Ezekiyɛl 10 - SEBR SÕNGO

Wẽnd le likda a Ezekiyɛl

¹ M zẽka m neng n gese, la malɛgsa sẽn da be zĩig ninga yĩngra ra tonda neere wa koobr gelle, n mams-mams wa naam zaoore.

² La Soaala-Wẽnd yeela sẽn da yera fu pɛɛlgã: «Tũ vɩʋʋga sẽn bas gilga malɛgsa tẽngr la kolg n yãk bug-saala, ne f nusi, la kẽng n tɩ fẽeg-b tẽnga pʋga.» La neda kolga m nifẽ n yãk bug-saalã.

³ Neda sẽn waa n dabd n na n yãk bug-saalã tɩ malɛgsa ra bee wẽnd dooga nug rɩtgo la sawadg n kẽ n pid dooga noore.

⁴ Soaala-Wẽnd ziirã, zẽkame n zʋʋg malɛgsã la a teesa wẽnd dooga noore. Sawadg n lɛɛg n pid wẽnd doogã, la wẽnd dooga taoor ra yãnga ne Wẽnd ziira vẽenem.

⁵ Malɛgsa pɩgsa bʋʋra da sãtame n tat yɩnga wa Soaala-Wẽnd pãng soaba koɛɛga, b sã n gomda.

⁶ Fu-pɛɛlga soab da yɛs n yega gʋlã, Soaala sẽn waa n na n yeel-a t'a kolg malɛgsã n yõng bug-saala, bug-toaalgẽ wã.

⁷ Malɛk a ye tẽega a nug tẽngre n yãk bugma n pids fu-pɛɛlga soab nusi t'a tall n looge.

⁸ Bũmb wala ninsaal nusi n da tond malɛgsa pɩgsẽ.

⁹ Mam sẽn gese, m yãee gʋl a naase: gʋll a ye malɛk fãa sɛɛgẽ. Gʋla ra tãoosda vẽenem wa kug neeba sẽn tãoosdã.

¹⁰ Gʋla ra wẽnda taaba la yaa waa b ra sog n kẽe taaba, tɩ ãnkam be a to tẽnsʋka.

¹¹ B ra tõe n kẽn n teesa ween-vɩɩs a naasã n ka tol n wẽnemd b zug ye. B ra bilimdame n tees nensa sẽn teesẽ n ka wẽnemd goabg bɩ rɩtg ye.

¹² La malɛgsa zãnga, b poore, b nusi, b pɩgsa, b gʋl a naasa fãa, ra tãoosda bug-pãrse.

¹³ La mam wʋmame tɩ b boond gʋla yʋʋre tɩ Galgal, sɩlmande!

¹⁴ Malɛk fãa da tara nens a naase: pipi neng ra yaa malɛk nenga; yiib soaba da yaa ninsaal nenga; tãab soaba ra yaa gɩgemd nenga, tɩ naas soaba ya sɩlg nenga.

¹⁵ Malɛgsa zẽka yĩngri. Ra yaa malɛgs niyns m sẽn da yãend Kebar kʋɩlga noorã.

¹⁶ Malɛgsa sã n da kẽnda, gʋla me kẽnda ne bãmba; b sã n yɛdg b pɩgsã n na n yɩk yĩngri, gʋla me naagd n zẽkame.

¹⁷ B sã n yalsdẽ, bãmb me yalsdame, la b sã n yɩkdẽ bãmb me tũudame n yɩke, tɩ bala malɛgsa raab la gʋla me ra tũuda.

Wẽnd likra sɛɛ wẽnd doogẽ

¹⁸ Soaala-Wẽnd sẽn da likã zẽka ne b ziirã wẽnd dooga noore n tɩ sig malɛgsa zugu.

¹⁹ Bãmb yɛdga b pɩgsã n yɩk mam nifẽ, bãmb ne b gʋlã, n looge. B tɩ yalsa yaang dignoorã, la a Israyɛl Wẽnnaama ziira vẽenem da yãnga b zugẽ.

²⁰ Kebar kʋɩlga noore, m da yãee malɛgs a woto tɩ Israyɛl Wẽnnaama ra zao b zugu. M bãngame tɩ yaa malɛgse.

²¹ Ãnkam fãa ra tara nens a naase, pɩgs a naase la wala ninsaal nusi a pɩgsa yẽokẽ.

²² B nensã ra wẽnda nens niyns m sẽn da yãend Kebar kʋɩlga noore. Ãnkam fãa ra teesa a taoore n kẽnda.