Ezekiyɛl 13 - SEBR SÕNGO

Zirẽ-be-bãngdba poorẽ

¹ Soaala-Wẽnd goma ne maam woto:

² «Ninsaal biiga, neb niyns sẽn yet tɩ b yaa bãngdbã, Israyɛl tẽn-peelmẽ, la b gomd b meng bãngr goama, luk b fãa bãongo. Yeel-b tɩ b kelg mam goama.

³ La ad maam, Naaba-Wẽnd sẽn togsde: yel-beed n na n lʋɩ yalem-daada zutu. B tũuda b meng yam n yãet b zirẽ-be-yãeebo.

⁴ Israyɛl, ad-f bãngdba wẽnda raboodẽ we-yũusi.

⁵ Bãngdba pa tɩ sõng n le yik lalga sẽn wã wã la b pa me lalga n na n lill Soaala sũ-puura raar zabra ye.

⁶ B gomda likr b sẽn yãend b yamẽ yelle, la yaa zirẽ-beedo. B yetame: ‹Woto yaa Soaala koɛɛga› la maam, Naaba-Wẽnd, yaool ka tʋm-b ye. B bas n tẽedame tɩ m na n yeelame tɩ b nee yellã, la yaa zaalem, b yagda zirẽ n yaool n zĩ n gũudẽ tɩ m maan bũmb n kõ-b bʋʋm.

⁷ La ayo, m yet-b lame: ‹Y sẽn gomd tɩ Soaala koɛɛgã,› yaa zirẽ bal la y yagda; y yetame tɩ yaa mam koɛɛg la y taasda, la m yaool n pa gom ne y ye.

⁸ Ade, maam n yete, maam, Naaba-Wẽnde, y sẽn saad n yelgd y sẽn gãand n zãmse la y zirẽ-beedã, m na n yika ne-yã. M koɛɛga, maam, Naaba-Wẽnd koɛɛga la woto.

⁹ M na n wilga m pãnga ne bangdb niyns sẽn saad n togsd b sẽn gãand n tagse la b yelgd b zirẽ-beedã. M ka na n le bas-ba m neba sʋk ye, b yʋʋr meng kõn gʋls Israyɛl buuda kamb sʋk ye la b kõn leb b tẽngẽ ye. Woto la b bãngd tɩ maam la Naaba-Wẽnde.

¹⁰ Bala, b tudgda m nebã n gomd laafi yelle, tɩ laafi yaool n kaẽ ye. Mam buuda neb n met lalgã, tɩ bãmb tɛk ya goora fẽebo.

¹¹ Yeel sẽn fẽed-b goorã tɩ lalga na n lʋɩɩme. Sa-luk n na n wa ne sapɩlem, sob-raoog n na n fão-a.

¹² Lalga sã n lʋɩ, b na sok yãmb y goora fẽeb yõodo.

¹³ Sɩd yaa woto la m togsd yãmba, maam a Naaba-Wẽnde: M sũura na n yikame la m na n kaoo sob-raoogo tɩ m sũ-fõorã wa ne sa-bɛda. M sũ-puura na n toola sapɩlem sẽn na n kao fãa a sor zugu.

¹⁴ M na n sãama lalgã y sẽn bolã, n lub-a tẽnga, n buk sẽn da me n sut tẽngã, tɩ fãa tond yɩng marsã. Lalga na n lʋɩɩme n pãb yãmb n kʋ. Rẽ la y bãngd tɩ maam la Naaba-Wẽnde.

¹⁵ M na n basa m sũura t'a fudg a raab tɛka n sãam lalga la neb niyns sẽn fẽeg-a goorã. B na yeel-y: ‹Lalga lʋɩɩme, sẽn da fẽed-a goora me loogame,

¹⁶ bãngdba me loogame, bãngdb niyns sẽn da gomd Zerizalɛɛm poorẽ n yet tɩ na zemse, tɩ bũmb yaool n ka zemsd a to ye.› Woto la m wilgda, maam, Naaba-Wẽnde.

Pagb kẽer poorẽ

¹⁷ La foom, Ezekiyɛl, wẽnemd n tees f buuda pagba sẽn saad n gomd b meng-b-toore bãngr goama la luk b fãa bãongo.

¹⁸ Wilg-b tɩ yaa ne bãmba la maam, Naaba-Wẽnd, gomd woto: ‹Yel-beed na n lʋɩ-la y zugu. Pɛɛl la yãmb wʋgd n loet neba nug-sũgsẽ. Y wʋgda nin-bɛd la kom-bõones yĩnga, pɛɛl sẽn na n lud neng n paam tɩ vɩɩma lebg yãmb soolem. Bõe tɩ yãmb dat tɩ y meng vɩɩma pa y soolmẽ tɩ neb a taaba rẽnd yaool n lebgd yãmb soolem?

¹⁹ Maam, Naaba-Wẽnd yeta yãmb pagbã tɩ y paoogda maam, m neba taoore, nug pʋgẽ alkam bɛɛla la bur gɩrse raab yĩnga. N paas me, y sẽn dõogd zirẽ n kõt m nebã sẽn tẽed yãmbã, y kʋʋda neb sẽn pa tog ne kũum, la y basd vɩɩse neb sẽn pa tog n vɩɩnde.

²⁰ Yaa rẽ me yĩnga la maam, Naaba-Wẽnd, na n yik ne-yã, y pɛɛla poorẽ, pɛɛla sẽn loet y taaba vɩɩma pãnga. M na n kẽes-b lame n lood-b kamsẽ, la m na fãag y sẽn yet tɩ y sẽba b rãmb vɩɩma.

²¹ M na n kẽesa pɛɛlã sẽn vilnengã la m na fãag m buudã y nusẽ. Y kõn le soog-b ye la woto y na bãng tɩ maam la Soaala-Wẽnde.

²² Yãmb zirẽ-beedã menesa nin-tɩrsa raoodo. Ka bãmb la m yaool n da rat n sɩbg ye. Woto me y pirsa nin-wẽnsã tɩ b kell n dɩk b so-wẽngã sẽn wat ne b kũum.

²³ Bãng-y tɩ y sẽn yet tɩ y neeme wã sɛɛme. Y kõn le saa n yelg zirẽ-beed ye. M na n fãaga m buudã y nusẽ. La rẽ me la y bãngd tɩ maam la Soaala.› »