Bʋ-kaoodba 4 - SEBR SÕNGO

A Debora la a Barak

¹ A Ewud kũum poore, Israyɛl kamb le sɩngame n maan sẽn pa tat Soaala-Wẽnd yam.

² Yaa rẽ me yĩnga la Wẽnd dɩk-ba n sagl Kanaã rĩm, a Yabin nugẽ. A Yabin n da rɩt naam Asor tẽnga. A Sisera n da yaa a tãnsoaba la a ra kẽeda Arosɛt-Goyim.

³ A Israyɛl kelma Soaala-Wẽnde t'a Sisera da tara kut bilim-bilm kobs-wɛ. Yʋʋm pisi pʋgẽ Israyɛl yãee pɛta.

⁴ Wakat kãng tɩ bãngd poak, a Debora, a Lapidot paga n da so Israyɛl kãsengo.

⁵ A ra kaooda a bʋʋdã koang a ye tẽngre, a Debora koanga. Yaa Rama ne Betɛl tẽnsʋka, a Efrayim tãnga zugu; a Israyɛl kamba ra kẽnda a nengẽ n welgd b yɛla.

⁶ Daar a ye a Debora kɩtame tɩ b bool a Barak, a Abinoam biiga, Kedɛs tẽng raoa, Neftali tẽn-peelmẽ la a yeel-a lame: «Ad Naaba-Wẽnde, ad Israyɛl Wẽnda, n sɩd kõo noore. Yi n tees Tabor, yi ne a Neftali la a Zabulõ kamba tus piiga.

⁷ Yaa Kisõ kʋɩl-bɛɛga la m na n tus n togl foo, a Yabin tãnsoab, a Sisera, yẽ ne a bilim-bilm la tãb-biisã, la m na n dɩk-b lame n sagl f nugẽ.»

⁸ T'a Barak leoke: «Fo sã n na n yãag maam, m na kẽnge, la fo sã n pa tũudi m pa na n kẽng ye tɩ m pa mi sẽn ya daar ning la Soaala Malɛk na n kɩt tɩ m tõog bɛɛba ye.»

⁹ Dẽ la a Debora leok yã: «M na tũ-f n kẽnge la so-kãnga yẽ, ad-f zug ka na n zẽk wʋsg ye, tɩ yaa pag nugẽ la Soaala-Wẽnd na n dɩk bɛɛbã n sagle.» A Debora sɩd yii ne a Barak n kẽng Kedɛs.

¹⁰ Yaa be la a Barak tigim a Neftali la a Zabulõ kamba. B sõor taa tus piiga. A Debora yãag-b lame.

¹¹ Ned a ye n da boond t'a Ebɛr, n ya Kenitga, a ra zãaga a Kaẽ buudẽ n ti a zaka, a zãaga ne a Moyiiz rɛɛmba, a Obab yagense, a ra zãaga wʋsgo ne Kananim kʋkã, Kedɛs yegende.

¹² A Sisera wʋmame t'a Abinoam biig a Barak wẽ a sik Tabor tãng zugu.

¹³ Dẽ la a yiis a kut bilim-bilm kobs-wɛ la a tãb-biisa gilli, sẽn sɩng Arosɛt-Goyim n ta Kisõ kʋɩlga.

¹⁴ A Debora yeela a Barak: «Yik tɩ yaa rũnna la Naaba-Wẽnd dɩk a Sisera n sagl f nugẽ. N-ye! Naaba-Wẽnd lʋɩ-la f taoore.» A Barak siga Tabor tãnga ne tãb-biis tus piiga.

¹⁵ Yaa ne sʋʋs sẽn dɩte la a Barak taoore, Naaba-Wẽnd sẽeg a Sisera bilim-bilm la a tãb-biisi. A Sisera tol n basa a bilim-bilm n na n zoe ne a nao.

¹⁶ A Barak riga tãb-biisã la bilim-bilma n ta Arosɛt-Goyim. Sʋʋg n kood a Sisera tãb-biisa fãa, ba a ye ka põs ye.

¹⁷ A Sisera ninga tĩiga n tees Kenitga, a Ebɛr paga, a Yaɛl doogo. Wakat kãng tɩ Asor dĩm a Yabin la Kenitga a Ebɛr doog da yaa zoodo.

¹⁸ A Yaɛl yaool yi n sega a Sisera n yeel a: «Dĩm sõngo, pa-y ka, pa-y mam zakẽ, da maan-y rabeem ye.» A sɩd pa-la a Yaɛl doogẽ, t'a bao fu taoko n lud-a.

¹⁹ A Sisera wa n yeela pagã: «F tõe n kõ-m-la koom bilfu tɩ m yũ tɩ ko-yũud tar-m lame!» A rɩka waoog ne bĩisim n kõ-a t'a yũ n le lɛɛg n pil-a neere.

²⁰ A Sisera le paasame: «Yaas rignoorẽ ka, la ned sã n wa sok-fo: ‹Ned ka wa ka?› Bɩ f leok tɩ ayoo!»

²¹ Bãng-y t'a Ebɛr pag a Yaɛl feooga a rooga baaf a ye n dɩk zãar n kolg bãanem-bãanem, n ges a Sisera kɩgdga n ka ne baafã t'a sãag n kẽ tẽnga. Yaamsã yĩnga a Sisera gõeema sɩd yɩɩ gõeem yãanga. Dẽ me la a Yaɛl paam-a n kʋ.

²² A Barak sẽn da pʋgda wẽneg n taame t'a Yaɛl yi n seg-a n yeel a: «Wa-y tɩ m wilg-y y sẽn baood a soabã.» A Barak sẽn kẽ, a yãeeme t'a Sisera ki n dɩga, t'a kɩgdga ka ne baafo.

²³ Yɩɩ baraare la Naaba-Wẽnd ning Kanaã rĩm, a Yabin, yãnde, Israyɛl dãmb taoore.

²⁴ Dẽ me la a Israyɛl sɩng n zɩsgd a nugu Kanaã rãmba dĩm, a Yabin, zugu, n wa tõog-a zãnga.