi-pugla, fo tʋʋm-beeda paama b sɩbgr zãnga la b kõn le tall-fo n loog yembd ye. Fo bãong marsã, Edom, la Soaala na n luki, fo n na n kolg n deeg f sɩbgre.