Esdras 9 - SEBR SÕNGO

Yikãadem ne sãan-pogse

¹ Sẽn waa n maan kiis a wãna, kãsem-dãmba kolg-m lame n wilg-m woto: «Israyɛl zãma wã, a maan-kʋʋdba, a Levitsa wegma wa tẽnga rãmba. B maana wa Kanaã rãmba, Ititsã, Perizitsã, Zebuzitsã, Amonitsã, Moabitsã, Amoritsã la Ezipt rãmba.

² Bãmb ne b kamba kẽe kãadem ne bu-zẽmba la woto buud sõnga tɩ fãooga a meng ne buud a taaba la yaa kãsem-dãmba la nin-bɛdã n dẽgem pipi.»

³ M sẽn wʋm dẽ, m kẽesa m futu la m gʋsa m zoodbo la m toɛɛnga la m pãs n lʋɩɩ ne sũ-sãanga.

⁴ Neb niyns fãa sẽn da zoet-b Israyɛl Wẽnnaama nif waa n tigma mam seegẽ tɩ d yẽs pa-weta bʋdgra yelle la m zĩnda woto ne sũ-sãang n ta zafar maoonga sasa.

⁵ Zaabr maoonga wakato la m yik yã, ne m futa sẽn kẽesã la m yĩgimdame n tẽeg m nusa Wẽnnaam m Soaala taoore,

⁶ n yeele: «M Wẽnnaam, yãnd tar-m la wʋsgo tɩ m pa rat n doog m neng yãmb taoor ye, Soaala. Tõnd yel-wẽna looga d zĩnd n sõdg-ba, b sama wa tãnga.

⁷ Al d yaab rãmba zamaanẽ n ta marsã, d tara y beegr bala n dabda. Yaa d yel-wẽna yĩng la d mense, d dĩm dãmba, d maan-kʋʋdba lʋɩ dũni wã dĩm dãmb a taab soolmẽ, tɩ b koot tõnd ne sʋʋse, n kẽesd tõnd yembdo, n fãad d paoongo, n ningd-d yãnde, la rẽ yaa vẽeneg rũnna.

⁸ Daar sẽn nan ka zãage, Soaala nimbãan-zoeera kees-d-la neb kẽere, n yãend zĩig n kẽes-ba, b tẽn-sõnga pʋgẽ. Woto d Wẽnnaama vẽnega d yam la b le kõ-d-la saagre, d yembda pʋgẽ.

⁹ D yaa yemse, la d yembda pʋgẽ, d Wẽnnaama ka raag-do n bas ye. Pɛrs rãmba dĩma taoore, b puka b nonglem, n kõ-d pãnga tɩ d le me b roogo n yalse, n yik raboodã, n le me Zɩɩda la Zerizalɛɛm lalse.

¹⁰ La marsã, Naaba-Wẽnde, d na n yeelame tɩ bõe? Tõnd basa y sora tũudem,

¹¹ d basa noya bãngdba sẽn da taas tõndo. Yãmb n da yeel-do: ‹Ad-y m sẽn na n kẽes-y tẽng ninga yaa tẽn dẽgdo. Tẽnga rãmb rẽgem-a-la ne yel-yoodo niyns b sẽn pids-a, goabg la rɩtgo, poorẽ la taoore.

¹² Woto wã, dũnna tɛka bɩ y ra le rɩk y kom-pugli n kõ b kom-dibli ye, da reeg-y b kom-pugli n kõ y kom-dibli ye, da bao-y laafi ne b ye, da bao-y nin-bãmba yĩn-maasem la b naar ye. Yaa woto bal la y wat n lebg buud sẽn tar pãnga, buud sẽn na n dɩ tẽnga yõodo, tẽng y sẽn na n bas ne y yagense zamaan ne zamaana.›

¹³ D Soaala-Wẽnde, yɛl wʋsgo n pak tõndo, d yel-wẽna yĩnga, d kongra sẽn yɩ wʋsg yĩnga, la ne rẽ fãa y kell n kõo beegra sugri n kees tõnd sẽn yɛs y taoor ka wã.

¹⁴ Ad-y d pa rat n le saag n tõdg y noor ye; d kõn bas tɩ kãadem le zĩnd tõnd ne bãmba sẽn pid ne wẽnema sʋk ye. Ka rẽ y sũura na n puuga ne tõndo tɩ y kʋ-d zãng n ka kees bũmb ye.

¹⁵ D Soaalã, a Israyɛl Wẽnnaama, yãmb ka bʋʋd kɛg soab ye, dẽ n so tɩ tõnd ket n yɛs y taoor dũnna. La yãmb bal n tõe tɩ sẽn beega yãmb ket n yɛs ne yõore.»