Ezekiyɛl 36 - SEBR SÕNGO

A Israyɛl na n le sooga a menga

¹ «La foom, Ezekiyɛl, pĩnd n gom a Israyɛl tãmsa poorẽ. Fo na n wilg-b lame tɩ b kelg

² maam, Naaba-Wẽnd, sẽn yet-ba: ‹Y bɛɛba pusga laado la b yeelame: a Israyɛl ne a tãmsa yaa tõnd n so!›

³ Ad yaa rẽ yĩnga, Ezekiyɛl, la m yet tɩ f taas Israyɛl kamba woto: ‹M yãendame tɩ sẽn lebẽ fãa, b yika zabr ne y tãmsã. Wʋsg tʋlgame n soog-ba, la b sɩd waa n lʋɩ bu-zẽmb soolmẽ, la bu-zẽmba sɩnga laad la tʋʋre.›

⁴ Dẽ yĩnga, gom ne b woto: ‹Israyɛl tãmse, kelg-y maam, Naaba-Wẽnde, sẽn kãabd bũmb ninga, y tãmse, y kunkuba, y kʋɩls sẽn zoet ne rãamde, y bãado, y raboodo, y tẽn-wãando. Yãmb yagsa pidsa yãmb ne naong la paoore.

⁵ Sẽn ya woto wã, maam m yete, maam, Naaba-Wẽnde, tɩ m sũura puugame tɩ m yet a Israyɛl yagsã, maan gũusgu, bũmb zãnga a Edom, tɩ tẽn-bãmb yika ne kɩdengo, n yik ne tɩtaam, n deeg m tẽngã la b zɛɛ a rũmsi.›

⁶ Woto yĩnga, Ezekiyɛl, taas a Israyɛl m koɛɛgã. Yeel tãmsã, kunkubã, kʋɩlsa sẽn zoet ne rãamdã la bãadã, tɩ maam, Naaba-Wẽnd, na n basa m sũura t'a fudgi. Yeel-ba: ‹Bu-zẽmba tʋʋsa yãmba, n paoog yãmba.

⁷ Sã n ya maam, Naaba-Wẽnde, m zẽka m nugu la mam kãabdame tɩ tẽnsa sẽn gũbg yãmba, n tʋʋsd yãmbã, dẽ fãa na n leb-b lame.

⁸ Badaare, Israyɛl tãmsa zutu tɩɩsa na n tãoo will la vãado, n wom biisi mam buud a Israyɛl yĩnga, la kõn le kaoos t'a kamba leb b tẽngẽ ye.

⁹ Ade, m na n maana bũmb y yĩnga, m na n kɩtame tɩ b le ko tẽngã la b bʋd-a.

¹⁰ M na n kɩtame tɩ neba me sõor paase, tɩ neb leb n wa kẽ tẽnsã. Tẽns niyns sẽn wã-ba na n le meeme.

¹¹ Ninsaalba la rũmsa sõor na n paasame. Y sõora pʋs n na n yɩɩ wʋsgo, y yagensa na n yɩɩ ka tɛka. Tẽnga na n le pida neb wa pĩnda, y arzɛka na n yɩɩga pĩnd dẽnna. Woto y na reeg tɩ maam la Naaba-Wẽnde.

¹² Mam na n kɩtame tɩ m buud a Israyɛl kamba kẽ tẽngã, n karg-a, n soog-a la a kamba kõn le yi n bas-a ye.

¹³ Ad-m sẽn yete, maam, Naaba-Wẽnde: B yetame tɩ Israyɛl wẽnda bõn-ninda sẽn wãbd a meng kamba.

¹⁴ To! Dũnna tɛka tẽnga kõn le wãb a kẽedb ye; a kõn le reeg neba kamba n bas-b ye. Dẽ yaa maam, Naaba-Wẽnd, n togsde.

¹⁵ M na kɩt tɩ f ra le wʋm tẽns a taba tʋʋr la b laad ye. Y tẽnga kõn le bas t'a kamb ki ye. Maam n gomd boto, maam, Naaba-Wẽnde.› »

Soaala na n tigma a Israyɛl

¹⁶ Soaala-Wẽnd goma ne maan n yeele:

¹⁷ «Ninsaal biiga, kelge: a Israyɛl kamba sẽn da waa n ket b tẽngẽ wã b tʋma tʋʋm yoodo n dẽgem tẽngã. B rẽgda looga pag sẽn nan ka pek rẽnna.

¹⁸ B rẽgma tẽnga ne nin-kʋʋre la wẽn-naands waoogre. Yaa rẽ la mam sũur puug ne bãmb al wusgo.

¹⁹ Mam sẽeg-b-la zĩis fãa, m sẽeg-b-la tẽn-zẽmbẽ. Dẽ la sɩbgr ning m sẽn sɩbg-ba, b tʋʋm yooda yĩnga.

²⁰ La b sẽn zĩnd tẽns niynsã, be me b sãama m yʋʋr sõngã, tɩ b ra gomd bãmb poorẽ n yetẽ: ‹Yaa Naaba-Wẽnd kamba la b yiis-b-la b tẽngẽ.›

²¹ Woto wã Israyɛl sẽn tɩ kẽ bu-zẽmba tẽnsẽ, a maaname tɩ b paoog la b sãam m yʋʋre. Rẽ nams-m lame.

²² M yet-f lame, Ezekiyɛl, tɩ f taas-ba m koɛɛg kãnga: ‹M sẽn na n maan bũmb ninga, Israyɛl kamba, ad-y ka y vɩɩm sõnga la mam get ye. M pa ratame bala tɩ b paoog m yʋʋr sõngã, bu-zẽmba tẽnsẽ, y sẽn sẽeg n be zĩis niynsã.

²³ Ne y sẽn paoog maam bãmb taoorã, m na wilg-ba, ne m sẽn na n maan y yĩngã, tɩ maam la Na-kãseng, Na-Sõngo, Naaba-Wẽnde. Yaa maam n gomda.

²⁴ M sã n wa yiis-y buud niynsi la tẽns niyns y sẽn be rũnna wã, m na n tigim-y lame n tall-y n tɩ lebs y tẽngẽ.

²⁵ M na n dɩka ko-yɩlgemde n waal yã, n pek wẽn-naandsa pʋgbã sẽn dẽgem yãmbã.

²⁶ M na n kõo yãmb sũ-paalga, la yam paalga, m na n yãka yãmb sũurã sẽn ya kugrã n ledg sũuri sẽn deegd saglgo.

²⁷ M na n pids-y-la ne m meng yam, y na lebg neb sẽn deegd gomde, sẽn deegd m noya la sẽn tũud m sẽn yalse.

²⁸ Yãmb na tõog n zĩnd tẽng ninga mam sẽn kõ y ba rãmba. Yãmb na n yɩɩ mam neba, la mam na n lebga yãmb Wẽnnaam.

²⁹ M na yiis-y y rẽgdẽ wã fãa; m na n kɩtame tɩ yãmb paam kood tɩ sek yã, la kom kõn leb n lʋɩ y tẽngẽ ye.

³⁰ M na n kɩtame tɩ tɩɩs wom biis wʋsg-wʋsgo, tɩ pʋtã fãa sake, la yãnd kõn le yõk-y bu-zẽmba taoore tɩ y zĩi ne kom ye.

³¹ Dẽ me la y na n tẽeg y yel-wẽnã, la y tʋʋm dẽgdã yelle. Y na tẽeg rẽ tɩ y sũur yaale.

³² Bãng-y tɩ ka yãmb yĩnga la m tʋmd m tʋʋma ye, yaa m yʋʋra kõn sãam la m tʋmda, Naaba-Wẽnd, n gomde. Bãng-y rẽ la y zoe yãnde, Israyɛl kamba.›

³³ Ad-m sẽn wilgdi, maam, Naaba-Wẽnde: ‹M sã n wa pek y yel-wẽna zãnga m na le pids y tẽnsa ne neba, tɩ sẽn da sirg fãa le maneg n me.

³⁴ B na n le sɩnga pʋ-weesa koobo; so-loaadba kõn le yãend pʋt sẽn ka ko ye.›

³⁵ B na n yeelame: ‹Tẽn-kãnga ra lebga zĩ-peen-daaga la ad-a sẽn lebg wa Eden zẽedo. Tẽns sẽn da wã, dot sẽn da tus n lubi, fãa le manegame n me n yals ro-bɛd sẽn tar pãnga, tɩ neb me be b pusẽ.›

³⁶ Tẽns niyns sẽn kell-b yãmb sɛɛgẽ wã na bãng tɩ maam, Naaba-Wẽnd, lebsdame n me raboodo la m kood pʋ-weese. Dẽ yaa mam koɛɛga la m na n pidsa m kãabgo.

³⁷ Yaa maam m gomde: ‹M na n le basa Israyɛl kamba tɩ b kos m sõngre, la m na n deega b kosgo la ma na n kɩtame tɩ b fɩɩg wa bãgr piisi.

³⁸ Kibs bɛda wakato, Zerizalɛɛm da pita ne maanda sẽn da na n kʋ wã rũmsi. B ra wata ne b zembala. Ade, neb niyns sẽn na n le wa kẽ y raboodã sõor na n ta boto. Dẽ me la neba fãa na n deeg tɩ maam la Naaba-Wẽnde.› »