Ezekiyɛl 15 - SEBR SÕNGO

Bugsuntung raoog faasame

¹ Naaba-Wẽnd taasa maam b koɛɛga n yet-ma:

² «Ninsaal biiga, bõe n kɩt tɩ bugsuntung raoog na n yɩ sõmbo n yɩɩg googa raad a tãaba?

³ B tõe n dɩka a raoog n pees bõn-kɛgenga, n pees baafo sẽn na n ka n yagl teed bɩ?

⁴ Ad-a sẽn segd ne bũmb yaa b rɩka n lob n yãng bugum bug-toaalgẽ. A noya a yiibã sã n yõk bugum tɩ tẽnsʋka me sɩng rɩɩbo, tõe n le tall-a lame n maan bũmb bɩ?

⁵ Bũmb sẽn da waa n nan ka sɩɩs-a, b ra ka tõe maan fɩ ne-a ye, marsã bugma sẽn yõog-a wã, n yɩɩda.

⁶ Rẽ n so, tɩ maam, Naaba-Wẽnd, gomd woto: yaa bugmẽ la m nong n lobd bugsuntunga raoogo n yɩɩd googa tɩɩse. Woto me, yaa Zerizalɛɛm dãmb la m bugma rɩta.

⁷ Yaa ne bãmb la m na n yiki. B tẽeme tɩ b põsa bugum la yaa bugum n na n dɩ-ba. Dẽ marsã la b bãngda tɩ maam la Naaba-Wẽnde.

⁸ M na kɩt tɩ tẽn-kãnga lebg we-raoogo, a tũudma sẽn pa yɩ wa m sẽn datã. Yaa maam n yet rẽnna, maam, Naaba-Wẽnde.»