Bʋ-kaoodba 5 - SEBR SÕNGO

A Debora yɩɩlle

¹ Badaare a Debora la a Abinoam biig, a Barak, yɩɩla woto:

² A Israyɛl tẽn-peelmẽ zabr kõn ling ned ba a ye zabre la buuda bob-n-dõbẽ. Bɩ Soaala paam barka!

³ Dĩm dãmba, kelg-y, na-rɩtba, yoog-y y tʋba! M na n pʋda yɩɩle, la Wẽnd la m na n pẽge, Israyɛl Wẽnda la m na n pẽge.

⁴ Soaala, yãmb sẽn wa n yi Seyir, y sẽn wa n pãrg Edom weoogo, tẽnga miimame la saaga tuumame, sawata dʋʋga koom.

⁵ Tãmsa miimame, Sinayi Wẽnda taoore, a Israyɛl Wẽnnaama taoore, b miimame.

⁶ A Anat biig a Samgar wẽnnẽ, a Ebɛr pag a Yaɛl wẽnnẽ soy ra ka le yãet toand ye. So-toagdba soe ra lebga gõtem-gõtem.

⁷ Israyɛl tẽnsa ra ka le tar naab ye, n tãag m waoongo, n tãag a Israyɛl ma a Debora waoongo.

⁸ Wẽn-paals la neba ra yik n pʋgda, dẽ me la tẽnga ra pid ne zaba; la tẽns a nu pʋgẽ b ra pa tar gãong a ye, kãnd a ye meng ra pa kete a Israyɛl tãb-biis tus pis-naasa yĩng ye.

⁹ M nonga a Israyɛl tãnsoaben-dãmbã, m nonga sẽn bob-b tãpa ne yamleoogã. Bɩ d fãa gill pẽg Soaala-Wẽnde!

¹⁰ Yãmb fãa sẽn zao-b bõn-yãan-peelse, sẽn tʋɩ-b fu-tagdo n zĩ b rotẽ, la yãmb sẽn kẽnd-b sor zugu, pʋd-y yɩɩlle!

¹¹ Naag-y y koees n kaas sũ-noog kaasgo ne sẽn pidsd-b gaolga kooma, naag-y taab n pẽg Soaala yel-sõmde, b yel-sõmda ne a Israyɛl nanamsã b sã n yi fãa n na n tak zabre.

¹² Yiki, Debora, yik n lʋɩɩs f toogo yik n pʋd f zabr kaoogr yɩɩlle. Yiki, Barak, a Abinoam gãndaoogo, yik n bao roog n pag f sẽn yõg b rãmba,

¹³ la zabra sẽn ka loog ne b rãmbã bãmb me wa tong ne b tãnsoaba, b tong b zug-zẽkr tongre, b sẽn maan raood tongre.

¹⁴ Sẽn tõog a Amalɛka yii Efrayim, a Bẽnzame pʋgame n wa kẽ b sʋka. Tãnsoaba yi-la a Makir doogẽ, zab mitba yita a Zabulõ tãpẽ.

¹⁵ A Isakar tãnsoaba bee ne a Debora, a Isakar zood pa sãam ne a Barak ye, dẽ me la a yik n pʋga a pʋ-weesẽ. Sã n yaa a Rubẽ sakẽ, b pa vʋʋs ne no-koɛɛm ye.

¹⁶ Bõe tɩ f pa yãgrẽ, f rũmsa sɛɛga n kelgd nag-kɩɩmba sẽn boond b rũmsi? N-ye, a Rubẽ sakẽ, yɩɩ no-koɛɛm ne no-koɛɛma.

¹⁷ A Galaad paa Zʋrdẽ rʋʋnde, la bõe t'a Dã kogenda lengd kooma zugu? A Asɛr paa mogra noore, a vɩɩ be ne laafi, a koom-kogenda soondg zĩisẽ.

¹⁸ Sã n yaa a Zabulõ nebã wala a Neftali rãmba bãmb saka a yii n seg kũum, zabra sẽn na n zab zĩig ning fãa.

¹⁹ Bɛɛba nanamse, Kanaã rãmba taka zabre ne a Taanak Megido ko-bundem zĩigẽ. La b zaba zab faado, yõod pa tol n zĩnd ye. B pa lɛɛg n kul ne lagfr ye.

²⁰ Ãdsa zĩnda yĩngr n zab b zabrã, b rɩka sor n wa zab ne a Sisera.

²¹ Kisõ kʋɩl-bɛɛga pɩɩg-b-la ne a saaga Kisõ kʋɩlga lɛɛg n vel-b lame. Pids-ma, m sɩɩga, pids-m ne raoodo!

²² Wiidi wã nao ninga b rãamde. Wed daada sẽn tar zoees la b sẽn tare!

²³ Soaala malɛk yeelame: Wẽnd na sãam a Meroz, Wẽnd na sãam a nebã! B pa zab n sõng Soaala-Wẽnd ye, b ned pa zĩnd gãndaada sʋk ye.

²⁴ Wẽnd na ning a Yaɛl bark pagba fãa sʋka, (Kenitg, a Ebɛr, pag a Yaɛl). A paam barka tẽnga pagba fãa sʋka!

²⁵ Bɛ wã bõs-a koom, t'a kõ-a bĩisim, a bao wam-neere n kõ a bĩisim sẽn põeed kaam.

²⁶ Paga sẽn tẽeg a goabga, baaf la a feoog yã, a sẽn tẽeg a rɩtgo, tʋʋm mitb zãar la a tebg yã. A sẽn wẽ a Sisera a zuga la a wek yã, a kɩgdga la a wurg yã.

²⁷ A Sisera põd n lʋɩɩme, a lʋɩ, pag taoore, la lʋɩɩsa pa lʋɩ n tẽed yikr ye, a sẽn põd n lʋɩ, a kiime.

²⁸ A Sisera ma ra lɩkda võorẽ, võorẽ la a sulgd n getẽ. Võẽ la a Sisera ma ra lɩgsda, la a sokd a menga: «Bõe t'a lebgra kaoosdẽ, bõe tɩ bilim-bilma kẽnd lebg maasga?»

²⁹ Dĩma bi-pugl a ye sẽn pid ne yẽesem n leok-a, t'a reeg n walemd a menga:

³⁰ «Daare b zĩi n sõtame, daare b zĩi n pʋɩta b laogo: bi-pugla, kom-pugli a yi, tãb-biig a ye yĩnga peen gʋmd a ye, sẽn maneg n gʋle, a Sisera yĩnga, a sẽn tõog a bɛɛb yĩnga peen-neer sẽn na n vil a yubla.»

³¹ Y bɛɛba fãa na ki boto, Soaala-Wẽnde! La neb niyns sẽn nong-b yãmbã yɩ wa wĩntoogo sẽn tãoosd a vẽenem ne pãnga! Tẽnga paa yʋʋm pis-naase n ka le rãmb ye.