Bʋ-kaoodba 8 - SEBR SÕNGO

Efrayim dãmb guglengu

¹ Efrayim dãmb leoka a Zedeõ: «Yaa bõe la f maan woto ne tõndo. Bõe yĩng tɩ f pa wɩɩg-do, f sẽn waa n dabd n na n tak zabr ne Madiã rãmbã?» Sɩd pa yɩ naana ne a Zedeõ ye.

² A Zedeõ leok-b lame: «Bõe la m maan sẽn kolg yãmb dẽnna? A Efrayim sib yiisgu ka são a Abiezɛr sib gĩin kaoob sɩda?

³ Yaa yãmb nugẽ la Soaala-Wẽnd sagl a Oreb la a Zeeb, a Madiã na-komsã. La bõe la m maan sẽn tõe n dɩk n mak ne yãmb rẽnna?» A Zedeõ goama maaga b sũuri.

A Zedeõ pʋgda a bɛɛba

⁴ A Zedeõ taa Zʋrdẽ n dʋʋg a kooma, yẽ ne neb kobs-tã wã sẽn da be ne-a wã. Ne b sẽn da yɛ wã, b kell n talla bɛɛba rigbu.

⁵ A Zedeõ yeela Sukot dãmba: «M kotame tɩ y bao bur-maas n kõ m tũud-n-taasã. B yɛɛme la yaa Madiã dĩm dãmb a Zeba la a Salmuna la m pʋgda.»

⁶ Sukot taoor dãmba yeelame: «A Zeba ne a Salmuna zoe n saga fo nugẽ laa tɩ f yet tɩ d bao bur-maas n wa tɩ f kõ f tãb-biisi?»

⁷ Dẽ la Zedeõ leok-ba: «Naaba-Wẽnd sã n wa rɩk a Zeba la a Salmuna n ning m nugẽ, m na sɩ y yĩnga ne we-raooga gõos la sɩlg-nao-yẽese!»

⁸ A Zedeõ sẽn yi Sukot a kẽnga Penuwɛl n tɩ kos bãmb rɩɩbo la bãmb me leoka wa Sukot dãmba.

⁹ Dẽ la a Zedeõ yeel Penuwɛl dãmba: «M sã n tõog m bɛɛbã n lɛɛg n wa ne laafi, m na tus y ro lug-lug kãnga n lubi.»

¹⁰ A Zeba la a Salmuna da bee Karkor ne b tãb-biisa sẽn da kellã, tus piig la a nu. Bãmb bala n da põs yaang rãmba tãb-biis sʋka, tɩ sẽn ki-ba yɩɩ tãb-biis tus koabg la pisi.

¹¹ A Zedeõ tũu we-gõaadba sore, Noba la Yogboa yaanga. A Zedeõ linga bɛɛbã n tõog-ba.

¹² A Zeba ne a Salmuna paam n zoeeme. A Zedeõ pʋga Madiã dĩm dãmbã n yõg-ba. Tãb-biisa yẽ pa zabrẽ wã zãnga.

A Zedeõ rokda a sũuri

¹³ Zabr sẽn sɛ, a Zowas biig, a Zedeõ, tũu Erɛs sorã n lɛɛg n wa.

¹⁴ A Zedeõ boola Sukot bi-bɩɩg a ye n sok la a kos-a t'a gʋls Sukot taoor dãmba yʋy n paas nin-kẽemsã, bãmb pisopoe la a yopoe.

¹⁵ A Zedeõ taa Sukot dãmb sʋk n yeel-ba: «Ad-a Zeba la a Salmuna. Bãmb poorẽ, yãmb laa maam n tol n sok-ma: ‹Fo zoe n paam n sẽba a Zeba la a Salmuna laa, n yet tɩ b bao bur-maas n kõ f tãb-biisi sẽn kẽnd ne yaamse la kom?› »

¹⁶ A yõga tẽnga nin-kẽemsã la b waa ne we-raooga gõos la sɩlg-nao-yẽese la b yora Sukot dãmba.

¹⁷ A Zedeõ tɩ wãa Penuwɛl ro-wokã la a kʋ tẽnga rãmba.

¹⁸ A yeela a Zeba ne a Salmuna: «Neb niyns yãmb sẽn kʋ Tabor tãnga zugã da wẽnda ãnna?» Tɩ b leoke: «B ra wẽnda foom. Ned kam fãa neng ra yaa na-biig nenga.»

¹⁹ A Zedeõ leokame: «Ad-y yaa m kẽem dãmba, m ma-biisi! Ne Naaba-Wẽnde, m wẽend tɩ y sã dag n pa kʋẽ-ba, ma me kõn kʋ yãmb ye.»

²⁰ A yeela a Yetɛr, a bi-kẽenga: «Yik n kʋ ba!» La a Yetɛr ka sak n wõog a sʋʋg ye, rabeem yõk-a lame t'a ra paooda wʋsgo.

²¹ A Zeba ne a Salmuna yeelame: «Fo yik f toore n kʋ-do tɩ ned pãng zemsa ne a yagdo.» A Zedeõ yikame n kʋ a Zeba la a Salmuna la a looda te-neeba sẽn da loe b yʋgma wã kokore.

A Zedeõ kũum

²² A Israyɛl yeela a Zedeõ: «Fo fãaga tõnd a Madiã nugẽ, bɩ f rɩ naam d zugu, foo, f biiga la f yagenga.»

²³ A Zedeõ leokame: «Ka maam n na n yɩ yãmb dĩm ye, ka m biiga me ye, yaa Naaba-Wẽnde, tɩ yaa bãmb n tog n yɩɩ y dĩm.

²⁴ Bas-y tɩ m kos y bũmbu, bɩ ned kam fãa kõ maam nug-bĩnga a sẽn paam bɛɛba laogẽ.» Bɛɛba sɩd da yaa Ismayɛlitse n tar sãnem nug-bĩnsi.

²⁵ B naaga taab n leok tɩ rẽ ka tũud toog ye la a Zedeõ sẽn yɛdg a fuugu, ned kam fãa kolg n loba nug-bĩng a sẽn da paam bɛɛba laogẽ.

²⁶ Nug-bĩnsã a sẽn paam zɩslem taa wakɩ koeems tusr la kobs-yopoe rẽnna, fan teeda a taaba sẽn pa naag ye: wala sẽn sogd kokoɛ, tʋb-londo, peen-mismiidu Madiã rãmb sẽn tar n sẽt b futu, la bobdse sẽn ningd yʋgma.

²⁷ A Zedeõ rɩka sãnema n dõog nin-naande la a ning-a-la a tẽngẽ, Ofra. A lebga bũmb Israyɛl dãmb sẽn da waoogde. A lebga wa bẽdgo a Zedeõ ne a zak rãmb yĩnga.

²⁸ Yɩɩ woto la a Madiã zug sulg Israyɛl dãmb taoore n pa le tõog n doog ye la tẽnga paama vʋʋsgo yʋʋm pis-naase n ta a Zedeõ yõor tɛka.

²⁹ A Zowas biig, a Yerubaal lɛɛg n tɩ kẽ-la a zakẽ

³⁰ A Zedeõ meng kamb yɩɩ pisopoe. A pagba sõor da yaa wʋsgo.

³¹ A yem-poak a ye sẽn da be Sikɛm roga biiga t'a pʋd a yʋʋr a Abimelɛk.

³² A Zowas biig a Zedeõ kʋʋla sũ-noog kʋʋlem n yaool n ki. B mum-a-la ne a Zowas, a ba-roaka, Ofra, a Abiezɛr Tẽn-peelmẽ.

³³ A Zedeõ loogr poore, Israyɛl kamba sɩngame n le pʋgd a Baal dãmba. A Baal-Berit n waa n lebg bãmb wẽnde.

³⁴ A Israyɛl waa n yĩma Naaba-Wẽnd sẽn fãag-a a bɛɛba nusẽ.

³⁵ La sõngr ninga fãa a Yerubaal-Zedeõ roog sẽn sõng bãmbã, b waa n yĩma rẽ zãnga.