Esdras 4 - SEBR SÕNGO

Wẽnd dooga meeb pa ta Samari rãmb yam ye

¹ A Zɩɩda la a Bẽnzame bɛɛba sẽn bãng tɩ pa-weta meta roog a Israyɛl Wẽnda yĩnga,

² b kolga a Zorobabɛl, a Zozuwe la sagsa kãsem-dãmbã n yeel-ba: «Tõnd dat n naaga yãmb n me. Tõnd ne yãmb pʋgda Wẽnd a ye. Tõnd kõt-b-la maando al a Asaradõ, Asʋr dĩma, sẽn tall tõnd tɩ d yi yembdã n lɛɛg n wa ka. Al n ta rũnna d ka teem ye.»

³ Dẽ la a Zorobabɛl, a Zozuwe la kãsem-dãmb a taabã leok-ba: «Meeba ka tõnd ne yãmb n na n naag taab n me ye, ya tõnd bala n na n me roogã n kõ Naaba-Wẽnde, a Israyɛl Wẽnnaam. Pʋs n yaa woto la Pɛrs dãmb dĩm a Sirus kõ noore tɩ b maane.»

⁴ Tẽnga kamba gomame n woog Zʋɩf rãmba raoodo, n yɛɛs-ba, sẽn na n yɩlẽ tɩ b bas rooga meebo.

⁵ Pɛrs rãmb dĩm a Sirus sẽn waa n ket n dɩt naam n tãag a Dariyus naam, b tol n bao ligd n kõ kug-zĩidba tɩ daare tʋʋmda na mudi.

Sɛb wẽna

⁶ A Zerksɛs sẽn waa n sɩng a naam dɩɩbo, Samari rãmba da gʋlsa sebr n wilg tɩ bãmb ne Zɩɩda, la Zerizalɛɛm dãmb ka zemsd taab ye.

⁷ A Artazerksɛs wẽnde, a Bislam, a Mitridat ne a Tabeyɛl la b tũud-n-taase le gʋlsa beedo Zerizalɛɛm dãmb poorẽ. Sebra goama la a gʋlsga da yaa Aram dãmb dẽnna.

⁸ Sebr kãnga la komber a Rewum la sɛba gʋlsd a Simsayi tool dĩm a Artazerksɛs Zerizalɛɛm poorẽ:

⁹ «Sɛba bĩngr naaba a Rewum, sɛb gʋlsd a Simsayi, n paas b tũud-n-taase, sẽn yit Din, Afarsatak, Tarpɛl, Afaras, Erek, Babilon, Suz, Dea, la Elam tẽnse,

¹⁰ tõnd ne d buuda rãmb dĩm kãseng a Asnapar sẽn yiis yembdo n tall n wa kẽes Samari la tẽns niyns sẽn be Efrat rʋʋnde, ad-y yaa tõnd n toond pʋʋsem.

¹¹ Yaa tõndo, y yemsa sẽn be Efrat rʋʋndã n gʋlsd a Artazerksɛs.

¹² Dĩm sõngo, togame tɩ d wilg yã tɩ neb niyns sẽn yi fo nengẽ n lɛɛg n wa be ne tõnd Zerizalɛɛm, dat n le yika Zerizalɛɛm, tẽng ning sẽn ka be sugri la sẽn ya tõata. B rat n le yika a lalsã. Yaa meeb sẽn tar pãng zugu la b na n dogl lal-gũbrã.

¹³ Y tog n bãngame tɩ tẽnga sã n me tɩ lal-gũbra yiki, a kẽedba pa na n le yao yõor yaood ye, b kõn wa ne kood ye, b kõn yao sor n paam n kẽedẽ la b yit ye, yaa bõne la bõn bala la y na n dɩ, yãmb la dĩm dãmb sẽn na n pʋg b yãmbã.

¹⁴ Tõnd sẽn dɩt dĩma rɩɩbo, d yeelame tɩ pa tog tɩ y yãe paoogr a woto buud ye, tɩ d gʋlsd-y n na n wilg yã.

¹⁵ Y sã n kɩt tɩ b karem y ba-rãmb sẽn gʋls fãa tẽnga poorẽ, y na bãng tɩ tẽnga ka reegd naana ye, n takd yel-beedo a neb la a soaalb zugu al daar zãra, la rẽ n pus n wa ne a wãaba, pĩnda.

¹⁶ D wilgda dĩma tɩ tẽn-kãnga sã n me, a lal-gũbra sã n le yiki, y soolem sɛɛ Efrat rʋʋnde.»

¹⁷ Dĩma leoka woto: «Wẽnd laafi zĩnd ne a Rewum, tẽnga sɛba gũuda la a sɛb gʋlsd, a Simsayi, la b zĩnd-n-taase sẽn be-b Samari, bɩ tẽns a taaba, Efrat rʋʋnde! Ade,

¹⁸ sebrã y sẽn gʋls-ma, b lebg-a-la ne tõnd buuda goam n togs-ma.

¹⁹ D kɩtame tɩ b lags d sɛbã la d yãeeme tɩ yaa naoor yaka, la daar zãra la tẽn-kãnga sɩng a zug zẽkre ne a soaalba. Tẽnga zɩɩ n sak naana, a zɩɩ n kong zab ye.

²⁰ Sɩda dĩm bɛd dɩɩ naam Zerizalɛɛm, n sãag n dɩ naam Efrat rʋʋnd menga tɩ b yaood b yõor yaoodo, n kõt-b koodo la b yaood soy wã b sẽn tũudã.

²¹ Modg-y tɩ tʋʋmd ninga sẽn sɩngã ra baas ye; b ra saag n le maneg tẽnga tɩ ka tũ ne mam noor ye.

²² Da maan-y reem ye, ka rẽ wẽnem na n paasame la dĩm dãmb na n dɩɩ bõne.»

²³ Tẽnga taoor soaba a Rewum, sɛba gʋlsd a Simsayi ne b zĩnd-n-taas kelga a Artazerksɛs sebra karengo la b yika tao-tao n kẽng Zerizalɛɛm n babs Zʋɩf rãmbã la b wõosa b sʋʋse, tɩ metba bas meebã.

²⁴ Yɩɩ woto la b yals wẽnd dooga meeb Zerizalɛɛm, n tãag Pɛrs dãmb dĩm a Dariyus naam yʋʋmd a yiib soaba.