Kʋʋr yɩɩla 3 - SEBR SÕNGO

Saagr tõe n saagame

¹ Far wʋm-m lame tɩ Soaala pãb-m-la sũ-to-pãbre.

² B lʋɩɩsa maam b taoore n modg-m tɩ m kẽne, la ka yɩ vẽenemẽ, yɩɩ likẽ.

³ Maam la b yõkd pãbre beoog sẽn vẽege.

⁴ M yĩnga fãa bugame, m kõaba fãa pãb n kaoome.

⁵ Sũ-toog la pɛta n gũbg maam wa lalga.

⁶ Lik kãseng pʋgẽ la b gãneg maam, wala b sẽn minim n gãnegd kũum.

⁷ B meeme n gũbg-ma sẽn na n yɩ-la tɩ m yiib lebg toogo. Bãn-zɩsgo la b rɩk n balg-ma.

⁸ M tara yãbr n kot sõngre, la b pa reegd m kosg ye.

⁹ B peesa kug n yẽd m soya zãnga. Sor a to la m kong n dɩke.

¹⁰ B yɩɩ wa rũn-toaaga, mam yĩnga, n yɩ wa bõnyẽeg sẽn lam tʋgre, n gũudẽ.

¹¹ B kɩtame tɩ m vɩɩma lebg toogo, m yĩnga ka le tar gãbe, m koɛɛga me ka le yit ye.

¹² Tãpa rʋʋsa m yĩnga, maam la pɛɛma tees n tãoodẽ.

¹³ Bɛ wã yiisa a loka pɛɛma, la m lʋga la b tão n sãage.

¹⁴ Neba fãa tara maam n laadẽ, beoog sẽn vẽeg fãa maam la b paoogda.

¹⁵ B yũnug-m la bõn-tɩɩsenga. B pidsa maam ne sũ-toogo.

¹⁶ B kɩtame tɩ m yẽna wer kuga, b tab-m-la tom-pʋlempʋkẽ.

¹⁷ M vɩɩma zãaga ne laafi, sũ-noog lebga m sãana.

¹⁸ Woto wã m yeelame tɩ m ka le tar beoog tẽeb ye, m ka le gũud bũmb Soaala nengẽ ye.

¹⁹ M sã n tẽegd m pɛta, n tẽegd m sẽn ka tar sõsd-n-taagã, yaa wa zẽnem toaag la m venda.

²⁰ Rẽ la m tar tẽegr wakat fãa al tɩ m yam bondg m pʋgẽ.

²¹ M sẽn dat n tẽeg bũmb ninga la woto, bũmb ning tẽegr sẽn kõt m saagr la woto:

²² yaa Soaala nimbãan-zoeer sẽn ka be tɛkã, yaa b nonglem ne tõndã sẽn ka be sɛɛbã.

²³ Beoog sẽn vẽeg fãa pukda b nonglem, Soaala, ad-y y nonglma ka be sɛɛb ye!

²⁴ N-ye! M moondame tɩ Soaala la m arzɛka la rẽ yĩnga m teega bãmba!

²⁵ Soaala sõm bee ne sẽn teegd-b bãmba, ne sẽn baood-b bãmb ne b sũur fãa.

²⁶ Bas bʋʋre n gũ Soaala sõngre, tɩ rẽ n be neere.

²⁷ Sak n bas f yamleoog pʋgbo tɩ f nan paooda, tɩ rẽ n tõe n wa ne f yõodo.

²⁸ Bao zĩig n zĩnd sɩɩ, Soaala sã n wa n na n fɛɛs-fo.

²⁹ Sulg f meng zãng Soaala taoore n saagd b leokre.

³⁰ Tud f yɛgdga tɩ b wẽ-fo bas tɩ tʋʋda tʋʋ n yɛ.

³¹ Sɩda Soaala pa naag ne neb niynsi sẽn daagd ninsaal n bas zãng ye.

³² Ba b sã n sɩbgdẽ, b ket n zoeta nimbãanega, tɩ b nonglma labsame.

³³ Soaala pa ningd ninsaal yãnde b pa namsd ninsaal ne sɩbgre tɩ b sũur noomẽ ye.

³⁴ Y tẽedame tɩ Soaala pa ne bɩ? Yaa tẽnga neb zãng la y wool n pag roogo.

³⁵ Yaa zabre la y baood ne Yĩngr Soaala, y sã n get ninsaal wa bõn-yaalga.

³⁶ Y sã n maand kegre bʋʋd zĩigẽ, y tẽedame tɩ Soaala pa ne laa?

³⁷ Ãnda n gomd ne noor bala tɩ sẽn be zĩndi? Yaa Soaala!

³⁸ Ka Yĩngr Soaba noor gomd bala n yiisd yel-beed bɩ sũ-noog laa?

³⁹ Bõe poorẽ la ninsaal tõe n guglem ne Wẽnnaam? Bũmb zãnga a sã n ket n vɩ ne yõore t'a yel-wẽna yaool n ya ka tɛka?

⁴⁰ Bɩ d maneg n gese d soya la d lɛɛg n dɩk sor sẽn digd Soaala nengẽ.

⁴¹ D zẽk d yam la d sũuri n tees Wẽnnaam n tees Yĩngr Soabã.

⁴² Tõnd yɩɩ beegdba la tõatba rẽ n so tɩ y ra pa bas d taale.

⁴³ Yãmb kelga y sũ-puurã n digd tõnd la y kʋʋd tõnd tɩ sugr kaẽ ye.

⁴⁴ Yãmb baoo sawadg n lilli tɩ tõnd pʋʋsg ra tõog n ta-y ye.

⁴⁵ Dũni ninsaalba sʋka tõnd lebga sagdo tõnd n lebg tãmpʋʋre.

⁴⁶ Tõnd bɛɛba fãa pãsga b noya n kiigd tõnd beedo.

⁴⁷ Ad tõnd pʋɩɩr sẽn lebg a soaba: pɛlen-yɩka, rigbu, zɛɛbo la wãabo.

⁴⁸ M nina tara nintãm kiigri yel-beeda sẽn lʋɩ m buuda zug yĩnga.

⁴⁹ M nintãm tara rʋʋgre n ka yõkdẽ ye; pemsem ka le be m yĩng ye.

⁵⁰ M gũudame tɩ Soaala sulgi, b sulg n ges la b yãende,

⁵¹ n yãend yel-beed ninga sẽn lʋɩt kom-pugli wã zutu. A gesgo yaa bõn-toog ne maam.

⁵² Sẽn kis-b maam zaalma rigd-m lame n dat n yõk-m wa luiila.

⁵³ B pag-m-la vɩɩga bog-zulungẽ, n tol n bao kugri n maan linga.

⁵⁴ Kooma lima maam bõra, tɩ m yet tɩ m ki yã.

⁵⁵ M zĩnda bog-zulunga pʋga n bool yãmba.

⁵⁶ Y wʋma m sẽn yeel yãmbã: «Yoog y tʋba n kelg m siri la m boaala.»

⁵⁷ M kelmame n bool yã la y kolgame n yeel-ma: «Da zoe rabeem ye.»

⁵⁸ Soaala yãmb bʋʋme n sõng-ma, yãmb fãaga m yõore.

⁵⁹ Soaala yãenda neba sẽn maan m kegre, la b bʋ n sõng-m lame.

⁶⁰ Y yãenda b sẽn dok b sũur ne maam y yãenda b sẽn sed bũmb ning n na n sãam-ma.

⁶¹ Soaala, y wʋma b tʋy wã la b sẽn da rat m maan bũmb ning ne maam.

⁶² Y wʋma m zabd-n-taasa sẽn gomde, y nee sẽn be b yamẽ; b yikda ne maam beoog sẽn vẽege.

⁶³ Ges-y b sẽn maanda fãa, maam la b yɩɩnd n laadẽ.

⁶⁴ Soaala, maan-y ne bãmba wa b sẽn maan maama.

⁶⁵ Kidb-y y sũuri, n kãab b wẽnga.

⁶⁶ Pʋg-y-ba ne y sũ-puuri menes-y-ba saaga tẽngre.