Ezekiyɛl 6 - SEBR SÕNGO

Wẽn-naandsa waoogre

¹ Soaala-Wẽnd taasa maam koe-kãnga:

² «Ninsaal biiga, wẽnemde n tees Israyɛl tãmsã, la f gome ne a nebã.

³ Bɩ b kelge! Ad maam, Naaba-Wẽnd, sẽn leokd sẽn be-b tãmsa zutu, kunkuba zutu, bogdẽ wã la bãadẽ wã: M na n taka zabre ne-yã, la m na n sãama y wẽn-faada waoogr zĩisi.

⁴ B na sarma y maan-kugã, y wisda laase. Y wẽn-naandsa rota noore, yãmb wʋsg na n paa be.

⁵ M na n yɛdga Israyɛl kamba sẽn ki wã b wẽn-naandsa taoore la m na n sẽega b kõaba n gilg b maan-kugã.

⁶ Yãmb sẽn kẽed tẽns niynsa ka na n le yãend kẽedb ye, la b kõn le yãend ned wẽn-naandsa waoogr zĩigẽ ye. Y maan-kuga na n wãame n ka le tar tʋʋmd ye, y wẽn-naandsa, b na n wã-b lame, b na n menes-b lame, y wisda laase na n wãame, y sẽn naana fãa na n lebga tom.

⁷ Yãmb sʋka wʋsg na n kiime. Woto la y bãngd tɩ maam la Soaala-Wẽnde.

⁸ La m zabra sʋʋg na n keesa yãmb neb kẽere la bãmb la m na n sẽeg tẽn-zẽngẽ.

⁹ B na tẽeg m yelle b pa-weera tẽngẽ. B na tẽeg tɩ m sẽn nams-b woto wã, yɩ-la b yama sẽn lak ne maama la b sẽn wẽnemd b nens n tees wẽn-naandsã. B sũur na n yaala ne b meng marsã b sẽn tʋm tʋʋm yooda yĩnga.

¹⁰ Woto b na bãnge tɩ maam, Naaba-Wẽnd, da pa gomd vɩʋʋgẽ, m sẽn da waa n yeel-b tɩ b gũus tɩ yel-beed n na n lʋɩ b zutã.»

¹¹ Naaba-Wẽnd n gomd woto: «Vam-y y noore, n wilg y sũ-toogo, tib-y y nao la kaas-y n sãbs Israyɛl dãmba tʋʋm yoodã la b tʋʋm kɛgã. B bãng tɩ sʋʋg n na n menes-ba, bɩ kom, bɩ bã-longdem.

¹² Bã-longdem n na n kʋ sẽn be b yɩɩgã; sʋʋg n na n lub sẽn pẽ-bã; kom na n kʋ sẽn põs-bã, tẽnga wãab poore. M na n basame tɩ m sũura fudg n waag-ba.

¹³ B yĩnsa na n sẽega tẽnga n naag ne b wẽn-naandsa, b maan-kuga sɛɛga, tãmsa la kunkuba zutu, tɩɩsa sẽn tob la sẽn gũma tẽngre, la zĩis niyns fãa b sẽn kʋʋd b wẽn-naandsa maando. Woto b fãa na bãng tɩ maam la Soaala-Wẽnde.

¹⁴ M na n wilg-b-la m pãnga; m na n kɩtame tɩ b tẽngã, b sẽn kẽed zĩig ning fãa lebg raboogo, sɩngda zĩ-peen-daagã nug rɩtgo n ta Ribla, nug goabga. B fãa na bãng tɩ maam la Naaba-Wẽnde.»