Ezekiyɛl 46 - SEBR SÕNGO

Dĩm-biiga yĩnga

¹ Ad Soaala-Wẽnd sẽn yete: «Zaka a yiib soaba noor sẽn tees yaanga tog n paga rasem a yoobã n yaool n pak vʋʋsga raare la kiu-paalã.

² Dĩm-biiga na n tũu pipi zaka noor n kẽ la a na n kẽeme n sãag roog ning sẽn be noorẽ wã. A na n yalsa kʋɩlenga sɛɛga tɩ maan-kʋʋdba baas b yũ-nooda maand la b maan-dɩtse. A na n wõgemda rooga noor la a lebe. Kʋɩlenga ka na n pag sã n ka zaabre ye.

³ Yaa no-kãng me la zãma wã na n wa wõgemd m taoore vʋʋsg raare la kiuuga yiib raare.

⁴ Dĩm-biiga na n wa kõ-m-la vʋʋsg raare, pe-bi a yoobe la pe-raoog sẽn ka tar bãnde yũ-noog maoong yĩnga.

⁵ Pe-raooga tũnugda ne zom peoogo. Sã n yaa pe-bi wã, a kɩta wala a sẽn tagse. Zom peooga paasda kaam lengre.

⁶ Kiuuga yiib raare, na n yɩɩ loalga, pe-bi a yoobe, la pe-raoogo, la fãa yaa rũms sẽn ka tar bãnde.

⁷ Loalgã, pe-raoogã tũnugda zom peoogo. Sã n ya pe-bi wã, dim-biiga tũnugda a sẽn tagse. A na n paasa kaam lengre, zom fãa ne a rẽnda.

⁸ Rĩm-biiga sẽn tũ noor ning n wa wã, no-kãng la a tũud n yi. A tũuda roog ning sẽn pẽ-a noorã.

⁹ Tẽnga kamba sẽn wat m waoogre, maam, Naaba-Wẽnde, wala kibs bɛdã, tig-raasã, tog n bãnga neere tɩ sẽn tũ-b goabg noora lɛɛgd n yii rɩtgo, tɩ sẽn tũ-b rɩtga lɛɛg n yi goabga. F sẽn tũ noor ning n kẽ wã f ka tõe n le tũ no-kãng n yi ye. Yɩta noor ning sẽn tota yẽ wã.

¹⁰ Dĩm-biiga watame la a yit ne neb a taabã, yiib wakato.»

Noy-kẽere

¹¹ Naaba-Wẽnd le paasdame: «Kibs daare la lagemg-taab raare, kũuna sẽn na n tũnugã yaa naaf fãa zom peoogo, pe-raoog fãa zom peoogo. Sã n ya pe-bi wã, yaa wa b sẽn date. Zom peoog fãa togẽ-la ne kaam lengre.

¹² Dĩm-biiga sã n wat ne a yamleoog maoongo, yũ-noog maoong bɩ maan-dɩtga yaa yaang rignoorã la b tog n pak t'a kẽ. A maanda kʋʋda wa vʋʋsga raare, la a sã n looge b lebgd n paga kʋɩlengã.

¹³ Beoog sẽn vẽeg fãa, yaa pe-bil sẽn ka tar bãnde la b na maan yũ-noog maoong Soaala yĩnga. Yaa yibeoog la maoonga kʋʋda.

¹⁴ Yibeoog fãa b tũnugda zom wamde la kaam bilfu sẽn na n nag zoma. Dẽ yaa bũmb sẽn yals daar buud fãa yĩnga.

¹⁵ Pe-bilã, zoma la kaama sẽn tũnugdã yaa bũmb sẽn tog n kõ Soaala yibeoog fãa n tãag dũni wã yikri.»

Dĩm-biisa raboog pʋɩɩre

¹⁶ Woto la Naaba-Wẽnd gomda: «Dĩm-biiga sã n kẽ a soolma pʋgẽ n yãk a vẽenema n kõ-a bi-roaka, biigã n na n soog-a wa a pʋɩɩre.

¹⁷ Sã n yaa a sõgne la rĩm-biiga dɩka a vẽenema n kõ, sõgna n na n soog-a n tãag a sẽn paam n na n soog a meng raare. A sẽn so a meng raare, vẽenema lebda rĩm-biigã. Yaa dĩm-biiga kamb bal n tõe n dɩ a raboog pʋɩɩre.

¹⁸ Dĩma ka tõe n fã zãma wã, n kẽ a soolma pʋgẽ n deeg bũmb a meng yĩng ye. Yaa a sẽn so pʋgẽ bal la a tõe n yãk n kõ a kamba, la woto b kõn tõog n dig ned ba a ye n yiis a soolmẽ ye.»

Seglg zĩiga

¹⁹ Raoã tall-m lame n ta rot niyns sẽn me nug goabgã n kẽes-m maan-kʋʋdba ro-sõma wã pʋsẽ. A tɩ yãenda zĩiga, nin-taoor dota pʋsẽ.

²⁰ A yeel-m lame: «Yaa ka la sugr kosg la yel-wẽnd dolb maanda rũms na n dʋge. Na n yɩɩ woto me ne kũuna sẽn tũnugã, tɩ ka yɩ modgr ne maan-kʋʋdba tɩ b tall dɩ sõma wã n yi sɩmandẽ wã n pẽneg zãma wã ye.»

²¹ Raoã tall-m lame n yi sɩmandẽ n kɩt tɩ d yeg a gõd a naasã. Gõdr fãa ne a zaka.

²² Zag-bãmb da yaa bõonese, la fãa ra zema taaba. Woglma yaa kãntɩɩs pis-naase, tɩ yalma ya kãntɩɩs pis-tã.

²³ Zak fãa ra gũbga ne kug lalga, la b ra tedga bug-toaalse.

²⁴ Raoã yeel-m lame: «Ya bug-toaals kãensa zugu la maan-kʋʋdba rʋgd zãma wã sẽn wat ne rũms niyns n kʋʋd maandã.»