Kowelɛt 6 - SEBR SÕNGO

Naoor wʋsgo paoong zɩ n naf a soab ye

¹ Wẽng a to n be tẽng zug ka tĩ mam maag m meng n get-a la a rɩta ninsaala.

² Yaa wala ned a yembre Wẽnnaam sẽn tʋʋg-a ligdi, arzɛk la waoogre; bũmb ka le be a soab sẽn na n tʋlg ye. Tɩ Wẽnnaam wa yaool n pa bas a soab t'a soog la a rɩ ye; bãmb kɩtdame tɩ ned a to, tɩ sãan menga, wa reeg a zĩig n dɩ. Dẽ me yaa bõe n zʋʋg bir sobgo.

Yõ-woko

³ Ned sã n dog kom-dibli la kom-pugli koabga, n vɩ yʋʋn kʋʋma, tɩ ba a yʋʋma sõor sẽn zemb bũmb ninga, bɩ a ka tɩg ne sũ-noogo, la a ka paam tɩ b mum-a wa sẽn segde, ad-y pa-tar menga lɛɛg n são yẽnda.

⁴ Pa-tar sũ-noog n yɩɩd-a, t'a soos n waa likẽ, n le soos n leb likẽ, la yẽ me yʋʋr na n kell n paa likẽ.

⁵ A nif pa yãend wĩntoog vẽenem, a ka mi a sẽn ya-la, yẽ n são ne laafi vʋʋsgo,

⁶ n yɩɩd sẽn vɩɩnd-a yʋʋm tus a yi menga la a me ka yãend sũ-noogo. D sẽn tees n dabd zĩig ninga sɩd yaa zĩ yɛng bala.

Sũ-noog zãrem

⁷ Ned namsdame n na n paam n kõ a noore, t'a pʋg ket n kũmnẽ t'a pa tɩgd ye.

⁸ Sẽn tar-a yam me pa são yalem ye. A sẽn mi dabaare n lut a bãonga yõod la bʋgo?

⁹ F sẽn na n noog f sũuri ne f sẽn tare n são f sẽn na n bas tɩ f sũur pʋgd bũmb yõod sẽn ka yɩɩd bir sobg ye.

Saglse

¹⁰ Yaa daar zãra la b mi ninsaala t'a ka rũnda sãan ye. Ad-a kõn saag n wẽ no-koeemde ne sẽn yɩɩd-a ye.

¹¹ D sã n wẽed no-koeemde, la d goama meng sẽn maneg n lebgd gom-vɩɩdo. B yõoda la bʋgo?

¹² Ninsaal vɩɩma loogda wa sulunsuku. Ãnd n mi a sẽn tog n maan bõn-sõng ning n yɩɩda ne vɩɩm koɛɛg a woto buudu?