Ezekiyɛl 34 - SEBR SÕNGO

A Israyɛl pe-kɩɩmba

¹ Soaala-Wẽnd goma ne maam woto:

² «Ezekiyɛl, zab ne Israyɛl pe-kɩɩmbã la f taas-ba m sẽn yet tɩ b gũus ne bũmb ningã. Maam n yet-ba, maam, Naaba-Wẽnde: ‹Yell na pak yã, Israyɛl pe-kɩɩmba! Y geta y mens yelle. Yaool n yaa bãgrã la pe-kɩɩma tog n gese.

³ Yãmb basda bãgra piisi. Y sẽn mi bal yaa y rɩlg y meng ne bĩisima la y yeelg kõbda futã la y kʋ pe-nobdsã n wãbe.

⁴ Yãmb ka ges pe-waga yell ye, yãmb ka tɩbs bãad-dãmb la sẽn pogl-ba ye. Yãmb ka lek pesg ninga sẽn da bʋdgda ye, la y ka bao sẽn da menem-a wã ye. Yãmb ka zã-b neer ye, y maan-b-la pãn-tõogo.

⁵ Woto, pe-kɩɩm sõng kaalem yĩnga, piisa sẽegame n lebg we-rũms rɩɩbo.

⁶ Mam piisa kẽngame n tɩ menem tãms la kunkub zutu, mam piisa sẽega zĩis fãa tẽng zugu, la ned ka lob a toog ye, ned ba a ye ka sa n bao-b ye.

⁷ Dẽ wã yĩnga, Israyɛl pe-kɩɩmba, kelg-y Soaala-Wẽnd gomde:

⁸ Sɩd ne sɩda, maam, Naaba-Wẽnde, Vɩɩm Naaba, m yam ya n yii ne b sẽn basd m piisa ne fãadbã. Pe-kɩɩmb kaalem yĩnga, piisa lebga we-rũms rɩɩbo. M pe-kɩɩmba ka ges b yell ye. B basa piisa gesg n ges b meng yelle.

⁹ Boto wã yĩnga, Israyɛl pe-kɩɩmba, kelg-y!

¹⁰ Maam, Naaba-Wẽnde, m wilgd-y lame tɩ m na n yika ne-yã, la y ka na n le zã m piisa ye. Ka yãmb n na n le ges b yell ye, la y kõn le rɩ b yõod ye. M na deega y noorẽ m bãgra rũmsi, y kõn le rɩlg y mens ne b ye.

¹¹ Ad-m sẽn yete, maam a Naaba-Wẽnde: Marsã tɛka m meng m toore, n na n ges m piisa yelle. M meng n na n gũ-ba.

¹² M na modg n le tigim-ba wala pe-kɩɩm sẽn maande, a piisa sã n sẽege. M na n tɩ bao m rũmsã b sẽn tɩ sẽeg zĩig ning fãa, sa kãsenga niiba raare.

¹³ M na yiis-b bu-zẽmb tẽnsẽ, b sẽn be zĩig ning fãa; m na tall-ba n wa tigim la m le tall-b n wa b tẽngẽ. M na tall-ba n dʋʋs Israyɛl tãmsã, a bãg-faasã, tẽnga sẽn sakd zĩigẽ fãa.

¹⁴ M na n kɩtame tɩ b kẽes-b yam nood zĩigẽ. B wãbneg zĩig na n yɩɩ Israyɛl tãmsa zutu. Beelẽ b na n paama vʋʋsg la yamd nood zĩiga.

¹⁵ Maam n na n yɩ b pe-kɩɩma. M na n fãag-b-la ne we-rũmsã. Yaa maam, Naaba-Wẽnd, n yeele.

¹⁶ Pesg ninga sẽn meneme, m na bao-a n tall n wa; sẽn pogl-a, m na tɩbs-a; la sẽn bẽed-a, m na sãoog-a t'a paam pãnga. Sẽn nob-a tɩ looge, sẽn tar-a pãng tɩ looge, m na yiis-a. M na yɩ pe-kɩɩm ning tʋʋmde sẽn be yõodo.›

Soaala wata b buuda sõngre

¹⁷ Sã ya bãgrã, ad-m sẽn yete, maam, Naaba-Wẽnde: ‹Mam na n ges sẽn be piisa ne taab sʋka, sẽn be pe-raada la boeesa sʋka.

¹⁸ M na bãng sẽn ya bũmb ning yĩnga la rũms kẽer ka rat n pa wãbneg zĩis sẽn ya sõmb n yɩɩd zĩis a taaba. M na bãng bõe yĩng la b tabd yamda sẽn ketã, tɩ ko-yɩlemda sẽn na n yũ wã pa tat b yam, tɩ b na n deng n bendga ne b nao?

¹⁹ M na bãng yaa bõe la rũmsa bogr na n kong n wãbd yamda kẽer sẽn tabe la b yũud kooma b sẽn bendgã.

²⁰ Yaa rẽ me yĩnga la maam, Naaba-Wẽnd, yet-y woto: m na bʋ n ges sẽn ya bũmb ning n be rũm-waglsa la sẽn nob-ba sʋka.

²¹ Sẽn nob-ba tusa ne b bãgdo la b lʋga, piis niyns sẽn ka tar-b pãngã. B tãad-b-la ne y yɩɩla n wa rig-b n yiis bãgrẽ.

²² M wata b sõngre, tɩ b ra le bas-b ne we-rũms ye la m na n yalsa yãmb ne bãmb sʋka.

²³ M na n lʋɩɩsa m bãgra taoore, pe-kɩɩm yɛnga, sẽn na n bãng a gesgo. Na n yɩ-la m tʋʋm-tʋmd, a Daviid. Yẽ na n gesa bãgra rũms yelle la a na n yɩɩ pe-kɩɩm sõngo.

²⁴ Maam, Naaba-Wẽnde, m na yɩ bãmb Wẽnde la m tʋʋm-tʋmd a Daviid na yɩ b na-biiga. Yaa maam, Naaba-Wẽnd, n yet rẽnna.

²⁵ Mam na n kɩtame tɩ laafi zĩnd rũmsa bãgrẽ, n kɩt tɩ we-rũmsa menem tẽnga pʋgẽ. Woto rũmsa na zĩnd ne laafi, b wãbneg zĩisẽ, b na gũs ne laafi b bãgrẽ.

²⁶ M na n kõ-b-la sore tɩ b pa m tãn-sõnga sɛɛga. M na kɩt tɩ saag ni a wakato, n wa ne kũun toor-toore.

²⁷ Tɩɩsa na n womame, la tẽnga kood me na n bɩɩme, tɩ ned kam fãa zĩ tẽnga ne laafi. M na n kao bãeensã sẽn loe m buuda neb kẽere, m na n fãag-b-la b zu-soaben-dãmb nusẽ la woto la b bãngd tɩ maam la Wẽnde.

²⁸ Bu-zẽmba me kõn le wa yõg-ba tɩ b lebg b pʋɩɩr ye, we-rũmsa me kõn le wãb-b ye. B na n vɩɩnda ne laafi, tɩ bũmb ka leb n kẽes-b rabeem ye.

²⁹ M na n kõ-b-la pʋto sẽn ka be tar ne wombo, la kom kõn le nams tẽnga rãmb ye. Tẽns a taaba kõn le paoog-b ye.

³⁰ Woto b na bãng tɩ maam b Wẽndã, toog bee ne bãmba la a Israyɛl buuda la m buudu. Yaa maam, Naaba-Wẽnd, n yeele.

³¹ N-ye, yãmba, m bãgra piisi, m geta y yelle tɩ maam la yãmb Wẽnde. Yaa mam menga, yaa Naaba-Wẽnd n togse.› »