Filip rãmba 3 - SEBR SÕNGO

Fãagr sore

¹ M saam-biisi, noog-y y sũur Soaala yĩnga; m kõn yɛ ne yãmb saglg kãng abada! Rẽ n pʋs n são.

² Gũus-y ne nin-wẽnse, ne baasã, ne tʋʋm-tʋmdb yoodã, ne zirẽ-be-zũnsã.

³ Zũns bal la tõndo tɩ tõnd waoogra n tũud Wẽnd Vʋʋsem sẽn date. La tõnd basa kʋdemdã teegre n na n teeg Krista a Zezi bala.

⁴ Mam yaool n da tõe n teegẽ la kʋdemdã; ned sã n beẽ n teeg rẽnna, m tẽed tɩ maam n ket n yɩɩda.

⁵ M dog tɩ rasem a nii, b kẽes-m la bãongo; maam la Israyɛl biiga, a Bẽzame yagenga, Ebre bil memga, maam la Farizẽ sã n ya ne Noora tũudem.

⁶ Sã n ya yik n zab ne buuda bɛɛbã, m namsa So-paala rãmba; sã n ya ne sõmblem ning Noor tũudem sẽn kõt a soabã, m pa tar m toorẽ yell ye.

⁷ La m sẽn da pid ne yõod niynsa fãa, m gesa rẽ wa bõne, Krista yĩnga.

⁸ Yɩɩd rẽ, m geta bũmb fãa marsã wa zaalem t'a Zezi Krista, m Soaala, bãngr n lʋɩ taoore. Bãmb yĩnga m saka sẽn keta fãa menesgo, m geta fãa wa tãmpʋʋr sagdo tɩ woto la m tõogd n paam Krista.

⁹ M datame n menes m sõmblema, sõmblem ning Noora reegr sẽn kõt a soabã, n lagem Krista ne sõmblem ning bãmb tẽeba sẽn kõt a soabã, sõmblem ning sẽn yita Wẽnd nengẽ la sẽn tobd tẽeba yẽgrẽ.

¹⁰ M datame n bãng Soaala, n bãng b vʋʋgra pãnga, n bãng naag bãmb n namsa yõodo, n wẽneg bãmb b kũumẽ,

¹¹ tɩ sã n tõe bɩ m naag n vʋʋg.

¹² M pa yet tɩ m yãee m sora tɛka, m ka yet tɩ m sõmblem sekame ye, ayoo! M ningda tĩiga n dat n wa paam Krista n yõke wa Krista Zezi sẽn paam maam n yõkã.

¹³ M saam-biisi, ad-y m ka na n belg m meng wa m zoe n paama Krista n sog ye. Woto bal la m yeta: m yĩma m sẽn zoe n kẽna, m teesa m sẽn dabdẽ wã tɩrga, ne m pãng fãa,

¹⁴ n zoet n pʋgd kũun ning Wẽnd sẽn boond-d tɩ d wa reege, al yĩngri, Krista a Zezi nengẽ.

¹⁵ Tõnd fãa sẽn paam n bɩɩs d yama, yaa woto la d tog n tagse. Bũmb sã n beẽ tɩ y tagsd toor a poorẽ, Wẽnd n wat n vẽneg yã.

¹⁶ Sẽn ya zĩig ning fãa la d zoe n kẽn n ta, d da golem d sora ye.

¹⁷ Togs-y mam vɩɩma; m saam-biisi, togs-y sẽn be-b yãmb sʋka n vɩ wa maama.

¹⁸ Kẽer n be, b sõora labsa, la m togs-y la rẽ naoor yaka, la m le togsd-y la rũnna ne nintãm, b vɩɩ wala Krista pika bɛɛba.

¹⁹ Bãmb dãmb kõn baas neer ye; yaa b pʋgã n lebg bãmb wẽnde la b pa zoet rẽ yãnd ye; la b yãnda la b zu-zẽkre: b sẽn pẽgd bala yaa tẽng zug yɛla.

²⁰ Sã n ya tõndo, arzãn la d tẽnga: be bala la d gũud wala d Fãagda, Soaal a Zezi Krista.

²¹ Bãmb n na n tedg tõnd nimbãan yĩngã t'a lebg ziir yĩnga wa bãmb dẽnna, tɩ b tara pãnga n tõe tɩ bũmb fãa tũ b raabo.