Ezekiyɛl 9 - SEBR SÕNGO

Zerizalɛɛm sɩbgre

¹ Rẽ poore m wʋma Soaala sẽn tãse: «Wa-y yã, yãmb fãa sẽn tog n sɩbg tẽngã. Ned kam fãa wa ne a sãoong teedo!»

² Rẽ la neb a yoob yi rigno-kãsengã, nug goabga sẽnẽ n wa, ãnkam fãa ne a wãab teedo a nugẽ. Bãmb sʋka ned a yembre n da yer fu pɛɛlga n sẽbg a sɛɛgẽ b sẽn tar bũmb ning fãa n gʋlsdẽ. B fãa kolgame la b yalsa zũuda maan-kugr sɛɛga.

³ A Israyɛl Wẽnnaama sẽn da lik ne ziir malɛgsa zugẽ wã zẽkame n tees wẽnd dooga dignoore. La b boola ned ningã sẽn da yera fu pɛɛlgã n loe a sɛɛgẽ b sẽn tar bũmb ning fãa n gʋlsdẽ wã.

⁴ B yeela nin-kãnga: «Saag Zerizalɛɛm, la f sẽn yãend ned ning fãa t'a kũmdẽ la a wiisdẽ, wɩɩbda fãa sẽn maand tẽngã pʋgẽ wã yĩnga, bɩ f bẽeg makre a rĩirẽ.»

⁵ La mam wʋma a sẽn yeel neb a nu wã: «Pʋg-y nin-kãnga, tẽnga pʋga, n kʋ nebã. Nimbãan-zoeer da yõk-y ye; da bas-y ned ba a ye ye.

⁶ Kʋ-y nin-kẽemba wala kom-bɩɩba la kom-pugli, la pagba wala kom-bõonego. Kʋ-y b fãa gilli. Da sɩɩs-y ned ning fãa sẽn tar-a makrã b rĩirẽ ye. Sɩng-y ka, m do-sõnga pʋga.» Rẽ la b sɩng kʋʋbo, la b sɩnga ne nin-kẽembã sẽn da yɛs wẽnd dooga taoorã.

⁷ Soaala kõo noore tɩ b rẽgem doogã n pids a sɩmandã ne kũum la b yaool n teem zĩiga. La rẽ sẽn maane, b yiime n kẽ tẽngã n tar a wãabo.

⁸ Maam a Ezekiyɛl da yɛsa m ye tɩ kʋʋba kʋʋda, tɩ m na n lʋɩ yãvabga la m kelemdẽ: «Wii! Soaala-Wẽnde, y sũura sẽn puug woto ne Zerizalɛɛma, yãmb datame n menes a Israyɛl kamba sẽn kella laa?»

⁹ Tɩ b na n leok-ma: «A Israyɛl la a Zɩɩda rooga beegra labsa, a ka tar tɛk ye, tẽnga fãa pida ne zɩɩm, zemsg ka ye, tɩ b lagem n gomd woto: ‹Soaala toog ka le be ne tõnd ye, tɩ b loog n basa d tẽngã.›

¹⁰ Bãng-y tɩ m kõn maan nimbãan-zoeer ye, m kõn bas ned ba a ye ye! M na rɩk b manesmã taale n zɩlg-ba.»

¹¹ Dẽ marsã la ned ninga sẽn da yeelga fu pɛɛlgã n sẽbg a sɛɛgẽ bũmb ning fãa b sẽn tar n gʋlsdẽ wã, nin-kãng waa n goma a tʋʋmna yelle. A wilga Soaala woto: «M tũ-la y raaba zãnga!»