Ezekiyɛl 47 - SEBR SÕNGO

Wẽnd doog ko-bunem

¹ Raoã tall-m lame n le wa wẽnd dooga noore. M yãenda koom sẽn bund n yit yaang noorã. Wẽnd dooga lʋgre ra teesa yaanga, kooma me boto. Kooma ra zoet n teesa wẽnd dooga rɩtgo, n yegd maan-kugra rɩtgo.

² Raoã kɩtame tɩ m tũ goabg noorã n yi wẽnd doogã la m gilgame n wa ta yaang noorã. Kooma ra yita no-kãng nug goabga.

³ Neda zãagame n tees yaanga la a ra zãada wĩ-bãanega a nugẽ n magda. A maga kãntɩɩs tusri. A kɩtame tɩ m kẽ kooma la a ra tekda m nao-sũgsi.

⁴ A sẽn le mag kãntɩɩs tusri a le kɩtame tɩ m kẽ kooma la a ra tata m dũma. T'a le mag kãntɩɩs tusri n yet tɩ m dʋʋge la kooma ra tata sɛɛga.

⁵ A le maga kãntɩɩs tusri la lebga ko-fõtem sẽn ka tõe n dʋʋg ye. Kooma paasame, kʋɩlga lebga zulunga, kʋɩlga le ka tõe n dʋʋg sã n ka rugb ye.

⁶ Tɩ neda na n sok-ma: «F gesa neere, Ezekiyɛl?» A tall-m lame tɩ d zãag bilfu n le tall-m n wa kʋɩlga noore.

⁷ M sẽn lɛɛg n wa kʋɩlga noore, m yãendame tɩ tɩɩsa yaa wusgo, kʋɩlga goabg la rɩtgo.

⁸ Raoã yeel-m lame: «Ko-kãnga rigda yaanga, Araba foole la a tũud n kẽed yamsem Mogrã la a sẽn kẽed Mogrã a kooma na n lebga sõma.

⁹ Kooma sẽn ta zĩig ninga bõn vɩɩl fãa vɩɩm na n yãngame. Kʋɩl-zẽeda na n weka balbo tɩ kooma sẽn ta zĩig ning fãa, zĩ-kãng lebgda sõmbo tɩ vɩɩm sakd a pʋgẽ.

¹⁰ Kʋɩl-zẽ-yẽedba na n tonga taab kʋɩlga noore. B na n yɛdga b zulumsi Engadi n ta En-Eglayim. Kʋɩl-zẽeda sẽn yõgda yaa buud toor-toore wa Tẽnsʋk Mogra zĩma.

¹¹ Sã n ya bãtã la ko-ralma, bãmb pa tek ye. Yamsem bal n pid-b zãnga.

¹² Kʋɩlga noore, goabg la rɩtgo tɩ-rits buud toɛ-toɛyã n na n yi. B vãada kõn tol n sʋʋg ye, b womb ka be wakat ye. Kiuug fãa wata ne a bɩ-paala, tɩ kooma yaa do-sõnga koom. Biisa womda rɩɩb yĩnga la vãada yaa tɩɩm.»

Tẽnga toose

¹³ Ad Soaala-Wẽnd sẽn yete: «Ad tẽn-peelma Israyɛl sags piig la a yiibã sẽn na n pʋɩ taaba. A Zozɛf pʋɩɩra na n yɩɩ wa sags a yiib rẽnna.

¹⁴ Y fãa na n paama pʋɩɩre tɩ m wẽename n kãab y ba rãmba tẽn-kãnga, la a na n lebga y tẽnga.

¹⁵ Ad tẽnga toose: Nug goabg yaa Mog kãsenga la a sɩngda, n tũud, Etlõ, Lebo-Amat, Sedad,

¹⁶ Berota, Sibrayim sẽn be Damas, ne Amat la Asɛr-Tikõ rĩung tẽnsʋka, n kolg Awurã toaaga.

¹⁷ Woto wã toaaga sɩngda Tẽnsʋk Mogrã n tat tẽng ning sẽn boond tɩ Asar-Ena. A na n teka Damas la Amat rĩundu. Woto la toaaga, nug goabga sẽnẽ.

¹⁸ Yaang marsã, toaaga na n sɩnga Awurã ne Damas sʋka, a na n tũu Zʋrdẽ kʋɩlga, Galaad la Israyɛl sʋka la a na n taa Tamar, sẽn be Yamsem mogra noore.

¹⁹ Nug rɩtgo, toaaga na n sɩnga Tamar n ta Kadɛs Meriba bãoogo. Dẽ poore a na n yega Ezipt kʋɩl-bɛɛgã n ta Tẽnsʋk Mogre. Woto la nug rɩtg toaaga.

²⁰ Nin-taoore yaa Tẽnsʋk Mogrã n na n yɩ toaaga, al nug rɩtgo n ta Lebo-Amat. Nin-taoor toaaga la rẽ.

²¹ Pʋɩ-y tẽnga ne taaba, ne a Israyɛl sagsã.

²² Y na n poeesame n pʋɩ la ra yĩm-y sãamba sẽn nok-b yãmba n dog kamb sẽn be ne yãmba ye. Da zẽng-y-b ne Israyɛl tẽnga kamba ye. B tog n paama b pʋɩɩr Israyɛl buuda sags sʋka.

²³ Yaa sẽn kẽed sak ninga la sãan na n paam a pʋɩɩre. Yaa maam a Naaba-Wẽnd n kõt no-kãnga.»