Ezekiyɛl 29 - SEBR SÕNGO

Ezipt poorẽ

¹ Babilon pa-weera kẽnd yʋʋmd piig soaba, kiuug piig soaba, kiuuga piig la a yiib daare, Soaala-Wẽnd goma ne maam:

² «Ezekiyɛl, kedg n tees Ezipt dĩma la f pĩnd n togs-a yell ninga sẽn na n paam-a, yẽ ne Ezipt tẽng fãa gilli.

³ Ad-m sẽn yete, maam, Naaba-Wẽnde: ‹M na n yika ne foo, Ezipt dĩma, fo wẽnda rũn-bãndã sẽn tẽeg a meng n gãe Nil pʋga. Fo yetame tɩ kʋɩl-kãnga yaa f soolem, a yaa f nug tʋʋmde.

⁴ M na n ninga bãn-kõse f yɛgẽ, n kɩt tɩ Nil kʋɩl-zẽeda pɛ fo yĩnga pagda fãa. M na yiisa foom Nil koomẽ, foo ne kʋɩl-zẽedã sẽn pɛ f yĩnga pagdã.

⁵ M na n loba yãmb zĩ-pɛɛlẽ. Fo na n paa zĩ-koɛɛngẽ. Fo kõn paam dɩkre, fo kõn paam mumb ye. M na n kɩtame tɩ f lebge we-rũmsi la yĩngri luiili rɩɩbo.

⁶ La woto Ezipt neba fãa na bãnge tɩ maam la Naaba-Wẽnde. Sõngr ning a Israyɛl sẽn paam f nengẽ na n wẽnega ned sẽn baoode bũmb sẽn na n tar n tikdẽ tɩ b kõ-a rudumdi.

⁷ Gese, rudumdi, foo la b wudg n gãnde tɩ fo wẽneg n kao b nusẽ, la fo sẽn kao f pogla b bãoko la bãok sẽn pogle b basa raoodo.›

⁸ Yaa rẽ yĩnga la m gomda, maam, Naaba-Wẽnde: ‹Tãb-biis la m na n yiis tɩ b tak zabr ne foo la m na n menesa f neb la f rũmsi.

⁹ Ezipt tẽng na n lebga zĩ-peen-daaga, na n lebga raboogo. Boto b na bãng tɩ maam la Soaala-Wẽnde. Fo sẽn yet tɩ Nil yaa fo n so wã, t'a yaa f nug tʋʋmna, d na ges sɩda sẽn beẽ.

¹⁰ Bãng tɩ foo ne Nil dãmba fãa yell sãamame. M na n kɩtame tɩ Ezipt tẽnga lebg tẽn-wãoongo, sũ-sãang zĩiga, sẽn sɩng Migdol nug goabga, n ta Asuwã la Ezipt toaag, nug rɩtgo.

¹¹ Ned bɩ rũng naoor kõn leb n tag be ye. Yʋʋm pis-naas pʋgẽ, bõn-vɩɩg kõn le zĩnd be ye.

¹² M na n kɩtame tɩ Ezipt tẽnga lebg zĩ-peen-daaga, zĩ-peen-daasa sʋka; a tẽn-bɛda na n lebga raboodo wa b sẽn zɩ n yãend a taare. Dẽ na n maana yʋʋm pis-naase, la m na n modgame tɩ b sẽeg nin-zẽmb tẽnsẽ.›

¹³ Ad-m sẽn paasde, maam, Naaba-Wẽnde: ‹Yʋʋm pis-naasa sã n wa pidi, m na sa Ezipt rãmba sẽn sẽeg zĩig ningã n tigs-ba.

¹⁴ M na n sɛɛsa b nimbãanegã la m na n kõ-b-la sore tɩ b leb n wa b buuda tẽngẽ, Ezipt tẽn-zugẽ.

¹⁵ B na n le vigla rĩung sẽn ka zem fɩ, rĩung sẽn ka tar pãng a taaba sʋka, rĩung sẽn ka le tõe n kẽes rĩung a to a soolmẽ, tɩ m na n wooga a neba sõor wʋsgo.

¹⁶ Israyɛl kamba ka na n le sak n teeg Ezipt ye. A Israyɛl me kõn le maan wẽnga, n bas maam, Naaba-Wẽnd teegre, n teegd Ezipt ye. Woto me la b bãngd tɩ maam la Naaba-Wẽnde.› »

A Nabikodonozor ne Ezipt

¹⁷ Pa-weera kẽnd yʋʋmd pisi la a yopoe soaba, pipi kiuuga, kiuuga pipi daare, Soaala-Wẽnd goma ne maam:

¹⁸ «Ned biiga, Babilon dĩm a Nabikodonozor yika ne pãng la raoodo n tɩ zab ne Tir. Tãb-biisa zuta fãa waa n wurame tɩ b bãgdã fãa meede. La zabra sẽn tak woto ne Tir ka zĩnd yõod a yĩnga, tɩ b gomd a zab-zabdba.

¹⁹ Woto wã, ad maam, Naaba-Wẽnd, sẽn yete: ‹Maam n na n dɩk Ezipt n sagl Babilon dĩm a Nabikodonozor nugẽ. A na n wʋka b arzɛka fãa n kuli la a sãam tẽngã. A na n looga ne a arzɛka fãa. Dẽ n na n yɩ a zab-zabdba yaoodo.

²⁰ A sẽn ka zoe toogo ne a tʋʋma, mam dɩkda Ezipt tẽnga n ning Babilon dĩma nugẽ t'a soog-a, wala a yaoodo, tɩ yaa mam yĩng la a tãb-biisa tʋm yã.› Yaa maam, Naaba-Wẽnd n yet rẽnna.

²¹ Badaare m na n kɩtame tɩ Israyɛl raooda le paase. La sã n ya foo, Ezekiyɛl, m na n kõ-f-la sore tɩ f gom ne-ba tɩ b bãng tɩ maam la Soaala.»