Esdras 1 - SEBR SÕNGO

Babilon yembd sɛɛbo la wẽnd doog meebo

¹ Ade, sẽn na n yɩlẽ tɩ koɛɛg ning Naaba-Wẽnd sẽn yeel a Zeremi wã taase, Pɛrs dãmb dĩm a Sirus paama yam sõngo, a naama dɩɩb pipi yʋʋmd bala. A toola sebr la a kɩtame tɩ b moon woto a soolma fãa pʋgẽ:

² «Ad Pɛrs dãmb dĩm a Sirus koɛɛga: ‹Soaalã, yĩngr Wẽnda dɩka dũniya rĩunda fãa n ning m nugẽ. Bãmb n yeel maam tɩ m me b roog Zerizalɛɛm, Zɩɩda tẽnga.

³ Dɩlla yãmb sʋka, ned sã n beẽ n ya Israyɛl biig fãa bɩ Naaba-Wẽnd zĩnd ne-a. A leb Zerizalɛɛm, Zɩɩda tẽnga, tɩ b me roog Israyɛl Wẽnda yĩnga. Bãmb la b sẽn waoogd Zerizalɛɛma.

⁴ Israyɛl biig sã n ket yãmb sʋka, a sẽn be zĩig ning fãa, bɩ tẽn kãng rãmb wa sõng-a ne wanzurf, ne sãnem, ne koodo, ne rũmsi, ne a yamleoog kũuni, wẽnd dooga sẽn be Zerizalɛɛma meeb yĩnga.› »

⁵ Tũu boto t'a Zɩɩda ne a Bẽnzame roog kãsem-dãmbã, n paas maan-kʋʋdba, Levitsã la Wẽnd sẽn yẽeg b rãmb yama yik n dɩk sore n kẽng Zerizalɛɛm n tɩ me wẽnd doogã.

⁶ B yagsa fãa sõng-b lame wa b sẽn tõe ne b sãnem, b wanzurf, b koodo, b rũmsi, b laog ka tɛka, b yamleoog kũuni, Zerizalɛɛm wẽnd dooga yĩnga.

⁷ Dĩm a Sirus kɩtame tɩ b tigs teed niyns a Nabikodonozor sẽn da wʋk Zerizalɛɛm wẽnd doogẽ n wa ning a meng wẽnda roogẽ.

⁸ Pɛrs dãmb dĩm, a Sirus, reeg-b lame n ning a Mitridat nugẽ, arzɛka gũud kãsengã. Yẽ reeg-b lame n kɩs a Sesbasar, Zɩɩda rĩm-biiga.

⁹ Ad-a sẽn sõde: sãnem laas pis-tã, wanzurf laas tusri, sʋʋs pisi la a wɛ,

¹⁰ sãnem la-bɛda pis-tã, wanzurf la-sɩnsɩlse kobs-naas la piiga; teed a taaba: bãmb tusri.

¹¹ Sãnem la wanzurf lagda gilli: tus a nu la kobs-naase; b sẽn waa n yit Babilon, b yembda sẽn sɛ wã, a Sesbasar talla rẽ fãa n wa Zerizalɛɛm.