Ezekiyɛl 19 - SEBR SÕNGO

Wiisgu Zɩɩda dĩm dãmb zugu

¹ Soaala yeela maam tɩ m pʋd yɩɩn-kãnga n yãb Israyɛl dĩm dãmbã:

² Yãmb ma wã yɩɩ bõnyẽ-yãanga; a yii gɩgem-neeba buudẽ. A ra gãee a kamba sʋka n kõt-b rɩɩbo.

³ A wuba a biig a ye t'a wa lebg polle n lebg gɩgemd sẽn nong a menga n zãms-a a rɩɩb sɩɩgre, n tol n yõgd ninsaalba.

⁴ Bu-zẽmba wʋmame tɩ b gomd a yelle tɩ wa bẽd-a n yõke la b sẽb-a lame n tees Ezipt.

⁵ A ma wã yaasame n gũ n wa bas saagre t'a na n dɩk a biig a to n wub-a t'a lebg pãng a nare.

⁶ A sɩd vɩɩnda ne bõnyẽesã n wa lebg gɩgemd sẽn nong a menga. Yẽ me zãmsa a rɩɩb sɩɩgre la a yõga ninsaalba.

⁷ A tɩ wãa tẽns niyns sẽn tõe n zabe n fãag b mense la tẽns a taabã. Tẽnga rãmb da yɛɛsdame b sã n wʋm a kɛlenga.

⁸ Bu-zẽmba yii zĩis ka tɛka n wa tak zabr ne-a. B gãnega b bẽdgo n gũbg-a la b paam n yõk-a lame.

⁹ B ta-a-la ne bãn-kõse n tɩ kɩs Babilon dĩma. B pag-a-la roogo, b ra pa rat n le wʋm a yãbrã Israyɛl tãmsa zut ye.

Wiisgu bugsuntunga zugu

¹⁰ Yãmb ma wã ra wẽnda bugsuntungu bugsuntung sẽn sel koom noore. A ra zɩsga ne vãad la biisi a sẽn da paamd kooma wʋsg yĩnga.

¹¹ A toba a wil neeba la wil bãmb n lebg naam dasaba. Bugsuntunga tẽeme n kul yĩngri n wa tɩ zʋʋg tɩɩsã. B ra pẽgda a wila tãoobo, n da pẽgd b sõora sẽn labsã.

¹² Ade, b võog-a lame n võog-a ne sũ-puuri n gãneg tẽnga. Yaang sobga waa n kʋɩɩsa a biisã, la b fãa sʋʋgame. A wil neeba me kʋɩɩme tɩ bugum wa rɩ-ba.

¹³ B tall-a lame n tɩ sel we-raoogẽ, weoog sẽn kʋɩ n ka yãet saag ye.

¹⁴ Bugum yi-la a sɛɛgẽ n dɩ a wila la a biisã. Bugsuntunga ka le tar wil neere sẽn tõe n lebg naam dasaar ye. Bɩ d dɩk yɩɩn-kãnga n yɩɩl d bugsuntunga kʋʋre!