Ezekiyɛl 41 - SEBR SÕNGO

¹ Raoã tall-m lame n kẽ wẽnd dooga pʋgẽ ro-kãsengã la a maga lals niyns sẽn me tagd-tagdã. B yalma yaa kãntɩɩs a yoob-yoobe.

² Rooga noora yalem, kãntɩɩs piiga. Noora sẽn yãkã b keesa lalg woglem kãntɩɩs a nu goabga la kãntɩɩs a nu rɩtgo. A maga rooga woglem, kãntɩɩs pis-naase, a yalma kãntɩɩs pisi.

³ Doog a to la d le kẽ, yaa taoor doogã. Kãntɩɩs a yi la lalsa sẽn me tagd-tagd noorẽ wã. Noora yalem yaa kãntɩɩs a yoobe. Nora sẽn yãk sʋkã, keesa kãntɩɩs a yopoe lalse, goabg la rɩtgo.

⁴ Rooga meng woglem ne a yalem fãa zema taaba: kãntɩɩs pisi. La raoã yeel-m lame tɩ sõmblem pid sõmblem dooga la woto.

Dot a taaba

⁵ Raoã maga wẽnd dooga pʋgẽ lalgã: a taglem yaa kãntɩɩs a yoobe. Kɩremsa ra ninga ro-bõonese. Do-bõonesa yalem: kãntɩɩs a naase la b ra me n gilga wẽnd doogã.

⁶ Do-bãmb da roglma taaba a tãab-tãabo la b sõora zãng yaa pis-tã. Ro-bãmb da meeme n kẽes yɩng lalgã n yaool n pa me n sog ne wẽnd dooga lalg meng ye.

⁷ Rota sẽn dogl taab zutã, ad-y yĩngr dãmba yalma ra paasame n yɩɩd tẽngr dãmba. B lalsa taglem bal n da boogde. Sẽn gilg wẽnd dooga fãa ra ya boto. Yaa rẽ me yĩnga la f sã n dʋ yĩngri dotã, f neeme tɩ vɩʋʋg ra beeme n yɩɩda. F sã n be tẽngr doogã f ra tõe n dʋʋ al yĩngr soaba bɩ n tek tẽnsʋk soabã.

⁸ M yãeeme tɩ rota sẽn da me n gilg wẽnd dooga ra zẽka kãntɩɩs a yoobe.

⁹ Ro-bãmb yɩng lalsã taglem ra yaa kãntɩɩs a nu. Vɩʋʋg ning sẽn kell ro-bãmb ne ro-bõones a taaba sʋka,

¹⁰ da yaa kãntɩɩs pisi n gilgi.

¹¹ F ra tõe n tũu noya a yiibu n yi rota sẽn doglem taabã n ta vɩʋʋga sẽn bas sʋkã. Noor a ye ra bee goabga t'a ye be rɩtgo. Lalg ning sẽn da me n gilg n basd noya a yiiba ra yaa taoko; a taglma ra yaa kãntɩɩs a nu.

¹² Bũmb la b me nin-taoore n yegl wẽnd doogã. Yaa roogo woglem sẽn ta kãntɩɩs pis-wɛ, t'a yalem ya kãntɩɩs pisopoe, a lalsa taglem yaa kãntɩɩs a nu.

¹³ Raoã sɩnga wẽnd dooga magbo. Woglma yaa kãntɩɩs koabga. Wẽnd dooga ne a zakã. Yalma me yaa boto.

¹⁴ Wẽnd dooga yalem ne vɩʋʋga sẽn keesã ra yaa kãntɩɩs koabga.

¹⁵ Raoã maga roog ning sẽn da me wẽnd dooga poor woglem. Sã n naag ne vɩʋʋga sẽn kees goabg la rɩtgã, woglma yaa kãntɩɩs koabga. Wẽnd dooga pʋgẽ do kãsengã, zãongã la zakã,

Wẽnd dooga neerem

¹⁶ noya, vɩʋʋga sẽn basã, peem-leesã, b tẽngrã n ta b mensã, da maneg n tablga ne ra-neeba.

¹⁷ Wẽnd dooga yɩnga wala a pʋgẽ, al dignoorã n ta sõmblem pid sõmblem doogã, b ra gʋla b lalsã n paas b neerem.

¹⁸ Yaa malɛgs la koms vãado la b ra ning yã. Komsa vãad ne malɛgsa ra lɩʋʋsda taaba. Malɛk fãa ra tara nens a yiibu.

¹⁹ Neng a ye sẽn ya ninsaal nenga n wẽnemd n tees koanga vãoogo tɩ neng a to sẽn ya bõnyẽeg rẽnna tees vãoog a to. Yɩɩ woto zãnga n gilg wẽnd doogã.

²⁰ B ra ninga malɛgsa ne komsã al tẽngre n ta kʋɩlensa zãndlem.

²¹ Do-kãsenga noor ra-lugsã da ka gils ye, b ra yaa nags-magse. Sõmblem pid sõmblema dooga taoore b da rɩgla bũmb

Raad maan-kugri

²² wa maan-kugri. A kaa ne ra-pegdo, a zãndlema yaa kãntɩɩs a tãabo, a woglma a yiibu, a yalem a yiibu. A pẽgsã, a tẽngrã la a kɩremsã me yaa raado. La ad neda sẽn yeel-m: «Woto yaa te-roagendg sẽn dɩgl Wẽnd taoore.»

Kʋɩlense

²³ Do-songa ne Sõmblem pid Sõmblem dooga ra pagda ne kʋɩlense.

²⁴ Kʋɩlensa ra pakda goabg la rɩtgo.

²⁵ Malɛgs la koms la b ra gʋl b zugu wala lalsã. Sã n ya f sẽn tat noor ning n yaool n kẽ ro-sõngã, a ra ka tar kʋɩleng ye, yaa lill sẽn ka ne raado la b da rɩgl yɩngã.

²⁶ Zãnd kãng kɩremse ra ninga peem-lees yalemse sẽn maneg raad n ka n pɩgle, la sẽn gʋl malɛgs la koms vãado.