Ezekiyɛl 39 - SEBR SÕNGO

Koɛɛg yɛs ne dĩma Gog

¹ Soaala-Wẽnd yeela maam: «Foo Ezekiyɛl, taas a Gog tɩ maam n yet-a t'a maan gũusgu. Ad-m sẽn yet-a, maam, Naaba-Wẽnde: ‹M na n yika ne foom, Gog, Mesek la Tubal dãmb dĩma.

² M na n kɩtame tɩ fo yi f tẽngẽ, n kɩt tɩ f yi al nug goabg yɩɩga n wa tak zabr Israyɛl tãmsã zutu.

³ M na yaool marsã n wẽ f goabgã t'a bas f tãpa t'a lʋɩ. M na n kɩtame tɩ pɛɛma sẽn be f nug rɩtga lʋɩ n sẽege.

⁴ Foo ne f tãb-biisã la f zo-rãmb ka tɛkã yãmb na n kii Israyɛl tãmsa zutu. M na n basame tɩ y lebg yɩbrendo la luiili la we-rũms rɩɩbo.

⁵ Fo na n lʋɩɩ n paa tẽnga wala m sẽn togs-fo, maam, Naaba-Wẽnde.

⁶ Mam na n widga bugum Magog tẽn-peelmẽ la mogra noorẽ tẽnsã sẽn da zĩ ne bãane. Woto la fãa na n bãng tɩ maam la Naaba-Wẽnde.

⁷ M na n kɩtame tɩ mam buud a Israyɛl bãng tɩ m yaa nin-sõngo la m kõn le bas tɩ b paoog-a ye la buud a taaba na reeg tɩ maam la Soaala, a Israyɛl Nin-Sõngã.

⁸ N-ye! Sẽn togsa na n pidsame, b pʋs n sɩnga pidsgu, m bʋʋda raar sẽn yãka kolgame. Maam, Naaba-Wẽnd n yete.

⁹ Wakat kãnga, Israyɛl neba na n yi-la b tẽnsẽ. B na n widga bugum n yõog b bɛɛba zab-teedo. Yʋʋm a yopoe tõre, bugma kõn ki ye, t'a na n dɩɩ gãndo, bɛd la bõonego, tãbdo, pɛɛm, kãna, kãn-tãoodse.

¹⁰ Neba ka na n le wɩɩg n tɩ kɛ raad weoogẽ bɩ tʋgrẽ ye; na n yɩ zab teeda la b na n tar n yõgend bugum. Bãmb n na n zɛ sẽn da zɛɛdb bãmbã la b fã sẽn da fãad b bãmba. Yaa maam, Naaba-Wẽnd, n togse.›

¹¹ Yɛla pidsgu raare, m na wilg b sẽn na n mum a Gog zĩig ning ka, Israyɛl tẽn-peelmẽ. Na n yɩɩ So-loaadba bãg-faagẽ, Yamsem Mogra yaanga. Yaooga na n kɩtame tɩ sora teem zĩ-kãnga, tɩ so-loadba bʋdg zĩ-kãnga. Yao kãng pugẽ la b na n mum a Gog ne a tãb-biisa fãa tɩ b na bool zĩ-kãng t'a Gog nedg ne nedg bãg-faaga, tɩ tusr lagem koabg bãg-faaga.

¹² Yaa kiis a yopoe tõre la Israyɛl dãmba na n tall zãma a woto fãa solgre la tẽnga rẽgda pekre.

¹³ Tẽnga rãmb fãa n na n mum kũuma la rẽ na n lebga b zu-zẽkre, mam sẽn na n wa puk m ziira raare. Yaa maam, Naaba-Wẽnd n gomd boto.

¹⁴ La kiis a yopoe wã sã n looge, b na n yãka neb kẽere tɩ b tʋʋmd lebg b saad tẽngã n mumd neb niyns sẽn nan ka paam-b mumbu, n ket n dɩg yɩnga.

¹⁵ Neba na n saaga tẽnga tõre; ned sã n yãend ninsaal kõaba, a na n dʋʋga kug n gilg-ba tɩ laagdba bãng zĩig n wa wʋk-ba n tɩ mum a Gog bãg-faagẽ.

¹⁶ Tẽng a ye meng la b na n pʋd Amona, neb kõn bãng n sõde. Na n talla woto tɩ tẽnga wa yɩlg zãnga.»

¹⁷ Soaala-Wẽnd le yeel-m lame: «Ezekiyɛl, bool luiili wã la we-rũmsã la f yeel-ba: ‹Yi-y zĩig zãng n wa tɩ maoong la m dat n kʋ y yĩnga. Na n yɩɩ maoong kãsenga, Israyɛl tãmsa zutu. Y na paam nemd n wãbe, y na paam zɩɩm n yũ.

¹⁸ Yãmb na n wãba tãb-bi-gãndaada nemdo; yãmb na n yũu tẽnga nanams kãsensa zɩɩm. Yaa bãmb la b kʋ maoong Bazã pe-raada zĩigẽ, Bazã pe-bi, boeese, la lol-nobds zĩigẽ.

¹⁹ Yaa maoong kãng la m boond-y tɩ y wa. Nem-kaam na yidg y yam, zɩɩm na lub-y wala rã-toose.

²⁰ Mam dɩɩba roogẽ, y na n wãb n tɩge: wiidi, wed-dʋʋdba, gãndaado, tãb-biis toor-toore. Dẽ yaa maam, Naaba-Wẽnd, n yete.›

²¹ M na n puka m ziira bu-zẽna nifẽ. B na yãend m pãnga sẽn tʋmd tʋʋmd ninga n pidsd m sẽn kãabe.

²² Israyɛl buuda me na reeg baraar tɛka, tɩ maam la bãmb wẽnde.

A Ezekiyɛl tʋʋmde

²³ Tẽns a taaba me na n bãngame tɩ b talla Israyɛl kamba n loog pa-weere b sẽn beeg maama yĩnga. M daag-b lame n bas b bɛɛba nusẽ la zabr sʋʋg n kood-b zãnga.

²⁴ Mam sẽn daag-b n basã, m maana sẽn da tog ne bãmb tʋʋm wẽna, b tʋʋm dẽgda.

²⁵ La ade, ya woto marsã la m gomda, maam, Naaba-Wẽnde: ‹Marsã tɛka m na n kũma Israyɛl dãmba nimbãanega, m na n kũma a Zakoob nimbãanega. M na n teka b yellã la ned kam fãa na n modgame tɩ b ra le paoog m yʋʋr sõnga ye.

²⁶ B na yĩma b tʋʋm yooda sẽn zɩlg-b yãnd la paoor ningã. Woto me la b na n le paam n vɩɩnd b tẽngẽ ne laafi, tɩ ned ba a ye ka na n le yɛɛs-b ye.

²⁷ Mam sã n tɩ yiis-b b bɛɛba sʋka, m na tall-ba n wa b tẽngẽ. Na n tũu ne bãmb wilgri tɩ bu-zẽmb ka tɛka sẽn gũbg bãmba bãng tɩ maam la Na-Sõng a Wẽnde.

²⁸ Bãmb meng na reege tɩ maam la Soaala, bãmb Wẽnnaam, m sã n wa tigim-ba n ka tol n yĩm ned ba a ye a pa-weer tẽngẽ ye.

²⁹ M na n pʋdga a Israyɛl kambã m meng yam la m yam kõn le lak ne bãmb bada. Yaa maam, Naaba-Wẽnd, n gomd boto.› »