Ezekiyɛl 22 - SEBR SÕNGO

Zerizalɛɛm beegre

¹ Soaala-Wẽnd goma ne maam woto:

² «Ezekiyɛl, segl f menga tɩ yaa foo n na kao Zerizalɛɛm bʋʋdo, tẽng ning sẽn nong zɩɩm fõogra bʋʋdo. Modg t'a bãng t'a wɩɩbame.

³ Taas-a maam, Naaba-Wẽnd, sẽn yete: ‹Fo basdame tɩ f tẽnga rãmba kʋʋd neba. Ad-b sẽn maand woto b segenda f wãabo. B rõogda yel-yaalse, wẽn-faado, n dẽgemd f tẽnga.

⁴ Zɩɩma sẽn daaga taal la f tʋk f zugu, la wẽn-naandsa peesgo me rẽgma f tẽn-peelma. Fo meng n takde n pẽnegd f menga f wãaba raare. F wãaba raar sõd n dɩgame. Yaa rẽ la m bas tɩ f lebg tẽn-zẽnsa fãa laado, dũni wã fãa laado.

⁵ Fo yʋʋra sãamame, bũmb ka le kẽnd tɩrg ye. Sẽn pẽ-ba wala sẽn zãr-ba na n laa foo.

⁶ Ges Israyɛl, fo pʋgẽ, rĩm-biig fãa, zʋʋgda a tõogo, tɩ kũum kʋʋda.

⁷ Israyɛl pʋgẽ, biig sãbsda a ba la a ma, n namsd sãana, n yũud kɩɩb la pʋg-kõor zɩɩm.

⁸ M wẽnd doog ka paamd waoogr ye, vʋʋsg raar lebga wa da-zaan-daare.

⁹ F pida ne munaafɩgs sẽn daagd b taab zɩɩm. F neba rʋʋda tãmsa zutu n dɩtẽ la b wɩɩbdẽ.

¹⁰ Kẽer yooda ne b ba paga. Pag sẽn pa yɩlg meng yãeta pãn-tõogo.

¹¹ Kẽer yooda ne b taab pagba, kẽer doda b bi-pagba bɩ b yaop pagba.

¹² Fo nengẽ b reegda ligd n daagd zɩɩm, fo pengda ligdi n deegd roaglse, n deegd roaglg tɩ loogdẽ. F maanda f taab pãn-tõogo, n deegd b laogo. La maam, Naaba-Wẽnde, b yĩmda maam zãnga. Yaa woto la m sẽn ne.

¹³ M na n gila m nugu n tees foo, Zerizalɛɛm, f ligd baoora yĩnga la f sẽn daagd zɩɩma yĩnga.

¹⁴ M sok n gese: M sẽn na n yik ne yãmba raare, y na paam raood la sũ-keelem n yals m taoore? Maam, Naaba-Wẽnde, na pidsa m sẽn yeelã.

¹⁵ M na sẽeg-y-la bu-zẽmb sʋka, n sẽeg-y sẽn ka y saam-biis sʋka, m paam tɩ y tʋʋm-dẽgda fãa sɛ.

¹⁶ Y yʋʋra na n sãama buud a taaba sʋka, a kõn le yi ye. La rẽ la y reegda tɩ maam la Naaba-Wẽnde.› »

¹⁷ Wẽnd gomame n wilg maam woto:

¹⁸ «Adem biiga, ad mam nifẽ a Israyɛl buuda wẽnda kut sẽn ka yẽneg boaagẽ n ket n tar rẽgdo. A Israyɛl wẽnda kutu, zũudu, zũud wɩsbre, namdo sẽn ning boaagẽ n na n tõog n yɩlge.

¹⁹ Yaa rẽ yĩnga la maam, Naaba-Wẽnd, gomd woto: ‹Yãmb fãa lebga wa kut sẽn ka yɩlge, woto m na n tigs-y-la Zerizalɛɛm.

²⁰ Wala b sẽn sagend boaagẽ, zũudu, kutu, namdo, zũud wɩsbre, n zug-b tɩ b yẽneg, wotome m na tigs-y m sũ-puura boaagẽ n yẽneg-y zãnga.

²¹ M na n tigs-y-la Zerizalɛɛm n yõog-y ne m sũ-puura bugum, n yẽneg-y wa kutu.

²² Wala b sẽn yẽnegd wanzurf boaagẽ, wotome m na yẽneg yãmb boaagẽ; la woto y na bãng tɩ yaa maam, Naaba-Wẽnde, n waag-y ne m sũ-puur bugum.› »

²³ Soaala-Wẽnd paasa woto:

²⁴ «Ninsaal biiga, yeel Israyɛl tẽnga rãmba tɩ b tẽnga wẽnda tẽng sẽn kong saaga, n kong sa-luka. M sũura na n puuga ne-ba n kʋɩɩs-b wa pʋʋg sẽn ka paamd saaga.

²⁵ Wala gɩgemde sẽn yãbda la a tõsd rũnga, tẽnga taoor dãmb kʋʋdame la b loogd ne b taab paoongo, la b paasd pʋg-kõap sõore.

²⁶ Maan-kʋʋdba tõdga m noya, n dẽgem m doogo. B ka bakd bõn-wẽng ne bõn-sõng ye; b ka wilgd bõn-dẽgd n bak ne sẽn ka rẽgd ye. B pa waoogd vʋʋsg raar ye. Woto wã ned ba a ye ka waoogd maam wala sẽn segd ye.

²⁷ Tẽnga taoor dãmba yũuda b neba zɩɩm wa rigd-n-yĩidsi. B kʋʋdame n na n paas b arzɛka.

²⁸ Tẽnga bãngdba solgda rẽ fãa n bas n gomd zirẽ-be-likri la b yet tɩ maam n yeel woto la woto tɩ maam, Naaba-Wẽnd yaool n pa yaag m noor ye.

²⁹ Tẽnga neb sẽn mi yaa pãn-tõogo la fãabo. B namsda naong rãmba la nug ka-zãad rãmba. Sãamba nengẽ yaa serg la f kõ-m zĩiga.

³⁰ Bãmb fãa sʋka m bao ned sẽn na n yik n me lal-gũbri bɩ ned sẽn na n yik n yals lalsa sẽn wurg zĩig ningã, n zab n sõng tẽnga rãmba la a gɩdg-m tɩ m da wãa-a ye, la m pa yãend ned ye.

³¹ Dẽ la m sũura fudg n waag-ba, m basame tɩ sũ-puura bugum dɩ-b zãnga. M basa b wẽnema t'a lɛɛg lʋɩ b zugu. Maam, Naaba-Wẽnd, n togsd rẽnna.»