Bʋ-kaoodba 6 - SEBR SÕNGO

A Zedeõ ne a Abimelɛk

¹ Israyɛl kamb maana sẽn pa ta Naaba-Wẽnd yam. Dẽ yĩnga Wẽnd dɩk-b lame n sagl Madiã rãmb nugẽ, yʋʋm a yopoe.

² La a Madiã nug tʋma a Israyɛl beedo. Yaa sẽn na yɩlẽ n põs a Madiã la Israyɛl kamba ra tiid b rot tãmsa pẽgsẽ, b bogdẽ bɩ b rĩ sɩlemsẽ.

³ A Madiã ra basdame t'a Israyɛl bʋd n sɛ la yẽ ne a Amalɛk la yaang rãmb da watame n kẽ a tẽnga zãnga.

⁴ B ra tiidame n pẽneg a Israyɛl la b ra wʋkda tẽnga kooda fãa n wa tãag Gaza. B ra ka keesd bũmb a Israyɛl yĩng ye. Pesgo, tɩ b loog ne, naafo bɩ bõanga, tɩ b loog ne.

⁵ B ra wata ne pɛɛla n tid b roto, n wat ne b rũmsi, n wat zembal wa kalwaare. Sɩda bãmb ne b rũmsa yaa kõn bãng n sõde la ra pɩɩsda tẽnga yululul!

⁶ Woto me, a Madiã yĩnga, a Israyɛl vɩɩm waa n lebga pɛta t'a na n kelem Naaba-Wẽnde.

⁷ A Madiã sẽn nams a Israyɛl t'a kelem n bool Wẽndã,

⁸ Soaala-Wẽnd tʋma no-rɛɛs a yĩnga. Wẽnd neda wa n yeel-b lame: «Ad Naaba-Wẽnd, a Israyɛl Soaala, sẽn yete: Yaa maam n yiis-y Ezipt tẽnga, yaa maam n zãag-y ne yembd tẽnga.

⁹ M fãaga yãmb Ezipt rãmba la y bɛɛba fãa nugẽ. M dig-b lame, m dɩka b tẽngã n kõ yã.

¹⁰ M yeel-y lame: ‹Maam la y Wẽnd rũnna la beoogo. Da maan-y rabeem ne y sẽn be ne b rãmbã, ne Amoritsa wẽn-naandsa ye.› Yãmb pa kelg m koɛɛg ye.»

¹¹ Soaala-Wẽnd malɛk n wa n zĩnd Ofra kʋka tẽngre. Kʋka da bee a Abiezɛr biig, a Zoas, pʋʋgẽ. Wakat kãng t'a Zoas biig a Zedeõ da bee zɛɛgẽ n pãbd a ki tɩ Madiã rãmba ra wa wʋk n loog n bas-a ye.

¹² Malɛka buug-a lame n yeel-a: «Wẽnd zĩnd ne fo, tãb-biig sẽn pid ne sũ-keelem!»

¹³ T'a Zedeõ leok: «Y sugri, m Zu-soaba! Wẽnd yɩta a wãna n be ne tõndo tɩ yɛla a woto fãa ket n paam-do? Bõn-bãna sẽn maan pĩnd tɩ d ba rãmba tar n gomda bɛɛ? B ra gomdame la b ra nong n kʋ-la b goama woto: ‹Y ka ne tɩ sɩd yaa bãmb n yiisd-d Ezipt tẽnga?› Rũnna b bas-d lame, b rɩka tõnd n sagl Madiã rãmb nugẽ.»

¹⁴ Wẽnd ges-a lame n yeel-a: «Kẽng ne pãng ning f sẽn tar a soabã, kẽng n tɩ fãag a Israyɛl Madiã nugẽ. Ka maam n tʋmd-f laa?»

¹⁵ A Zedeõ leokame: «Y sugri, m Soaala, m ba rooga la ro-yaalg a Manase buudẽ, la m ba zakẽ, maam la yao-zʋʋga! M maanda a wãn n fãag a Israyɛl?»

¹⁶ Dẽ la Soaala-Wẽnd yeel-a: «M na zĩnd f sɛɛgẽ la f na tõog Madiã rãmba gilli.»

¹⁷ A Zedeõ leokame: «Sã n yaa sɩda tɩ yãmb n tʋmd maam, bɩ y kõ-m makr a ye tɩ m bãng tɩ yaa yãmb n gomd ne-ma.

¹⁸ Ade, m yõkda y sɛɛga, pa-y ka tɩ m kẽng la m wa. Na n zemsa m tɩ bao m kũuni n wa rɩgl-a y taoore.» Naaba-Wẽnd leokame: «M na yaas n gũ fu.»

¹⁹ A Zedeõ sɩd loogame, a tɩ kʋʋ bulla n maneg-a la a bao zom peoogo n wẽ bur sẽn ka ning bɩlle. A baoo peoog n ning nemdã, n ning bɩɩma rʋkẽ, n tall fãa n wa kʋka tẽngre n wa kõ Soaala-Wẽnde.

²⁰ A sẽn wa n kolgdẽ, Soaala-Wẽnd malɛka yeel-a lame: «Dɩk nemdã la burã sẽn ka ning bɩllã n dogl pĩiga zugu la f rɩk bɩɩma n daage!» A Zedeõ maana wala sẽn togsã.

²¹ Malɛka dɩka a sẽn da zãad dasaar ningã n sɩɩs nemdã la burã. Bugum n yi pĩigã n dɩ nemdã la burã sẽn ka ning bɩllã. Malɛka loog n menemame.

²² Woto a Zedeõ bãngame tɩ sɩd ya Naaba-Wẽnd n tʋm-a. Dẽ la a yeel yã: «Wii! M yãee Soaala-Wẽnd malɛk ne m nini.»

²³ La Naaba-Wẽnd yeel-a lame: «Da sãam f sũur ye.»

²⁴ Zĩ-kãnga a Zedeõ mee maan-kugri n pʋd a yʋʋr tɩ Naaba-Wẽnd la laafi Wẽnde la a ket n bee ne rũnna Ofra, a Abiezɛr, tẽn-peelmẽ.

A Zedeõ ne a Baal

²⁵ Yʋng kãnga Naab a Wẽnd yeela a Zedeõ: «Yõk f ba nag-bil wubdgã n le paas yʋʋm a yopoe naafo. Kẽng n tɩ wã maan-kugr ning f ba sẽn me a Baal yĩngã. Kẽng n tɩ kʋʋg raoog ning a sẽn pees n sel n yegl n boond tɩ bõn-sõngã.

²⁶ Dẽ poore dʋ tãnga sẽn lugẽ wã n maneg n me maan-kugr Naaba-Wẽnd yĩnga. Maneg n me maan-kugrã tɩ zemse, la rɩk nag-bil a ye n yõog-a t'a rɩ bugum zãnga raooga sẽn kʋʋga zugu.»

²⁷ A Zedeõ kɩtame t'a rakõap piig yãag-a la a tɩ maana wa Soaala-Wẽnd sẽn da wilg-a. La yɩɩ yʋngo, pa yɩ wĩntoog ye t'a ra zoeta a buudã neba la tẽnga rãmba.

²⁸ Tẽnga rãmb sẽn yik pĩnda, b mikame t'a Baal maan-kugrã wãame la raoogã sẽn da sel n yegla me kʋʋgame. B bãngame tɩ loalg a yiib soaba maoong la b yõog maan-kug paala zugu.

²⁹ B soka taab: «Ãnda n maan woto?» B sogsame, b kelgame la b yeelame: «Woto yaa a Zowas biig a Zedeõ tʋʋmde.»

³⁰ Tẽnga rãmb yeela a Zowas: «Yiis f biigã n tɩ kʋ a t'a wãa a Baal maan-kugri la a kɛɛga raoogã sẽn da sel a sɛɛgẽ.»

³¹ Dẽ la a Zowas leok sẽn da be-b be wã: «Yãmb n tog n zab a Baal zabr laa? A sõngr tog n yii yãmb nengẽ bɩ? A Baal sõangd fãa togẽ lame n kʋ tɩ wĩndig nan ka bɩ ye. A Baal sã n ya wẽnde bɩ a zab n kõ a menga, a zab ne a Zedeõ, a maan-kugra wãada.»

³² Badaare b pʋda a Zedeõ ta Yerubaal: a Baal kao bʋʋdo ne a maan-kugra wãada.

Zabr ne Madiã

³³ A Madiã gilli, a Amalɛk la yaang rãmba sũu taaba n dʋʋg Zʋrdẽ n wa wẽ b sik Israyɛl tẽn-nabrẽ.

³⁴ Soaala-Wẽnd pãng me kẽe a Zedeõ, a sẽn peeb baorgo a boola a Abiezɛr la a waa n sakame.

³⁵ A tʋma neb a Manase tẽn-peelmẽ n bool-b tɩ b wa. A le tʋma neb a Asɛr, a Zabulõ la a Neftali la b fãa bobame n yi n wa a sõngre.

Pe-kõbd makre

³⁶ A Zedeõ yeela Naaba-Wẽnde: «Sã n ya sɩda tɩ yãmb datame tɩ m nug fãag a Israyɛl wala y sẽn togs-ma,

³⁷ ade, m na n yɛdga pe-kõbd zɛɛgẽ: meenema sã n dʋʋg n madg pe-kõbdã tɩ tẽnga yaool n ya koɛɛnga, m na bãng tɩ y ratame tɩ m nug fãag a Israyɛl, wala y sẽn yeelã.»

³⁸ Soaala-Wẽnd tõoga rẽnna. A Zedeõ sẽn sãd beoogo a wẽka pe-kõbdã la meenema pida laaga.

³⁹ T'a Zedeõ na n le yeel: «M kos tɩ y ra puug y sũur ne m ye tɩ m le bõs makr a to ne pe-kõbdã: m kotame tɩ zĩiga fãa yʋgʋmd ne meenem la pe-kõbda bal pa koɛɛnga!»

⁴⁰ Zĩig sẽn sobge, Soaala-Wẽnd maana wala a sẽn kose. Pe-kõbda bala n pa koɛɛnga tɩ zĩiga yaool n madg n gilg-a.