Kowelɛt 1 - SEBR SÕNGO

Dũni wã ne a yɛla ka yõod ye

¹ Zerizalɛɛm dĩm a Daviid biig, a Kowelɛt, karen-saamb kõn yɛ ne kareng soab, a Kowelɛt, goam la woto.

² Ka yõod ne ka yõodo, a Kowelɛt n yete, ka yõod ne ka yõodo, bũmba fãa yaa ka yõodo sẽn pid ne ka yõodo.

Sebra tʋɩɩsgo

³ Ninsaal sẽn namsd a meng namsg ninga, wĩndga tẽngrã, bõe yõod la a rɩt a pʋgẽ?

⁴ Zamaan kãnga loogdame, tɩ zamaan a to wa, tɩ tẽng ket a zĩigẽ daar faa.

⁵ Wĩndg pukdame, wĩndg kẽedame: a sẽn yi zĩig ninga la a yãgd n dat n lebe.

⁶ Sobgo teesda rɩtgo n wẽneg n tees goabga, n gilim n gilim n le rɩk a sore, n ket n tar gilgri.

⁷ Kʋɩlsa fãa zoet n dabda mogrẽ, la mogre ka pit ye, tɩ kʋɩls ket n zoetẽ bala n tar kẽnde, b sẽn teesẽ zaamẽ wã, be la b le teesd rũnna.

⁸ Bũmba fãa wata ne yam yiisgu, bũmba fãa togs n sɛɛme. Nif kõn tɩg gesg ye, tubr kõn tɩg kelgr ye.

⁹ Sẽn yɩ pĩnda na n le yɩɩme, tɩ sẽn maan pĩnda le maane. Bũmb ka be saaga tẽngre t'a taar pa reng n zĩnd ye.

¹⁰ D sã n wa yãend bũmb n yeele: «Wã yaa yell sãanga,» d bãng tɩ reng n zĩnda al daar zãra, pĩnd zamaanẽ wã.

¹¹ Tõnd yĩmda d yaab rãmb sẽn yãende. Ad-y sẽn na n wa-b tõnd poorẽ wã ka na n bas bũmbu b yagensa sẽn na n yõdg n tẽeg n gomd ye.

A Salomo vɩɩma sẽn sege: sobg ne sobgo

¹² Maam, a Kowelɛt, mam yii Israyɛl Dĩm, Zerizalɛɛm tẽnga.

¹³ Mam maaga m meng ne yam kãsenga, n ges neere bũmb fãa sẽn maand saaga tẽngre. Mik waa! Yaa tʋʋm toog bala la Wẽnnaam rɩk n tãng ninsaalba. Yaa tʋʋmd sẽn dat gũusgu la b kõ Adem biisi.

¹⁴ Mam maaga m menga n ges bũmbã fãa sẽn maande, saaga tẽngre, la ade, bũmb ba a ye ka yõod ye, la yaa wudg n bir sobgo.

¹⁵ Sẽn golem ka tõe n yɩ tɩrga; sẽn yãk me ka tõe n le sõd n naag ye.

¹⁶ M tẽedame tɩ dĩm niyns fãa sẽn deng b maam Zerizalɛɛma, ba a ye ka paam yam vẽenem wala maam ye. M paama yam vẽenem la bãngr kãsenga vɩɩma poorẽ.

¹⁷ Mam maaga m menga n welg yam vẽenem soaba la gãeenga, n welg sẽn wẽnd yam bũmbu ne sẽn wẽnd yalemdo. M bãnga tʋʋmd ning m sẽn kõ m menga sẽn wẽnd a soaba: yaa wudg n bir sobgo bala.

¹⁸ Yam wʋsgo wata ne sũ-sãang wʋsgo. Sẽn paas-a a bãngre paasa a naongo.