Ezekiyɛl 45 - SEBR SÕNGO

Wẽnd pʋɩɩre

¹ Woto la Soaala Wẽnd gomda: «Y sã n wa yet tɩ y na n pʋɩɩ tẽngã n kõ buud kam fãa a pʋɩɩre, wa a zu-noog sẽn tʋʋg-a, y na n kõo Soaala b rẽnna. B soolma woglem na n yɩɩ kãntɩɩs tus pisi la a nu t'a yalem ya kãntɩɩs tus pisi. Vẽenem kãng welga toor bãmb yĩnga.

² Vẽenem kãng pʋgẽ b na n basa wẽnd dooga yĩnga, vɩʋʋg woglem la yalem sẽn ta kãntɩɩs kobs-nu. Vẽenem kãng kokdame n gilg ne toaag sẽn ta kãntɩɩs pis-nu.

³ Kẽ-y Wẽnd soolmẽ wã n bẽeg vẽenem yalem sẽn ta kãntɩɩs tus piiga t'a woglem ya kãntɩɩs tus pisi la a nu. Be la b na n ning wẽnd doogã, sõmblem sẽn pid sõmblem zĩigã.

⁴ Vẽenem kãng na n boolame tɩ pʋɩɩr sõngo. Be la maan-kʋʋdba sẽn kolgd Wẽnd n tʋmd b tʋʋmna na n me b roto la be me la wẽnd dooga na n paam a zĩiga.

⁵ Vẽenema a to me woglem sẽn ta kãntɩɩs tus pisi la a nu t'a yalem yaa kãntɩɩs tus piiga n na n yɩ Levitsa soolem; bãmb n so tʋʋm niyns fãa sẽn tʋmd wẽnd doogẽ tɩ yaool n ka maan-kʋʋr tʋʋm ye. Be la bãmb me na n me n kẽ.

⁶ Wẽnd vẽenema yegende b na n le bẽega vɩʋʋg woglem sẽn ta kãntɩɩs tus pisi la a nu t'a yalem ya kãntɩɩs tus a nu n me tẽngã. Israyɛl biig fãa tõe n wa kẽe be.

Dĩm biig pʋɩɩre

⁷ Dĩma na n deega vẽenem Wẽnd vẽenema la tẽnga rãmb rẽnd sʋka. Nin-taoore, vẽenem kãng yalem na n tãaga Tẽnsʋk Mogre la yaanga a na n teka a Israyɛl tẽn-peelma toaaga. Sã n yaa a woglma yaa a Israyɛl buuda sags sẽn tong taaba woglem.

⁸ Woto Israyɛl tẽn-peelmẽ dĩm dãmba tara b zĩiga. B kõn le maand Wẽnd neba pãn-tõog ye, b na bas vẽenema sẽn kellã a Israyɛl sagsa yĩnga.»

⁹ Woto la Naaba-Wẽnd gomda: «Sekame marsã, Israyɛl dĩm-biisi. Y rẽnda yaa n looga toogo. Bas-y pãn-tõogo la nin-kʋʋre. Maan-y sẽn toge la sẽn zemse. M neba ra le nams ne y fãaba ye. Maam n kõt-y noore, maam, Naaba-Wẽnde.

¹⁰ Ned kam fãa mag a te-koosem zɩslem ne bõn-magdi sẽn ya sõma. Y bõn-sĩin magdga, efa, yɩ sõmbo. Y bõn-koaag madga, bat, yɩ sõmbo.

¹¹ Bõn-magds a yiibã, efa la bat zema taaba. Bãmb piiga n pit bõn-sĩin magdg kãsengã, omer, la bõn-koaag magdg kãsengã, kor. Kor la omer me magame tɩ b zem taaba.

¹² Sã n ya zɩslma magbo, sikl yaa zera rãmb pisi. Sã n mag zera rãmb kobs-yoobe la pisi, f tara min a ye.

Wẽnd doog kũuni

¹³ Kũuna sẽn yãkd n kõt Soaala, ad-y y sẽn na n yãk-a to-to. Sã n ya alkam pɛɛlg bɩ alkam pugsgu, y pʋɩta y sẽn paama dʋr pisoobe n yãk dʋr a ye n kɩse.

¹⁴ Sã n ya kaam lens koabg la y paam yã, yaa lengr a ye la y kɩta.

¹⁵ Sã n ya rũmsã, yaa pe-yãang a ye bɩ bʋ-yãang a ye la y yãkd n kɩs bãmb kobs-yi zugu. Kaama, rãama bɩ zoma na n tũnuga yũ-noog bɩ yamleoog maoong bɩ maan-dɩtga, yel-wẽna sugr paoong yĩnga. Yaa maam, Naaba-Wẽnd, n kõt noor kãnga.

¹⁶ Sẽn tog n deeg n kɩs rĩma, bɩ tẽnga biig fãa modg n paam n kɩs dĩm-biigã.

¹⁷ Dĩma marsã n na n bãnge tɩ maanda tõog n kʋ: yũ-nooda maand sẽn tũnugd ne kaam la rãam, kibs bɛda raare, kiu-paala, vʋʋsg raare la tig-raase. Yaa dĩma n na n ges sugr kosg maandã, yũnood maandã, maan-dɩtsã la b sẽn tũnugd ne kũun niynsã, maanda sã n kʋʋd a Israyɛl dooga yĩnga.»

Pak kibsa

¹⁸ Ad Naaba-Wẽnd sẽn le paase: «Pipi kiuuga pipi raare, loalg sẽn ka tar bãnde la y na n kʋ do-sõnga yɩlgr yĩnga.

¹⁹ Maan-kʋʋda yãkda naafa zɩɩm n taag kʋɩlensa ra-lugã, maan-kugra kɩrems a naasã n paas pʋgẽ zaka kʋɩlens ra-lugã.

²⁰ Yaa boto la b na n le maan yɛsa kiuuga rasem a yopoe daar fãa neb niyns sẽn dẽgem b mense, tagsgo la gũusg kaalem yĩnga, la woto wẽnd dooga paamda yɩlgre.

²¹ Kiuuga piig la a naas raare, sɩng-y pak kibsa. Yaa rasem a yopoe la kibsa na n kaoose la bura ka na n le ning bɩll ye.

²² Kibsa pipi raare, dĩm-biiga na n kʋʋ loalga a meng yĩnga la buuda yĩnga n kos yel-wẽna sugri.

²³ Kibsa rasem a yopoe wã pʋgẽ, beoog sẽn vẽege yaa lols a yopoe la pe-raad a yopoe sẽn ka tar bãnde la dĩm-biiga na n kʋ yũ-noog maoongo. Beoog sẽn vẽeg fãa boɛɛg me la a na n kʋ sugr kosg yĩnga.

²⁴ Maoonga loalg bɩ pe-raoogo fãa na n tũnuga ne zom peoogo la kaam lengre.»

Sẽgd kibsa

²⁵ Ad Naaba-Wẽnd sẽn le paase: «Kiuug a yopoe soaba, kiuuga piig la a nu raare, dĩm-biiga na n maana wala a sẽn maan paka wẽnde. Beoog sẽn vẽeg fãa, a na n maana sugr kosg maoong wa pakã. Yũ-noog maanda na n yɩɩ wa pakã, alkama la kaama kũuna na n yɩɩ wa pakã.»