Ezekiyɛl 12 - SEBR SÕNGO

Pa-weer kẽnde

¹ Soaala-Wẽnd goma ne maam:

² «Ninsaal biiga, ad fo sẽn vɩ ne b rãmba yaa tõatb buudu; b tara nini, gesg yĩnga, la b ka rat n yãe ye; n tar tʋba, wʋmb yĩnga, la b ka rat n wʋm ye, tɩ bala b yaa tõatba a yeyn-ye.

³ La foom, ninsaal biiga, segl pa-weoog teedo la f segl f pa-weer loogr wĩntoogo, neba fãa nifẽ. Yi f sẽn be tẽng ningã n tɩ kẽ tẽng a to. Yi neb fãa nifẽ. Daar bɩ b bãng b kɩɩsga sẽn ta zĩig ninga.

⁴ Bɩ f maneg f teedã wa pa-weoogo b nifẽ, wĩntoogo. La zaabre bɩ f yi b nifẽ, wala pa-wetã sẽn mii n yitã.

⁵ B nifẽ bɩ f poog lalga võore n tũ be n yiis f teedã.

⁶ Bɩ b yãend tɩ f palgda teedã f bãgdo n lood ne lika. F meng na n luda f nenga n ka mi f sẽn dabdẽ ye. Yaa woto la m yet tɩ f wilg Israyɛl kamba yell ning sẽn na n pak-ba.»

⁷ Mam maana wala Soaala sẽn kõ maam noor ningã; wĩntoogo m sɩd manega m teedã wa pa-weoogo, la zaabre m meng pooga lalga võore. Neba yãend-m lame tɩ m lood likẽ tɩ m teed palg m bãoko.

⁸ Vẽkembeoogo yibeoogo, Wẽnd goma ne maam:

⁹ «Ninsaal biiga, m miime t'a Israyɛl roogã, tõatb buudã, sok-f lame tɩ bõe la f maand woto.

¹⁰ Yeel-ba tɩ Soaala-Wẽnd ratame tɩ sẽn dɩta naam Zerizalɛɛm la Israyɛl kamba sẽn be tẽn-kãnga maan gũusgu.

¹¹ Togs-ba tɩ f maana woto n na n wilg-b yell ning sẽn na n pak-ba: b na n tall-b lame n loog pa-weere.

¹² Sẽn dɩta naama na n palga a teed a bãokẽ n yi ne yʋngo. B na n pooga lalga võore t'a tũ be n yi. A na n luda a neng n kẽnd n ka mi a sẽn dabdẽ ye.

¹³ Maam Naaba-Wẽnde, maam n na n gãneg bẽdgo n yõk-a. M na n tall-a lame n kẽn Babilon dãmb tẽnga. A nif kõn yãend Babilon tẽngã, la yaa be la a na n ki.

¹⁴ A poorẽ dãmba fãa, neb niyns sẽn gũud-b yẽ, a tãb-biisa fãa, m na n sẽeg-b-la zĩis fãa n zẽk zabr sʋʋg n pʋg-ba.

¹⁵ M sã n wa sẽeg-b bu-zẽmb sʋka, n sẽeg-b tẽn-zẽnsẽ b na bãnge tɩ maam la Soaala.

¹⁶ M yaool n na n basa neb kẽer tɩ b põs sʋʋga, la kom la bã-longdem. Nin-bãmb na togs b sẽn na n tɩ kẽ tẽns niynsã, a Israyɛl tʋʋm wẽna sẽn yɩ a soaba. Tẽn-bãmb dãmb me na bãnge tɩ maam la Soaala-Wẽnde.»

¹⁷ Naaba-Wẽnd le paasame:

¹⁸ «Ninsaal biiga, dɩ f rɩɩbo la f rigda, yũ f koom ne sãmbse la yɩɩre.

¹⁹ F na yeel tẽnga gilli tɩ Soaala-Wẽnd n yete: ‹Zerizalɛɛm dãmba sẽn pa Israyɛl tẽn-peelmẽ na n dɩta b rɩɩbo la b yũud b kooma ne yɩɩre la sũ-beedo. Sɩda b tẽnga na n wãame tɩ tẽnga rãmb pids-a-la ne pãn-tõogo.

²⁰ Tẽnsã na n lebga vɩɩdo, pʋta na n lebga zĩ-pɛɛla la woto y na bãng vẽenega tɩ maam la Soaala-Wẽnde.› »

²¹ Wẽnd gomda taa maam n yeele ma:

²² «Ninsaal biiga, bõe tɩ b yelgd yelbũnd kãng Israyɛl tẽnga poorẽ: ‹Raara paasda raare tɩ bãngr gomd ba a ye yaool n ka pidsdẽ?›

²³ Be neere! Yeel-ba tɩ maam, Naaba-Wẽnd kõn le bas tɩ b wẽ yelbũnd kãnga ye. B sẽn na n wʋme yaa tɩ bãngdba sẽn togsa fãa pidsga wakat taame.

²⁴ Israyɛl zakẽ wã bãngr fãado la wilgr faad kõn le zĩnd ye.

²⁵ Yaa maam, Naaba-Wẽnd n gomde la m sẽn yeel taasda a wakato. Ad-y na n yɩ-la y nifẽ, tõatb buudu, la m na pids m sẽn togse. Maam n gomd boto, maam, Naaba-Wẽnde.»

²⁶ Wẽnd kell n talla woto:

²⁷ «Ninsaal biiga, ad Israyɛl rooga rãmb yetame tɩ fo sẽn yet tɩ f nee bũmb ning marsã wã kõn taase tɩ raar ka sõd n paas ye, tɩ la y sẽn togsd bãmb poorẽ wã yaa zamaan sẽn loog raar zãr yɛla.

²⁸ Woto wã yeel-ba tɩ maam, Naaba-Wẽnde, na n pidsa m sẽn togse la kõn le kaoos ye. Maam n yeele.»