Ezekiyɛl 25 - SEBR SÕNGO

Koɛɛg ne Amonitsã

¹ Soaala-Wẽnd goma ne maam n yeele:

² «Ezekiyɛl, taas Amonitsa tɩ m zabr n be ne-ba.

³ Fo na n yeel-b lame tɩ b kelg maam, Naaba-Wẽnd, sẽn yet-ba. B sẽn waa n dẽgem m do-sõngã, n sãam Israyɛl tẽnga, n tall Zɩɩda rãmb n loog pa-weere, bãmb kaasa sũ-noogo.

⁴ Woto wã m na n kɩtame tɩ yaang we-gõaadba wa soog y tẽnga. B na n ti-la b gãnda rot yãmb tẽn-peelmẽ. Bãmb n na n dɩ y tɩɩsa biisi, bãmb n na n yũ y tẽnga bĩisim.

⁵ M na n kɩtame tɩ Raba, y na-tẽnga, lebg yʋgma bãgre, t'a Amon tẽn-peelma lebg piis wubri. Woto la y bãngd tɩ maam la Naaba-Wẽnde.

⁶ Ad-m sẽn paasde, maam, Naaba-Wẽnde: ‹Fo wẽe nug pogs la f saoome, fo nooga f sũuri, yel-beeda sẽn lʋɩ a Israyɛl zug yĩnga. F pa ges m buuda ne waoogr ye, f maana beem ne-a.

⁷ Mam me na n wilg-f-la m pãnga n bas-f bu-zẽmb nusẽ tɩ b loog ne f paoonga fãa. F buuda yʋʋr na n menema buud a taab sʋka, f ka na n le paam tẽng ye, m na n sɛɛs-f-la zãnga. Woto la f bãngd tɩ maam la Naaba-Wẽnde.› »

Koɛɛg ne Moabitsã

⁸ Yaa woto la m gomda, maam, Naaba-Wẽnde: «A Moab n yeele tɩ Zɩɩda rãmba me yaa neb wa b taaba.

⁹ Ade, m na wãa tẽns niyns fãa sẽn zao Moab tãmsa pennẽ, a tẽn-neeb wala a Bɛt-Yesimot, a Baal-Meõ la Kiriyatayim.

¹⁰ B na n yɩɩ Yaang rãmba soolem, bãmb n paas Amon dãmba. Tẽnga na n lebga bãmb soolem al tɩ b ka le tẽeg a Amon yell meng bu-zẽmba sʋk ye.

¹¹ M na n sɩbg a Moab wa sẽn segde. Woto b na bãng tɩ maam la Soaala-Wẽnde.»

Koɛɛg ne Edomitse

¹² Ad maam, Naaba-Wẽnd, sẽn leokde: «Edomitsa doka b sũur ne Zɩɩda la yaa rẽ la b beegrã.

¹³ Maam na tẽega m nugu a Edom zugu, la m na n kʋ-la a neba la a rũmsa fãa; a na n lebga zĩ-peen-daaga, al Teman sɩngrẽ n ta Dedã, b tãb-biisa na n paa zabrẽ.

¹⁴ M na n basa m buud a Israyɛl t'a rok m sũur ne Edomitsa n kõ-ma. Israyɛl na n maana ne-ba wala a sũ-fõora sẽn date, woto b na bãng tɩ b ka beegd maam zaalem ye. Yaa maam, Naaba-Wẽnd, n gomd boto.»

Koɛɛg ne Filisti rãmba

¹⁵ Ad-m sẽn leokde, maam, Naaba-Wẽnde: «Filisti rãmba tuga beem ne maam. B yika ne tɩtaam n na n dok b sũuri ne b bɛ kʋdgo n sãam a yell zãnga.

¹⁶ Boto wã yĩnga, mam yet-b lame, maam, Naaba-Wẽnde, tɩ m na n wilg-b-la m pãnga. M na n menesa neb niyns fãa sẽn yi Kaftor n wa kẽed mogra noore.

¹⁷ M na n doka m sũuri, m na n sɩbg-b lame tɩ wʋm-ba. La woto b na bãng tɩ maam la Soaala.»