Esdras 3 - SEBR SÕNGO

Wẽnd waoogr le tũuda a pĩnd sore

¹ Kiuug a yopoe soaba la Israyɛl kamba fãa yi b tẽnsẽ n lɛɛg n wa Zerizalɛɛm wa nin-yende.

² A Zosadak biig a Zozuwe ne a yaopa sẽn ya maan-kʋʋdba n paas a Salatiyɛl biiga a Zorobabɛl ne a yaop sɩnga maan-kugra meebo, a Israyɛl Wẽnda yĩnga. Yaa sẽn na n yɩlẽ n tõog n kʋ yũ-nood maandã wala b sẽn wilg Wẽnd ned a Moyiiz noor sebra pʋga.

³ B sũur da ka kegem ne tẽnga rãmb ye. B ra waa n kẽ n sooga tẽngã pa-weera wakato. Baasgo b mee maan-kugrã a zĩ kʋdgẽ. B kʋʋ yũ-nood maand, yibeoog la zaabre, Soaala yĩnga.

⁴ B maana sẽgda kibsa wala a sẽn da tog n yɩ a soaba. Maanda sõor pida zãnga beoog-beoog fãa.

⁵ Baraar tɛka b kʋʋ beoog-beoog maanda, vʋʋsg raare, ki-paalse la tig-raas rẽnna. M paas yamleed kũuna.

⁶ Yɩɩ woto la kiuug a yopoe soaba pipi raare, b sɩngame n kʋ yũ-noog mando, Naaba-Wẽnd yĩnga. Dẽ tɩ wẽnd dooga nan ka sɩng meeb ye.

⁷ B kõo kug-peesdba la ra-pɛɛsdba ligdi. B baoo koodo, rãam la kaam n kõ Tir dãmba tɩ b tall Libã ra-sĩdma n wa Zafa wala Pɛrs dãmb dĩm a Sirus sẽn da sed bũmb ningã.

⁸ B sẽn yi yembdo n wa Zerizalɛɛm tɩ yʋʋmd la kiis a yi la a Salatiyɛl biig a Zorobabɛl, a Zosadak biig a Zozuwe ne maan-kʋʋdba la Levit dãmba, b saam-biisi, la pa-weta fãa sɩng tʋʋma. Yaa Levit dãmb yʋʋm sẽn pid pisi, bɩ yɩɩd rẽ, la b tũusyã tɩ b na n yɩ tʋʋmna zu-raoog rãmba.

⁹ A Zozuwe ne a kamba la a yaopa, a Kadmiyɛl, ne a kamba, a Odaviya yagense, bãmb n sõng taab ne wẽnd dooga tʋʋma gesgo, bãmb ne a Enadad yagense, Levitse.

¹⁰ Metba sẽn wa n sɩng meebo, n gãneg pipi kugã, maan-kʋʋdba yeelga b maan-kʋʋra futu n yi ne tõntõodo t'a Asaf yagensa yi ne waase la kɛma n pẽgd Soaala-Wẽnd wala Israyɛl dĩm a Daviid sẽn da wilgi.

¹¹ B pẽga Soaala n kils-ba la yaa yɩɩn-kãnga la b ra yɩɩn n deesd taaba: «Soaala yaa nin-noanga la b nonglem ne a Israyɛl ka be sɛɛbo.» Zãma wã ra pẽgda Soaala la b kaasd sũ-noogo, wẽnd dooga meeb sẽn sɩnga yĩngã.

¹² B sẽn yãend tɩ wẽnd dooga meeb sɩngame neb kẽere, wala maan-kʋʋdba, Levitsa, sagsa kãsem-dãmb da kiigda nintãm tɩ b da tẽra rooga sẽn yɩ a soab pĩnda. Wʋsg me bʋʋrã la b kaasgã ra yaa sũ-noog kaasgo.

¹³ Dɩlla yɩɩ sũ-sãang la sũ-noog kɛlenga n da naaga taab n sãt al yɩɩga, la ned da ka tõe n bãng-b n welg ne taab ye.