Ezekiyɛl 44 - SEBR SÕNGO

Yaang noora porẽ

¹ Raoã tall-m lame n yi yɩnga, yaang noorẽ. Noora ra pagame.

² Soaala yeel-m lame: «No-kãnga tog n pagame, b ra pak-a bada. Ned ba a ye, ra tũ be n loog ye tɩ yaa be la maam a Israyɛl Wẽnda tũ n kẽ. Dẽ yĩnga bɩ b pag-a.

³ M sẽn kõ dĩma naama yĩnga, yẽ tõe n taa wẽnd dooga pʋga n dɩ Wẽnd taoore. La ade, yaa roog ninga sẽn da pẽ wẽnd doogã n yɩɩda noor la a na n tũud n kẽedẽ la a yita.»

Wẽnd dooga pa kẽed yaar ye

⁴ Raoã tall-m lame n ta goabg noorã, wẽnd dooga taoore. M yãeeme tɩ Wẽnd ziira ra pida roogã tɩ m na n kɩ m neng tẽnga.

⁵ Soaala-Wẽnd yeel-m lame: «Maan gũusgu, Ezekiyɛl, ges neere, yoog f tʋba. Ad yaa noya sẽn get m dooga la m na n kõ-fo. Maan gũusg neere ne noy-niyns sẽn get a pʋgẽ kõom la yiibu.

⁶ Yeel a Israyɛl kamba sẽn ya tõatbã maam, Naaba-Wẽnd, sẽn wilgd-ba. M yam yaa n yii ne y tʋʋm yooda buud toor-toorã, Israyɛl kamba.

⁷ Wakat ning y sẽn wat ne m dɩɩba pʋɩɩre, maanda rũmsa kaam la b zɩɩma, y yikd n kẽesda m do-sõngẽ wã neb sẽn ka kẽ bãongo, la sẽn ka reegd m noor ye. Woto wã y rẽgemda m doogã. Y sãama m zooda ne y manes wẽnse.

⁸ Tʋʋm niyns y sẽn da tog n tʋm m yĩng m do-sõnga pʋgã, y rɩka tʋʋm kãense n tãng ne sãamba. Woto bãmb n deeg y zĩiga.

⁹ M yet-y lame, maam, Naaba-Wẽnde, tɩ sãan fãa sẽn ka kẽ bãongo la a ka reegd m noore, kõn le kẽ m do-sõngã, ba a zak sã n ti Israyɛl kamba sʋka.

Levitse

¹⁰ Sã n ya Levits niyns sẽn bas-b maam n naag Israyɛl kamb a taaba n maan wa b toog ka le be ne maama, n na n pʋg b rẽgdã, b wẽn-naandsã, ad bãmb na n dɩɩ b beegra taale.

¹¹ Ad tʋʋm niyns b sẽn tõe n tʋm m yĩnga. B tʋʋmd na n yɩɩ dooga noya gũubu la yɛl a taaba gesgo. B na n tõogame n kodg yũ-nood la maan-dɩtsa rũmsi. M buuda sẽn dat tɩ b wa sõng ne bũmb ning fãa bɩ b wa sõng-a.

¹² La b sẽn lʋɩɩs b toog a Israyɛl ne a wẽn-naandsa waoogr pʋgẽ, n tol n kʋɩɩb Israyɛl kambã, ad-m sẽn yet-ba, maam, Naaba-Wẽnde. M na n yika ne bãmba la b na rɩ b beegra taale.

¹³ B ra le saag n deeg maan-kʋʋr naam ye, b ra saag n sɩɩs bõn sõma wã sẽn welg toor m yĩngã ye, la b ra kẽ sõmblem sẽn pid sõmblem dooga ye. Yaa woto la b na n yao b tʋʋm yooda sẽn ning-b yãndã.

¹⁴ M sẽn kees-b yaa beoog-beoog fãa tʋʋm yaalsã.

Maan-kʋʋdba

¹⁵ Levit niyns sẽn yaa a Sadok yagense, bãmb yẽ kell n tũu noy-niyns sẽn get do-sõngã, ba Israyɛl kamba sẽn wa n yik n bas maam, bãmb Wẽndã. Woto yĩnga yaa bãmb bala n tõe n wa kõ-m maanda kaam la zɩɩm. Yaa maam, Naaba-Wẽnd n yet rẽnna.

¹⁶ Bãmb bal n na n kẽ m do-sõngẽ wã n kolg m dɩɩba zĩigẽ n tʋm b sõgen-tʋʋma. B na tũ m noya neere.

¹⁷ B sã n kẽed zak a yiib soaba, bɩ b yeelg fut sẽn wʋg ne gĩs bãanese. B ra kẽ be bɩ wẽnd dooga pʋga ne fuug sẽn wʋg ne pe-kõbd ye.

¹⁸ B fõgneg gĩ-bãanes pugli, la b mobg b sees ne peende. B kõn yeelg fuug sẽn na n kaoog b tʋʋlg ye.

¹⁹ B sã n yit yɩnga n le tɩ kẽed zãma wã sʋka, b deng n yees b sẽn da yer fut niyns n tʋmd Wẽnd taoorã. Fu bãmb bĩngda do-bõonesa pʋga n yaool n yi ne fut a taaba la woto neb a taaba kõn sɩɩs b tʋʋmda fu-sõma wã ye.

²⁰ Maan-kʋʋdba zut ka põngd koeel ye, zoobda me ka basd tɩ kẽ wʋsg n loog ye.

²¹ Maan-kʋʋd sã n na n kẽ wẽnd dooga pʋg raare, a ka yũud rãam ye.

²² A pa tõe n yɩ kãadem ne pʋg-kõor bɩ ne pag b sẽn yiis ye. A yita ne Israyɛl buud bi-pugla bɩ paga maan-kʋʋd a to sẽn ki n base.

²³ Maan-kʋʋdbã n na wilg zãma wã bũmb ning fãa sẽn welg toore Wẽnd yĩnga la b wilg n bak bũmb sẽn ka rẽgemde la bũmb sẽn dẽgemde f sã n sɩɩs-a.

²⁴ Bãmb n kaood bʋʋdo la b na n kao-a-la wa m sẽn wilgi. B na n maana kibs rãmbã wala m sẽn wilgi la b na modg tɩ fãa tũ vʋʋsg raara noya.

²⁵ Maan-kʋʋd da kolg kũum n wa rẽgem a meng ye. A sẽn tõe n kolg sẽn lebg kũum yaa a ba, a ma, a bi-roaka, a ba bɩ a ma bi-ribla, a ba bɩ a ma bi-pugla, a sã n nan ka yi kãadem.

²⁶ Maan-kʋʋda sã n sɩɩsa bãmb nin-yende, a yɩlgda a menga, la a maanda rasem a yopoe n yaool n le sɩng tʋʋmde.

²⁷ La a sẽn na n le tag zak a yiib soaba daare, a na n maana maoong m sugr kosg yĩnga. Yaa maam, Naaba-Wẽnd, n yet rẽnna.

²⁸ Maan-kʋʋdba n na n tʋm m waoogr yĩnga. B ka na n deeg pʋɩɩr Israyɛl tẽng ye, tɩ maam n na n yɩ b pʋɩɩre.

²⁹ B soo kũun niyns sẽn tũnugd sugr kosg bɩ yɩlgr maando; bũmb ning fãa sẽn pʋlem Wẽnde t'a Israyɛl ka le tõe n dɩ a yõodo lebga bãmb soolem.

³⁰ B sẽn so yɛsa yaa rũms rẽemsã, kood rẽemsã sẽn lembd Wẽndã n paas b paoonga rʋr a ye piig zugã. Neba na n kõ-b-la b bur sõma wã tɩ m tũ rẽ n ning b zags barka.

³¹ Luiila bɩ rũng buud fãa sẽn ki bɩ a to sẽn yõke, maan-kʋʋd ka sɩɩsd a neong ye.»