Ezekiyɛl 21 - SEBR SÕNGO

Kibar yooko a Israyɛl yĩnga

¹ Naaba-Wẽnd yeel-m lame:

² «Wẽnemd f ritgo, ninsaal biiga, gom ne ritg rãmba, gom ne Negɛb tʋgrẽ dãmba.

³ Yeel-b tɩ b kelg koɛɛgã maam, Naaba-Wẽnd, sẽn togsd googa poorẽ. M na n yõgna bugum sẽn na n dɩ tɩɩsa fãa, maas bɩ koeemse. Bũmb kõn tõog n kiis bug-kãng ye. A na n yii rɩtgo n ta goabga la a na n dɩɩ fãa.

⁴ Ninsaal fãa na bãnge tɩ yaa maam Naaba-Wẽnd n ning bugma la ned kõn tõog n kiis-a ye.»

⁵ La m yeelame: «Naaba-Wẽnde, ad-y b zoe n wɩta maam n yet tɩ m gomda ne yelbũna.»

⁶ Tɩ Naaba-Wẽnd na n leoke:

⁷ «Ezekiyɛl, tees f neng Zerizalɛɛm, gom wẽnd dooga poorẽ, gom Israyɛl tẽn-tõra poorẽ.

⁸ Yeel-b tɩ maam, Naaba-Wẽnd, n yet woto: ‹M na n yika ne yãmba m na n wõoga m sʋʋga, n kʋ-y zãnga, nin-sõng la yel-maanda.

⁹ Yaa nin-sõng la yel-maand menesg yĩnga la m sʋʋga wõog yã. A wõoga nin-vɩɩg fãa yĩnga, Goabga rãmba wala rɩtg rãmba yĩnga.

¹⁰ Neba fãa na bãnge tɩ yaa maam, Naaba-Wẽnde, n wõog m sʋʋga. M kõn lebs-a a wʋʋgẽ ye.›

¹¹ La sã n ya foom, Ezekiyɛl, zõond ne sũ-sãanga, n waas b fãa taoore.

¹² La b sã n sok tɩ yaa bõe tɩ f waasdẽ, f na leoke: ‹Kibar n na n wa, la sũur fãa na n kiuusame, nug na n digame, tɩ yam bondge, tɩ rũmd sao kalwaare. La ade yella taa-d lame n sɛ. Soaala-Wẽnd n yete.› »

Sʋʋga poorẽ koɛɛga

¹³ Soaala-Wẽnd goma ne m woto:

¹⁴ «Adem biiga, gom bãngr goama, taas ninsaalba maam, Naaba-Wẽnd, sẽn togsde. Ad sʋʋga, sʋʋg sẽn saas n le saase.

¹⁵ A saasa vargr yĩnga, a saasame n yãgd wa saag sʋʋga;

¹⁶ Maam n yet tɩ b saas-a tɩ ned wa rɩk-a n yulumnẽ. B saas-a lame t'a yãgda n na n ning-a nin-kʋʋd nugẽ.

¹⁷ Kelme, wiisi, Adem biiga, tɩ b saas-a-la mam buuda yĩnga, a saasa Israyɛl dĩm-biisa yĩnga, tɩ bãmb me na n naagame n ki. Dẽ yĩnga, toomd f yãoogo, da tẽ põasg ye.

¹⁸ Yella na n yɩɩ toogo, maam, Naaba-Wẽnd, n yete.

¹⁹ Foom, Adem biiga, gom bãngr goama, pãb nug pogse, pãb n yɩlem naoor a yi, naoor a tã. Sʋʋga yaa tẽn-kũum sʋʋga, zãngoeoog sẽn lubd goabg la rɩtgo.

²⁰ A loogda ne ned kam fãa sũ-keelem sẽn yãend-a ka le mi a sẽn kẽedẽ ye. M dɩgl-a-la doog fãa noore, t'a rɩg n yãgd wa saag sʋʋga n gũud n na n kʋ bala.

²¹ Kɛ rɩtgo, kɛ goabga, sʋ-rɩtga, kõs f sẽn teesẽ fãa!

²² Maam me, m na n wẽe nug pogse, m yaa n doka m sũuri. Yaa maam n gomde, maam, Naaba-Wẽnde.»

Zerizalɛɛm wãabo

²³ Naaba-Wẽnd gomame n yeel-ma:

²⁴ «Adem biiga, tuk soy a yiibu n kõ Babilon dĩma. Yaa soy bãmb la Babilon dĩma na n dɩke n wa ne a sʋʋgã. Soya yita tẽng a ye. Ning makre sor fãa sɩngrẽ n wilg a sẽn dabd tẽng ninga.

²⁵ Sor a ye na n talla Babilon tãb-biisã n tees Raba, Amonitsa tẽngẽ. Sora a to wã rigda Zerizalɛɛm, Zɩɩda tẽn-peelmẽ.

²⁶ Babilon dĩma na n taa soya sẽn welgd taaba zĩigẽ, n bug bãgre. A na n zugsa a loko, n sok wẽn-naandse, n sok rũmsa sãoore.

²⁷ Pĩim ninga sẽn na n sãam Zerizalɛɛma la a wõog ne a nug rɩtgo n tees Zerizalɛɛm la a tãsd a zabr tãsga. A yalsa zab-teedo, ra-bɛd sẽn tar n tãad lalse, n tedg-b ne tẽnga kʋɩlense la a sɩng tãnd sambo la a tuud bok n gilgd tẽngã.

²⁸ Zerizalɛɛm dãmb da tẽedame tɩ bagra yaa mams tɩ seg bala la bũmb kõn maane, tɩ Wẽnd wẽeneg lʋɩɩ sʋka. Dẽ la Babilon dĩma tẽegd-b tɩ b pa tũ Soaala-Wẽnd wa b sẽn da rat ye la rẽnd yĩnga b na n tall-b lame n kẽng yembdo.

²⁹ Yaa rẽnd yĩnga la maam, Naaba-Wẽnd, ye-y woto: ‹Y maaname tɩ m tar y yell tẽegre, wakat buud fãa, n tẽegd tɩ y zãgs-m-la vẽenega la y beeg-m-la ne tʋʋm wẽn ka tɛka. Y sẽn pa sak tɩ m yĩm y yellã, m na teel-y n taas y bɛɛba!›

³⁰ Sã n ya foom yẽ, Israyɛl dĩma, fo yaa nin-wẽnga la zãmb soaba. M yãka raare sẽn ya fo wẽnema sɛɛb raare.

³¹ Ad-m sẽn yete maam, Naaba-Wẽnde: ‹B na deega sẽn wilgd tɩ f yaa rĩma, b na n fõka f pugla. Yɛla teemame. Sulg-m-meng rãmb la b na n zẽke la b sik pãng rãmba.

³² Raboogo n paas raboogo, yaa rẽ la m na n wa ne Zerizalɛɛm. Tẽnga na n wãa zãnga la rẽnd ned a ye reng n wa. M na n kõo nin-kãng tõog t'a yik zabr ne-a.› »

Amon sɩbgre

³³ Soaala-Wẽnd paasame: «La foo, Ezekiyɛl, taas Amonitsa maam, Naaba-Wẽnd, sẽn leokd bãmb poorẽ, b sẽn paoogd a Israyɛl yĩnga. Yeel-ba: ‹Sʋʋg n be ka, sʋʋg sẽn tõe n lub yãmb mars-marsã bala. A saasa kɛɛb yĩnga, b saas-a lame t'a yãgd wa saag sʋʋga.

³⁴ Yãmb zĩime n teeg y zãmsdo, la y zirẽ-be-bagba la sʋʋga na n dogsa zutu, zãmb dãmba la tʋʋm-wẽna rãmb zutu. Sɩda, wakat taame tɩ b wẽnema sɛɛb raar na n yãke.

³⁵ Marsã lebs-y y sʋʋsã b wʋʋsẽ, tɩ yaa zĩig a to la m na n yik ne-yã. Yaa y sẽn yi zĩig ningã, yaa y sẽn dog tẽng ningã.

³⁶ M na n puuga m sũur ne-yã, la m na n waag-y-la ne m sũ-fõora bugum, n dɩk-y n bas nin-toos la a mi-wãab rãmb nusẽ.

³⁷ Y na lebg bugum pʋɩɩre, la y zɩɩma na raag n pʋk tẽngã. Dẽ poore ned ba a ye kõn le gom f yell ye. Dẽ me yaa maam, Naaba-Wẽnd, n leokde.› »