Kowelɛt 9 - SEBR SÕNGO

Wẽnd n zãad fãa

¹ Ad-y m ka mag n bas bũmb kɛɛng ye, m dɩka fãa m yamẽ la sẽn lebg vẽenega, yaa tɩ Wẽnd bala n so nin-sõma wã vɩɩm la b tʋʋma. Ninsaalba ka mi sã n yaa nonglem bɩ beem la b na n sege. B ka tõe n bãng rẽ b toor ye.

² Ket n yaa bõn-yɛnga ne nin-tɩrg la nin-wẽnga, ne pʋ-peelem soaba la nin-kʋʋda. Bũmb pa welg sẽn deegd-b noya ne sẽn pa reegd-b ye, sẽn kʋʋd-b maand la sẽn pa kʋʋd-b ye, sẽn yaa nin-sõngo ne yel-wẽn maand ye, sẽn pʋlma la sẽn pa pʋlma ye.

³ Ninsaalba fãa yĩnga yaa so yɛng n tuki la rẽ me n wat ne yel-beedo. Ninsaalb maanda wẽnga, b raaba yaa wẽnga, la tallda woto n wa tãag b kũum.

⁴ Ned ninga sẽn ket vɩ bala n tar saagre. Baag sẽn vɩ sãoo bõnyẽeg sẽn ki.

⁵ Sẽn vɩ-ba miime tɩ b na n kiime. Sẽn ki-ba ka mi fɩ. B ka le gũud fɩ tɩ b rʋʋ yĩmb-tãnga.

⁶ B sẽn nong bũmb ninga, b sẽn kis bũmb ninga, b sẽn da zoet bũmb ning bõne, rẽ fãa sɛɛme. Bãmb ka le tõe n kẽes b toogo bũmb ning fãa sẽn maand saaga tẽngr ye.

⁷ Dẽ yĩnga, bɩ f rɩ f dɩɩbo, ne sũ-noogo, la f yũ f rãam ne yamleoogo, tɩ Wẽnnaam zoe n mi-la f pʋga, b zoe n mi-la f tʋʋma.

⁸ Daar fãa yeelg kibs futu la f zug da kong yũ-noog kaam ye.

⁹ Vɩɩnd f vɩɩm ne pag ninga f sẽn nongã, ka võor vɩɩma tɛka, Wẽnnaam sẽn kõ-f saaga tẽngre, tɩ rẽ la fo me pʋɩɩre, rẽ la f rolbo, f tẽng zug vɩɩm tooga rolbo.

¹⁰ Tʋʋmd ninga fãa f sẽn tõe n maane bɩ f maan-a wa f sẽn tõe tɛka, tɩ tʋʋmde, bɩ tagsgo, bɩ yam minim, bɩ yẽesem ka be kɩɩmkulgu f sẽn dabdẽ wã ye.

Zu-noog la zu-beedo

¹¹ M le yãenda yɛl a taab tẽng zug ka. Ad-y ka sẽn be-b tĩigã n wudgd n loog b taaba, la ka sẽn be-b sũuri n yɩɩd b taaba n maand raood zabrẽ ye. Ka sɩlem dãmbã n paamd n dɩlgd b vɩɩm ye. Sẽn tar-a rabaar ka lebgd arzɛk soab daar fãa ye. La mitba ka paamd waoogr daar fãa ye. Ned kam fãa tõe n sega zu-beedo.

¹² Ninsaal ka mi a zu-beed daar ye; wala zulung sẽn soosd n yõkd zĩma, tɩ bẽdgo yõkd luiila woto me la yell tiigda.

¹³ M le yãenda bũmb a to sẽn be n sek toagsga, yaa yam vẽenem tʋʋma dũni wã pʋgẽ.

¹⁴ Tẽn-bila a ye n da be t'a neba pa waoogẽ ye, tɩ dĩm kãseng wa kaoog zabre n gũbg-a, n me lals bɛd-bɛda n pag-a.

¹⁵ La naong soaba a ye sẽn tar yam n yaool da be tẽngã la a ra tõe n fãaga tẽngã, a yama yĩnga. La ned pa tags naong a woto soab yell ye.

¹⁶ Mam yetame tɩ yam yɩɩda pãnga la ad-b pa mi tɩ naong soaba bee yam ye, b pa waoogd-a-la b pa kelgd a goama ye.

¹⁷ Fo sẽn kelgd ned sẽn tar yẽesem la a gomd bʋg-bʋge, dẽ n são f sẽn kelgd dĩm sẽn porda ne yalemdo.

¹⁸ Yẽesem yɩɩda zab-teedo, tãbdo la logdo, la yel-wẽnd a ye tãa bala tõe n gɩdga bũmb wʋsgo manegre.