Kowelɛt 3 - SEBR SÕNGO

Bũmb fãa ne a wakato

¹ Bũmb fãa bee ne a a wakato, la saaga tẽngre, wakato me bee bũmb kam fãa yĩnga.

² Dogem bee wakato tɩ kũum me be wakato. Sel tɩɩg bee wakat tɩ võog tɩɩg me be wakato.

³ Kʋʋb bee wakato tɩ sãoogre me be wakato. Tus n lubi bee wakato tɩ meeb sɩngr be wakato.

⁴ Yãbr ne a wakat, laad ne a wakat, kʋʋr kɛleng ne a wakat, saoog ne a wakat.

⁵ Kug lobr ne a wakat, kug tigsgu ne a wakato. Yõk nug bee wakato, da yõk nug me be wakato.

⁶ Baoob bee wakato tɩ bao n kong me be wakato. Bũmb zãab bee wakato, a lobr me bee wakato.

⁷ Pãrg fuug bee wakato, t'a sẽeb me be wakato. Sĩndgu bee wakato tɩ goama me be wakato.

⁸ Zabr bee wakato, bas tɩ zabr sɛ me bee wakato.

⁹ Yõod bʋg la tʋʋmda soab rokd ne a tʋʋmna?

¹⁰ M nee tʋʋm niyns fãa Wẽnd sẽn kõ ninsaal t'a tʋme.

¹¹ Bãmb sẽn maan fãa zemsa ne a wakato. B basda ninsaala t'a ges zamaana sẽn tong taaba, n yaool n pa basd t'a wʋm bãmb sẽn maan bũmb niynsa võore, b sɩngre n tãag b baasgo.

¹² Mam miime tɩ ninsaal ka rat bũmb a to sã n ka a noog a sũuri la a pems ne vɩɩma yɩɩre.

¹³ Ned sã n dɩtẽ la a yũuda, a sã n paamd sũ-noog a tʋʋmd fãa pʋgẽ, a bãng tɩ rẽ yaa Wẽnd kũuni.

¹⁴ Mam miime tɩ Wẽnnaam sẽn yalse yalsa wakat fãa yĩnga. Bũmb ka be sẽn na n paase, bũmb me ka be sẽn na woog ye. Wẽnd kɩtdame tɩ b rigd rabeem b taoore.

¹⁵ Sẽn be zoe n zĩndame, la sẽn na n yɩ, zoe n zĩndame. Wẽnd na n sokame la b sɩbg sẽn looge.

Wẽnd rolbo

¹⁶ Ad-m sẽn le maag m meng n ges la m sẽn yãend tẽng zugu: wẽnem n dɩt naam tɩ sẽn da toga ne bʋʋd paalgr põsd bʋʋd toogo.

¹⁷ Tɩ mam yeel m sũurẽ: Wẽnnaam n na n kao nin-sõng ne nin-wẽng bʋʋdo, tɩ bũmb fãa bee ne a wakato la d yɛla toor-toorã na n waa Bʋʋda taoore.

¹⁸ Sã n ya ne ninsaalba, m tẽedame tɩ Wẽnd dat n fɛɛs-b lame la woto b bãngdame tɩ b yaa wa rũmsa bala.

¹⁹ La sɩd me, ninsaal baasgo ne rũng baasgo yaa a ye; yãoo soaba kida woto, tɩ yãoo soaba ki boto. Rũng ne ninsaala, bãmb b yiiba fãa yaa vʋʋsma a ye, la ninsaal sẽn yɩɩd rũng ne bũmb ninga, m sɩd ka ne a yõod ye, tɩ bũmba fãa yaa ka yõod ne ka yõodo.

²⁰ Bãmb b yiib fãa teesda zĩ yɛnga; fãa yita tomẽ la fãa lebda tomẽ.

²¹ Ned ba a ye ka tõe n yeele tɩ ninsaalba sẽn vʋʋsd n vɩ wã, bãmb vʋʋsma lebda yĩngri, tɩ rũmsa rẽnd lebd tẽng ye.

²² Mam neeme tɩ ninsaal sũ-noog yaa a kɩdem a tʋʋma yĩnga; tɩ rẽ yaa ninsaal pʋɩɩre. Ãnna n na n tall-a t'a lɛɛg n wa ges sẽn yõdg n maan a poorẽ?