Bʋ-kaoodba 7 - SEBR SÕNGO

Nin-taoor zabre

¹ A Yerubaal (yaa a Zedeõ) sãda beoogo ne a nebã n tɩ wẽ b sik Eyin-Arod. A Madiã sika ra bee yẽ rẽnda goabg bilfu, More tãnga pennẽ.

² Naaba-Wẽnd yeela a Zedeõ: «Ade, sẽn be-b ne fooma waoogame tɩ looge, la m pa na n dɩk Madiã rãmbã n sagl b nugẽ ye. Ka rẽ b wat n basa mam pẽgre n pẽg b menga, b wat yeelame: ‹Yaa tõnd meng nug n fãag do!›

³ Dẽ yĩngã, yeel neba woto: ‹Rabeem sẽn tar a soab fãa t'a yɛs n digda n pa rat n zãag ne Galaad tãnga, bɩ a leb a zakẽ.› » A Zedeõ fɛɛs-b lame n bãng b raoodo la neb tus pisi la a yi n leb b tẽngẽ, n kell tus piiga.

⁴ La Soaala-Wẽnd leoka a Zedeõ: «Ad neba ket n yaa wʋsgo. Tall-ba n kẽng kʋɩlga noore tɩ m meng na fɛɛs-ba m toore n kõ-fo. M sẽn na n yeel ned ninga t'a pa ne foo, yẽ soab n na n pa. M sẽn na n yeel ned ning t'a ra tũ foo, bɩ a soab ra tũ ye.»

⁵ A Zedeõ talla a nebã n kẽng kʋɩlga noore la Naaba-Wẽnd yeel-a lame: «Bak toore ned ning fãa sẽn na n lega kooma wa baag sẽn legdã, bɩ f ning yẽ toore. Welg toor me ned ning sẽn na n yĩgimda n yaool n yũ.»

⁶ Neb niyns sẽn leg b kooma taa kobs-tã. Sẽn ket ba fãa yĩgimdame n yũ.

⁷ Soaala-Wẽnd yeela a Zedeõ: «Yaa ne kobs-tã wã sẽn leg-b kooma, yaa bãmb nugẽ la m na n sagl Madiã rãmba. Bɩ sẽn ket-ba fãa leb b yiri.»

⁸ A Zedeõ kɩtame tɩ b rees rɩɩbã b sẽn zɩtã la bardã la a lebs-ba b zagsẽ. Sẽn pa-b ne yẽ yɩɩ kobs-tã wã bala. A Madiã sika ra bee tẽngre, pʋtẽ wã.

A Zedeõ sũur lebga kẽnkẽ

⁹ A Zedeõ sẽn kẽ gõeem, Soaala-Wẽnd yeel-a lame: «Yik n sig Madiã sikẽ tɩ m dɩk-a lame n ning f nugẽ.

¹⁰ La ade, dabeem sã n tar foo, bɩ f reng n ta b sikẽ wã foo ne f sõgna, a Ypra.

¹¹ Kelg b sẽn gomd bũmb ninga tɩ f pɛlg na legb kẽnkẽ la woto f na sak n tak zabre.» A Zedeõ siga ne a rakõor a Ypra; b kolga bɛɛba sika wʋsgo.

¹² Madiã, Amalɛk la Yaang neba da yɛdgame n pid pʋtã, b ra yaa wʋsgo wa sʋya. Wala bĩisrẽ sẽn be mogr noorẽ, b yʋgma wã ra ka tõe n sõd n sɛ ye.

¹³ A Zedeõ sẽn kolgã, a wʋma ned a ye sẽn da togsd a sõsd-n-taaga a sẽn zãms bũmb ninga. A ra togsda woto: «Mam zãmsame la ade: miusgu n da bilimd a Madiã sikẽ wã la a sẽn wẽ roog a ye, a lub-a lame n zũndg zãnga.»

¹⁴ A sõsd-n-taaga leokame: «Baad tɩ rẽ ka bũmb a to, n zʋʋg Israyɛl daoa, a Zowas biig a Zedeõ, sʋʋga ye. Wẽnd dɩka Madiã sikã n sagl a nugẽ.»

¹⁵ A Zedeõ wʋma zãmsdã ne a võore, a yĩgimdame n waoog Soaala-Wẽnde la a sẽn lɛɛg n wa a neba sʋka a tãsame: «Yik-y tɩ Soaala-Wẽnd dɩka Madiã n sagl y nugẽ.»

Bɛɛba lingri

¹⁶ A Zedeõ pʋɩ-la a neba sags a tã. A kõo ned kam fãa baorgo, yubl vɩʋʋgo ne bug-vɩleng sẽn da solg a pʋgẽ.

¹⁷ A yeel-b lame: «Ges-y maam la maan-y wa maam! M sẽn kolg bɛɛba sikã n maan bũmb ningã bɩ yãmb me maan boto!

¹⁸ Maam ne m sẽn be ne b rãmba na n peeba bardo, yãmb me maan boto y kɩrengẽ la tãs-y tɩ sãde: ‹Wẽnd la a Zedeõ yĩnga!› »

¹⁹ A Zedeõ la neb koabga sẽn da be b ne yẽ wã kolga bɛɛba sik yʋn-sʋka, dẽ tɩ sika gũudb reega taab paalem-paalem. B peeba bardo la b wãa yʋy wã b sẽn da zãadã.

²⁰ Neb a taaba me peeba bardo la b wã b yʋy wã. B ra zãadã bug-vɩlensã ne b goabga tɩ bardã ra be b rɩtgo la b kelmame: «Wẽnd la a Zedeõ yĩnga ned kam fãa yiis a sʋʋga!»

²¹ Ned kam fãa ra yɛsa a zĩigẽ la b ra gũbga sikã. La ade, sika pʋga ned kam fãa ninga tĩiga la a tar kaasgo.

²² Bardã sẽn waa n peebdẽ wã, Soaala-Wẽnd zablga bɛɛba ne taab tɩ b lɛɛg n kẽ taab ne sʋʋse. B zoe gilli n ta Bɛt-Sita, Sereda sẽnẽ, n ta Avɛl-Meola kʋɩlg noore, Tabat sɛɛgẽ.

²³ B boola a Israyɛl neba, a Asɛr, a Neftali la a Manase tẽn-peelmẽ dãmbã la b waame n pʋga a Madiã.

²⁴ A Zedeõ tʋma neb tɩ b rʋ tãmsã, n yeele: «Efrayim dãmba sig-y n seg a Madiã, ning-y pãnga n deng b bulsẽ wã, sẽn yɩ Bɛt Bara n digd Zʋrdẽ.» Efrayim dãmb maana boto n gɩdg bulsã n ta Bɛt-Bara la Zʋrdẽ.

²⁵ B yõga Madiã taoor dãmb a yi n pag roogo: a Oreb la Zeeb. B waa n kʋ-la a Oreb zĩig ninga sẽn boond t'a Oreb Pĩiga, n kʋ a Zeeb zĩig ning sẽn boond t'a Zeeb bugsuntung rãam kõgb zĩiga. B pʋga a Madiã n tees a tẽnga la yaa Zʋrdẽ rʋʋnde la b tall a Oreb la a Zeeb zut n wa kis a Zedeõ.