Esdras 5 - SEBR SÕNGO

Wẽnd doog meebo

¹ Bãngdba n waa n yiki, Israyɛl Wẽnnaam pãng la b yʋʋr yĩnga, n gomd Zɩɩda la Zerizalɛɛm poorẽ. Yɩ-la bãngda a Aze ne a Zakari, a Ido biiga.

² Woto me la a Salatiyɛl biig a Zorobabɛl, a Zosadak biig a Zozuwe yik n sɩng wẽnd dooga meebo Zerizalɛɛm. Wẽnd neba ra bee bãmb ne tʋʋm-tʋmdba sʋka n kengd b pɛlga.

³ Yaa wakat kãng la Efrat rʋʋnd komber a Tatnayi n paas a Setar-Boznayi ne b tũud-n-taas waa n sok-ba tɩ ãnda n kõ bãmb sore tɩ b me wẽnd doogã la b le yik a lal-gũbrã?

⁴ D datame tɩ y wilg tõnd sẽn met-ba yʋʋre!

⁵ Wẽnd da bee ne Zʋɩf rãmba taoor dãmba, woto b pa gɩdg metba ye. B da gũudame bal tɩ sebr taa a Dariyus nengẽ n lɛɛg n wa tɩ b bãng sẽn na n yɩ a soaba. La b ra ket n tara meebo.

⁶ Seb kãnga la a Tatnayi, Efrat rʋʋnd komberã n paas a Setar Boznayi, ne b tʋmd-n-taase, Arfasak rãmb sẽn be Efrat rʋʋnde, tool dĩm a Dariyus.

⁷ Yaa woto n da gʋls b sebra pʋga: «Bɩ laafi pemsem wẽ dĩm a Dariyus zãnga!

⁸ Dĩma bãng tɩ d taa Zɩɩda. D taa b Wẽnd kãsenga roogẽ. B met-a-la ne kug sẽn peese la raad la b rɩkd n pɛ lalsã. Tʋʋmda tʋmda neere la a kẽndame.

⁹ Tõnd goma ne nin-kẽembã n sok-ba: ‹Ãnda n kõ yãmb sore tɩ y me ro-kãnga la y le yik n ka-a raado?›

¹⁰ Tõnd soka sẽn be-b taoor dãmbã yʋya n na n gʋls n wilg yã.

¹¹ Woto la b leok tõndo: ‹Tõnd yaa yĩngr la tẽng Soaala sõgẽn-kamba, la Israyɛl dĩm kãseng a ye n me roog al daar zãra, la yaa ro-kãng lals sẽn lʋɩ la d le yikda.

¹² Yaa tõnd yaab rãmb n puug yĩngr Wẽnda sũuri tɩ b rɩk-ba n sagl a Nabikodonozor nugẽ, Kalde rao la Babilon dĩma. Yẽ n wã roogã la a wʋk buudã n kẽng pa-weere, Babilon.

¹³ Babilon dãmb dĩm a Sirus, a naama pipi yʋʋmde, kõo sor ti b le maneg roogã n me.

¹⁴ A tol n kɩtame tɩ b yiis Babilon wẽnd dooga pʋga sãnem la wanzurf teed niynsi a Nabikodonozor sẽn da yiis Zerizalɛɛm wẽnd doogẽ n tall n wa be. Yaa a Sesbasar la a lebs teedã tɩ yẽ la a yãk n maan a kombere.

¹⁵ A yeel-a lame t'a reeg teedã n tɩ lebs Zerizalɛɛm wẽnd doogẽ la a kɩt tɩ b le maneg n me-a, a pĩnd zĩigẽ.

¹⁶ A Sesbasar meng n wa n sɩng rooga meebo, Zerizalɛɛm, la rẽ tɛka n ta rũnna, d tall-a a meebo la nan ka sɛ ye.›

¹⁷ Sã n taa dĩma yam bɩ a kɩt ti; b vɛɛs sɛba sẽn bĩngd zĩig ningã, Babilon tẽnga, n ges dĩm a Sirus sã n sɩd kõo noore rooga poorẽ la b togs dĩma sẽn yals bũmb ninga tɩ d bãng.»