Kʋʋr yɩɩla 2 - SEBR SÕNGO

Soaala rɩɩ beem ne Zerizalɛɛm

¹ Kato! Soaala yika ne sũ-puuri n na n sãam a Siõ neerem, n na n sãam a Israyɛl ziiri n sãam tẽnga ne wẽnd doogã. Soaala yika ne sũ-puuri n yĩm b ziira sẽn da pukd zĩig ningã.

² Soaala muma b nini n loog vugr bala ne b buuda sẽn da tar fãa. B sũura yikame tɩ Zɩɩda tãnsoben-dot na n wã. Naama ne a na-rɩtbã b luba rẽ fãa tẽng n tabe.

³ B sũ-puura pʋgẽ b menesa a Israyɛl ziira fãa. Bɛɛba taoore b ka wilg b nug pãng ye. Bug kãseng la b tugl a Zakoob pʋgẽ, la bugma ka rɩ n kees bũmb ye.

⁴ B rʋʋsa b tãp wala bɛ sẽn maande la tãpa yãagame n gũudẽ. B tʋma tõnd bɛ tʋʋmde, n kʋ, n sãam tõnd sẽn da get n pẽgdã. B sũura fudgame n waag-do, n yõog ro-sõngã la Zerizalɛɛm.

⁵ Soaala lebga wala a Israyɛl bɛyã sẽn vel a Israyɛl vugr bala, n menes tẽnga ne a ro-neebã; b wã-la a tãnsoben-dotã, n pids tẽnga rãmb gilli ne sũ-sãang la yɩɩre.

⁶ B pãrga a Israyɛl zẽeda yãgre, b pãba b tigsga zĩig n sarem. Soaala kɩtame tɩ b yĩm Siõ pʋgẽ, kibs la vʋʋsg daare. B sũ-kãbra pʋgẽ neb n paam yãnde: yaa dĩma menga la maan-kʋʋdba.

⁷ Maan-kugra lebga bõn-yũugu Soaala yĩnga. Wẽnd dooga lebga b sɩ-lakre. B basa na-yirã ne a lal-gũbrã bɛɛba nusẽ. Kɛleng n yit Soaala roogẽ la a sãta wala tigr daare.

⁸ Soaala ra ninga b yamẽ tɩ b na n wãa Zerizalɛɛm lal-gũbrã. B tẽega wĩiri n na n pãb n sarme, Bũmb ka yõbg b nuga ye. Lal-faoogã la lalga menga, bũmb ka pãb n keese, fãa naaga taab n ta tẽnga.

⁹ Tẽnga noor kʋɩlensa lʋɩɩme, kʋɩlensa pagdsa sʋʋga wa tẽngempiisim. Dĩma ne a kug-zĩidba, fãa lʋɩɩ bu-zẽmba nusẽ. Ned ka be n togsd Wẽnd sẽn dat ye; bãngdba mens ka le paamde tɩ Soaala gomd ne b ye.

¹⁰ Siõ bi-pugla sagendba zĩi tẽnga, b fãa zĩi sɩɩ wa mugsi. Tompɛglem la b yug b zutu; yaa kʋʋr fut la b yeelg n zĩẽ; Zerizalɛɛm kom-pugli nens sura tẽnga.

¹¹ M nintãma raaga m nini, m zĩime tɩ m sũur kãbdẽ, fãagr saagr yi-la m yamẽ tɩ m nee yel-beed ninga sẽn lʋɩ m buuda zugu. Tẽnga pʋga, ko-yũud kʋʋda kom-peelse.

¹² Kamba sokda b ma rãmba: Yɛ la d na n yãend rɩɩb n dɩ? Bãmb n kongd pãnga n kiid b ma rãmb nusẽ.

¹³ Zerizalɛɛm bi-pugla, m ka mi m sẽn na n yeel ye. Fo yella sɩd lebga toor zãnga. M ka ne m sẽn na n mak-f ne buud ning ye; fo zãr ne ned na tõog n bels-fo. Kato, siõ, f sẽn lʋɩ bok ning pʋgã ad-a yalma wa mogre. Tɩlgr ka ye!

¹⁴ F bãngdba sẽn taas foom koees niynsã yɩɩ zirẽ la yɛl faado. B pa wilg foom f kongr ye; dẽ n dag n na n sãoogẽ f yĩnga. B sẽn taas foo koees niynsa yaa zirẽ la belgre.

¹⁵ F lʋɩɩsa nooma so-loaadbã, dẽ la b kẽnd la b fɩɩnẽ, dẽ la b yĩgsda la sokdẽ: «Yaa foo la b sẽn boonde t'a neerem ka be to wã bɩ? Yaa foo la b boond yɛsa tɩ dũni wã fãa sũ-nooga bɩ?»

¹⁶ Fo bɛɛba fãa baooda f noore; b yĩiga b yẽna n tees-fo. B fɩɩndame la b yetẽ: «D vel-a lame n ka yãee n takem ye. Daar ning d sẽn da gũuda yaa n taame, a beooga yaa n vẽegame.»

¹⁷ Soaala pidsa b sẽn da kaoole, b pidsa b sẽn da yeele, b sẽn tʋlg al pĩnd-pĩnda taasame. B wã-f la zãng n pa kell ye. F sɩbgra nooga f bɛɛba sũuri, f bɛɛba wilg-m-menga tũu rẽ n paam pãnga.

¹⁸ Siõ bi-pugla, tees Soaala n kelme tees n kelem ne f pãng fãa. Bas f nintãma t'a kiigi, a kiig wĩndg la yʋngo. Da vʋʋs ne yãbr ye, da kʋɩɩs f nintãma ye.

¹⁹ Mi n yik n kelem wakat wakato, n yik n pids yʋnga ne f kaasgo. Zuk sẽn be f sũurẽ wã zãnga, Wẽnnaam f Soaala taoore. Zẽk f nus n yõk b sɛɛga tɩ f kom-bõonega paam n põse tɩ f ne b sẽn loogde, f nee b sẽn ki n dɩg soy wã zutu.

²⁰ Soaala, ges-y yã, ges-y neere; bãng-y sẽn ya ned ninga la y maan woto. Ges-y yel-beedo: pag sẽn tõe n lɛɛg n wãb a meng biiga, biig a sẽn doge la a sẽn da nonge! Ges-y b sẽn koot maan-kʋʋd la bãngda yãmb meng ro-sõnga pʋga.

²¹ Kom-bõonego la nin-kẽemba lagem n dɩga vɩla soy wã zutu. Y sũ-kãbra raare, kom-pugli la kom-dibli kii kũ-miuugu. Y sɩd sãamame la y ka sãam zem-zem ye.

²² Yãmb maana wa kibs n be, y boola m bɛɛba, m yagsa fãa. Y bool-b-la y sũ-puura raare, la mam ned ba a ye ka põs ye. Kamb niyns m sẽn da wub ne nonglem, bɛ wã kʋ-b-la fãa gilli.