Ezekiyɛl 1 - SEBR SÕNGO

A Ezekiyɛl paamda likri

¹ M yʋʋma sẽn waa n na n pidẽ pis-tã, yʋʋmda kiuug a naas soaba la kiuuga rasem a nu raare, maam, a Ezekiyɛl, maan-kʋʋd a Buzi biiga, m da bee Kebar kʋɩlga noor ne pa-wetã. La ad-y sa-gãonga pilgame tɩ m paam Soaala likri.

² Kiuuga rasem a nu wã n da tõkd dĩm a Zoakim pa-weera yʋʋm a nu.

³ Wakat kãng la Soaala-Wẽnd nuga tik maam.

⁴ M zẽka m neng n gese: da yaa saag sobgo n zẽkd nug goabga ne sawad-kẽemde. Sawadga wulumda ne sa-yãgre. Vẽenem n da gilg sawadgã. Bugum n da yãng a tẽnsʋkã n pɩnd wa zũud sẽn yẽnegde.

⁵ Mam yaool n yãee bũmb tẽnsʋka, bõn-vɩɩs a naase sẽn wẽnd ninsaalba.

⁶ B fãa da tara nens a naase, la pɩgs a naase.

⁷ B karsa ra yaa tɩrse, tɩ b nao wẽnd naaf na-bendo, n pɩnd wala zũud b sẽn duugi;

⁸ Kanga n da yit b pɩgsa yẽokẽ; nug-pʋga ra yɛdg n teesa nensa la pɩgsa sẽn teesẽ.

⁹ Pɩgs-zʋʋsa ra sɩɩsda taaba; nin-vɩɩsa ra teesa tɩrg n kẽnda n ka wẽnemdedẽ ye.

¹⁰ Ned kam fãa ra tara nens a naase: ninsaal nenga, taoore, bõnyẽeg neng, rɩtgo; loalg neng, goabga; sɩlg neng, poorẽ.

¹¹ Pɩgs a yiibu n da yɛdge n tees yĩngri la b ra tɩ sɩɩsda taaba. Pɩgs a yiib n da lut b yĩngã.

¹² Ned kam fãa da teesa taoore n dabda. B da rabda b sẽn datẽ tɩ yĩnga pa wẽnemdedẽ ye.

¹³ Nin-vɩɩsa sʋkã, b ra nee wa bug-saala. B ra nee wa bug-vɩlense, sẽn yãngd la b boogdẽ. Bugma ra tãoosda vẽenem, tɩ sa-yãgr ra yit a pʋgẽ.

¹⁴ Nin-vɩɩs a naasã ra kẽndame la b watẽ; b zoeesa ra tʋʋla wa saag sʋʋga.

¹⁵ Mam zẽka m nenga n gese la m yãee nin-vɩɩg fãa sɛɛgẽ gʋl sẽn sɩɩsd tẽnga.

¹⁶ Gʋla ra pɩnda wala kug neer sẽn yãgd a toore. Gʋl a naasã fãa ra wẽnda taaba, tɩ yaa wala b kud-b lame tɩ ned kam fãa sog a to pʋgẽ.

¹⁷ B ra tuta ween-vɩɩs a naasã n ka tol n wẽnemded b nao wã zut ye.

¹⁸ Gʋla yalma ra labsame la b ra bolg n gilga ne bõn-pɩndem.

¹⁹ Nin-vɩɩsa sã n kẽnda, gʋla kẽnda bãmb sɛɛgẽ; la b sã n n zẽkd yĩngri gʋla me naag n zẽkdame.

²⁰ Nin-vɩɩsa ra kẽnda b sẽn datẽ tɩ gʋla me naag bãmb n bilimdẽ. Nin-vɩɩsa raab la gʋla me ra tũuda.

²¹ Woto nin-vɩɩsa sã n kẽnda, gʋla me tũud n kẽndame; b sã n yalse, tɩ bãmb me yalse, b sã zẽk yĩngri, tɩ bãmb me zẽke, tɩ b ra tũuda nin-vɩɩsa raabo.

²² Bũmb wa roog sugri n da yɛdg bõn-vɩɩsa zutu, n yãgd wala wanzurfu.

²³ Sugra tẽngre, bõn-vɩɩsa ra tẽega b pɩgs a yi n tees taab tɩrga, n kees a yiibu n mobg b yĩngã.

²⁴ La nin-vɩɩsa sã n kẽnda, mam wʋmda b pɩgsa rãamde. A ra wẽnda mogr bʋrga, n wẽnd Pãng Naaba-Wẽnd dẽnna, n wẽnd tãp-sik-yãang bʋrga. Nin-vɩɩsa sã n da yalse, b manegd n põda b pɩgsã.

²⁵ Sugra zugẽ me bʋʋr n da sãte.

²⁶ B ra nee kug kẽeg me be sẽn da rɩg wa yaa zaoore la b pees n dɩgle, la kug kãng zugu bõn-vɩɩla sẽn wẽnd ninsaala n da zao.

²⁷ La mam yãeeme t'a soaba ra yãgda wa sãnem la yaa wa bugum n da gũbg-a. Woto a menga zãng da reegame n tãoosd vẽenem.

²⁸ Vẽenema sẽn da tão n gilga ra wẽnda saag gomtɩʋʋg sẽn mii n puk saag niib raare. Yaa Soaala-Wẽnnaam, yaa bãmb n da lik ne b ziiri. Mam yãendame, la mam lʋɩɩ m yãvabga la m wʋma ned sẽn gom ne-ma.