Ezekiyɛl 4 - SEBR SÕNGO

Zerizalɛɛm wãabo

¹ Soaala-Wẽnd paasa woto: «Ninsaal biiga, rɩk tãn-koeemde n dɩgl f taoore: sõog Zerizalɛɛm tẽngã a zugu.

² Mak wala bɛɛba kargame n gũbg-a n dat n lub-a; tu bogd n gilg-a, n me gũudb gasgo, n ning tãb-sika n gũbg-a kɛpi, yals b sẽn tar bũmb ning n tãad dotã n lubdẽ wã.

³ Rɩk kut sẽn ya paklga n sele wala kut lalga, foom ne tẽngã sʋka. Ges tẽnga marsã wa a bɛɛb gũbg-a lame n sege, la yaa foo la bɛɛbã, la rẽ na yɩ makre Israyɛl kamba yĩnga.

⁴ Gãande f nug goabga zugu la f sã n wa gãe woto, bãng tɩ f tʋka Israyɛl rĩunga yel-wẽnde f zugu la na n yɩɩ zɩɩb f yĩnga.

⁵ M na n sõda raar n kõ-f tɩ f pa woto. Rasma sõor na n taa yʋʋma sõor. Yʋʋm niyns a Israyɛl rĩunga sẽn beege. Woto wã yaa rasem kobs-tã la pis-wɛ la f na zɩ a Israyɛl yel-wẽna taale.

⁶ La f sã n wa sɛ rasem kobs-tã la pis-wɛ wã, f na wẽnemd n gãand f rɩtg nuga zugu la marsã yaa a Zɩɩda rĩunga yel-wẽndã taale la f na n zɩlg f menga, rasem pis-naase tõre. Yʋʋmd a ye beegr taale zɩta raar a ye.

⁷ Dẽ poore f na wẽnemd n tees Zerizalɛɛm sẽn mak n dɩg f taoore t'a bɛɛba gũbg n segã; f na zẽk f kanga, bɩlgemde, n tees tẽngã, la f kãab-a m meng kãab-beedo.

⁸ Ade, m na n maneg n za-f lame, woto f gãeeme la f kõn tõoge n lebg f nugu tɩ daarã sẽn sõda nan ka pids ye.

⁹ Rɩk alkam pɛɛlga, alkam pugsgu, bɛnga la sũma la alkam kɛgenga. Kalem-b laok a ye pʋga n maan dɩɩbo. Dẽ n na n yɩ fo rɩɩbo rasem kobs-tã la pis-wɛ wã f sẽn na n gãand f nug-goabgã.

¹⁰ Fo na n maga rɩ-kãng sutg a yi bala la rẽnda tog n seka f raar a ye fãa rɩɩbo.

¹¹ F tog n yũu kooma ne kẽgsgo; yaa koom wamde la f yũud daar a ye.

¹² Rɩɩbã f sẽn na n dɩ wã na n wẽnega alkam pugsgu miisdu; la f na n dõos-a-la ninsaal bĩn-koeems bugum zugu, Israyɛl kamba fãa nifẽ.»

¹³ Soaala-Wẽnd paasame: «Yaa woto la Israyɛl kambã na n dɩ dɩ-rẽgdo, tẽng ninga m sẽn na n dig-b n tɩ kẽesa pʋgẽ.»

¹⁴ Rẽ la mam yeel yã: «Ayo! Soaala-Wẽnde, m ka nin-dẽgd ye. Mam yãadmẽ tɛka n tãag marsã, mam zɩ n wãb rũn-kɩɩnga bɩ we-rũng sẽn yõke; n paas me nemd dẽgd buud zɩ n kẽ m noore ye.»

¹⁵ Tɩ b na n leok-ma: «Be neere! M sakame tɩ f bas ninsaal bĩndã, la nag-bĩndu la f na n bao n segl rɩɩbã.»

¹⁶ La Soaala meng n le paase: «Ninsaal biiga, ade, m na n menesa sẽn tõe n dɩk fãa n wẽ bur Zerizalɛɛm dãmb yĩnga. Zerizalɛɛm dãmb na fĩdsa b burã la b na n kẽgsa b kooma.

¹⁷ Bala buri la koom na n paoogame, b fãa gill na n namsa al wʋsgo la b kõn põse, b yel-wẽna yĩnga.»